Mois : juin 2019

ARORIAKA sy Fihaonambe

FILAZANA


Ny Trano fiantohana ARORIAKA dia mampatsiahy ny Sampana, Sampan’Asa , Asa rehetra ato anatin’ny Fiangonan’i Jesoa Kristy eto Madagasikara (FJKM) fa efa akaiky ny fihaonambe izay sahanin’ny Sampana tsirairay, fa tokony hanao Fiantohana fiarovana amin’ny loza  (Assurance Personnelle contre les Accidents : APA) ireo rehetra izay mamonjy fivoriana na fanaovana Tafika Masina izay sahanin’ny Fiangonana ka handeha any amin’ny faritra ivelan’ny Fitandremana misy ny tsirairay. 


Marihina fa azo atao tsara amin’izao fotoana izao ny manatontosa ny fiantohana na aiza na aiza misy ny Sampana sy Fitandremana tsirairay noho ny fivoaran’ny fitaovam-pifandraisana. 


Raha mila fanazavana na ny antsipiriany momba izany dia afaka manatona ny varavarana 215 ato amin’ny Foibe FJKM Analakely na miantso ny laharana 034 07 206 84,na 033 21 165 98. Eo ihany koa ny adiresy mail : harismamy@yahoo.fr  » 

Afaka manatona ny varavarana 215 ao amin’ny Foibe FJKM Analakely na miantso ny laharana 034 07 206 84,na 033 21 165 98. Eo ihany koa ny adiresy mail : harismamy@yahoo.fr  » 

Mamy RANDRIAMAMPIANINA 

ARORIAKA

Alatsinainy 24 Jiona 2019.

Fandalinana ny ASAN’NY APOSTOLY

Asan’ny Apostoly 21.27-40

Mahagaga antsika hatrany ny fitondran’ny Tompo an’ i Paoly

1-I Paoly nenjehina fa Apostolin’ny Jentilisa (and 27-30)

Efa tsy vaovao amin’izany intsony izy fa efa azo lazaina ho vita vaksiny amin’ izany mihitsy . Teto ny antony nanenjehana azy dia ny fiarahany tamin’ ireo Jentilisa (tsy Jiosy) nambara fa nandoto ny fitoerana masina , na dia tsy marina aza izany . Mety ho tratran’ny fanendrikendrehana toy izany koa ianao , fa mahereza.

2-I Paoly novonjen’ny miaramila (and31-36)

Ny fahatongavan’ny miaramila Romana no tsy nahafaty azy , na dia romotra te-hanompo azy aza ny Jiosy. Mahazo matoky koa isika fa hain’ Andriamanitra ampiasaina ny mpitandro ny filaminana hanampy antsika mpitory ny Filazantsara .

3-I Paoly sahy miteny fa tsy mangina (and37-40)

Raha heverina ny hoe : zara aza tsy matin’ny olona teo ,dia hoe ny mangina no mety . Tsy izany anefa no nataon’i Paoly , fa mbola nangataka hiteny amin’ny vahoaka ihany izy. Tena hita ara-bakiteny mihitsy izay voalazany tao amin’ny Asa 20.24 hoe : « Tsy ataoko ho zavatra akory ny aiko …hanambara ny Filazantsaran’ny fahasoavan’ Andriamanitra »

« Raiso ny Tenin’ Andriamanitra » Boky faha-8

Alahady 23 Jiona 2019

Fandalinana ny ASAN’NY APOSTOLY

Asan’ny Apostoly 21.15-26

Noho ny  herin’Andriamanitra sy ny  asany  dia :

1-Mitombo  fatratra ny isan’ny mino  an’i Jesoa na Jiosy  na Jentilisa

Nifanao tatitra i Paoly  sy ireo loholona tany Jerosalema . Izany tatitra izany  no  ahatsapana  ny asan’ Andriamanitra . Ny nampanaovina  an’i Paoly  dia ny hitory  amin’ny Jentilisa . Vokany : maro  ny Jentilisa no resy lahatra hino  sy hanaiky  an’i Jesoa Kristy  (and19). Tsy  latsaka amin’izany  koa anefa  ny nataony  tamin’ireo Jiosy  araka ny tatitra nataon’ny loholona (and20). Tsy  omby  alonalina ny Jiosy  tonga mpino kristiana .

2-Mahay  mifankatia ny samy  mpino an’i Kristy

Foko samihafa avy amin’ny firenena samihafa no lasa mahay  mifankatia , noho ny asan’ Andriamanitra  izay  mampiombona azy . Nisy  mpianatra avy any Kaisaria (and16) nanaraka  an-dry i Paoly  no  ho  ny fifankatiavana . Tonga tany  Jerosalema  dia tamin’ny fifaliana  no nandraisan’ireo  mpino  an’ireto  mpino avy lavitra ireto (and17) . Nanoro hevitra  an’i Paoly   ireo loholona  mba ho  fiarovana azy amin’ny fiampangan’ny  olona sasany  azy (and 22). Noho  ny fitiavana avy amin’ Andriamanitra no  mahatonga  izany rehetra izany  . Izay  ilay didy vaovao  napetraky  ny Tompo  Jesoa , sady famantarana  ny maha- mpianany antsika . mandini-tena isika mpino ankehitriny , raha mandinika izany fifankatiavan’ny  mpino teo  aloha izany .

« Raiso ny Tenin’ Andriamanitra » Boky faha- 8

Sabotsy 22 Jiona 2019.

Fandalinana ny ASAN’NY APOSTOLY

Asan’ny Apostoly 21.1-14

Tsy misaraka  amin’ny mpianatry  ny  Tompo  ny Fanahy  Masina : mitarika , miteny  aminy , mitaiza, manefy  azy  ireo  Izy  mba tsy  hikatsaka afa-tsy  ireto :

1-Ny hisehoan’ny  Voninahitr’ Andriamanitra (and13)

Ny Fanahy Masina mihitsy  no niteny  tamin’i Paoly, tamin’ny alalan’i Agabo mpaminany, fa hifatorana ary hatolotra ny Jentilisa izy  rehefa tonga any Jerosalema (and10-11). Tsy  nampihemotra  an’i Paoly  izany , hoy  izy : « Nahoana ianareo  no mitomany  ka mampangorakoraka ny  foko ? Fa vonona aho  tsy ny hafatotra ihany  fa ny  ho faty  any Jerosalema koa aza mba ho Voninahitry ny  Anaran’ny Tompo » (and13).

2-Ny hahatanterahan’ny sitrapon’ Andriamanitra

Endrey ny asan’ny Fanahy Masina . I Paoly  aloha no resy lahatra haneho  ny voninahitr’i Jesoa . Fa rehefa kelikely teo , dia nanaraka ihany  ny  mpianatra ka namela ny hahatanterahan’ny sitrapon’ Andriamanitra . Mifarana ny adihevitra sy ny fandresen-dahatra , rehefa  ny sitrapon’ Andriamanitra  no resahina . Koa ambarao sy ampianaro  any amin’ny toerana rehetra  be adihevitra  ny sitrapon’ Andriamanitra  mba hifaranan’ny ady . Ny  asan’ny Fanahy Masina anefa no  mahatanteraka izany  , fa  tsy  ny olona rehetra  mahalala ny  sitrapon’ny Tompo no manaraka izany . Mampianatra  antsika hiankina amin’ny fitarihan’ny Fanahy Masina izany .

« Raiso ny Tenin’ Andriamanitra » Boky faha- 8

Hafatry ny Filoha /Jiona 2019.

VONTOSY FILAZANTSARA

NY NOSY MADAGASIKARA !

Fa ‘ty Nosintsika ity,

Nosy tena mahagaga,

itobahan’ny harena,

ambonin’ny tany,

an-kibon-tany,

ary koa an-dranomasina;

nefa, he, fa mahonena

ny fahantran’ny mponina eto,

Fa nahoana ?

Fa nahoana ?

Satria izaho sy ianao mihitsy,

Ry Vahoaka Malagasy,

No andrasan’ny Mpahary

Hitodika Aminy,

Hivavaka,

Mba tsy ho teny foana intsony

Itony hiram-pirenena

Hoe Izy Ilay Nahary

Izao tontolo izao ange

No tena fototra ijoroan’

Ny satantsika Malagasy!

Hira izany, nohiraina,

Nefa hatraiza no anekena

Tena hivelona an’izany ?

Koa ianao izay mahalala

No irahina eto anio :

VONTOSY FILAZANTSARA

NY NOSY MADAGASIKARA !

IRAKO AMMI

FMBM / Andrombavaka

ANDROM-BAVAKA MANERAN-TANY 2019

 IRAY AO AMIN’I KRISTY ISIKA KRISTIANA

Tanteraka ny sabotsy 8 jona 2019 ny Androm-bavaka maneran-tany sy ny Diabe ho an’i Kristy izay nokarakarain’ny Fikambanana Mampiely Baiboly Malagasy (FMBM) sy ny Fikambanan’ny Mpiara-Mamaky ny Baiboly (FMMB) teny amin’ny Kianjabe ny Mahamasina. Kristianina teo amin’ny 15.000 isa teo no niombona tamin’izany ary nitombo avo efatra heny izany isa izany raha ampitahaina tamin’ny taon-dasa. Hita taratra tao anatin’ireo mpandray anjara tamin’ny litorjia, ny endriky ny fiombonana izay voizin’ny hetsika satria dia anaram-piangonana 25 isa no nandray anjara tamin’izany.

Nitondra ny hafatr’Andriamanitra ny Mpitandrina, Irako Ammi ANDRIAMAHAZOSOA, Filohan’ny Fiangonan’i Jesoa Kristy eto Madagasikara (FJKM) ary ny (2 Tantara 7.14) no nandraisana izany. Nohazavainy tamin’izany ny hoe :

1-Mihaino antsika Andriamanitra,

2-Mihaino an’Andriamanitra isika,

3-Mihaino an’Andriamanitra ao amin’i Jesoa Kristy isika.

Vavaka nataon’i Jesoa Kristy mialoha ny nahafatesany ny firaisantsika kristiana (Jaona 17). Fanamby lehibe ny fanatanterahana izany. Ny hetsika androm-bavaka maneran-tany dia anisany maneho fa azo atao tokoa izany fiombonana ao anatin’ny fahasamihafana izany. Mitohy ao anatin’ny atao hoe “90 androm-pitahiana” indray ny hetsika taorian’ny 8 jona 2019. Mandritra ny 90 andro no isafidianantsika kristiana rehetra asa fanasoavana hita maso ho an’ny manodidina antsika, toy ny fanomezana sakafo ireo tsy manana, fanampiana ireo tsy salama, fanadiovana, ady amin’ny kolikoly, fanohanana mpanompon’Andriamanitra, sns … Azontsika atao tsirairay io, na isam-piangonana, na isaky ny fikambanana. Ny tanjona dia ny hanekentsika ho fitaovana eo am-pelatanan’Andriamanitra mba hitondra fitahiana ho an’ny firenentsika.

Evariste RASOLOHERY, Elsa RASON FMBM

Sekoly 200T / Antsampanahy

“ Mahareta tsara…mandra-pihavin’ny Tompo. ” (Jakoba 5, 7a)

ANTSAM-PANAHY LEHIBE

IARAHANA AMIN’IRETO ANTOKO MPIHIRA IRETO :

  • KORAITA : FJKM Manarintsoa Finoana
  • HOSANA : FJKM Ambohijatovo Fitiavana
  • ANJOMARA ANOSIVAVAKA : FJKM Anosivavaka
  • TSANTAN’IMAHAMASINA : FJKM Atsimon’Imahamasina
  • ANTOKO MPIHIRA FJKM Katedraly Analakely

Ao amin’ny FJKM Katedraly Analakely,

Amin’ny Alahady 30 jona 2019, manomboka amin’ny 2 ora tolakandro

“ Hihira ho an’i Jehovah aho, raha mbola velona koa. Hankalaza an’Andriamanitra aho, raha mbola miaina”. (Salamo 104, 33)

Ny Komity K 200 S

Zoma 21 Jiona 2019.

Fandalinana ny ASAN’NY APOSTOLY

Asan’ny Apostoly 20.17-38

Famindran-draharaha no nataon’i Paoly eto .

1-Ireo zavatra nafindrany amin’ny olona rehetra hatramin’ny fahatongavany mandra-pialany

Hafakely ity famindran-draharaha ity , satria ny mahazatra rehefa handeha vao manao izany . Eto kosa vantany vao tonga dia manao izany (and 18). Ny Filazantsaran’ny fahasoavan’ Andriamanitra (and 24), ny saina avy amin’ Andriamanitra (and 27) izay nitaomany ny olona hibebaka sy hino an’i Jesoa Kristy (and 21) no zavatra nafindra tamin’izany . Ny olona rehetra tsy ankanavaka no namindrana azy.

2-Ireo zavatra nafindrany amin’ny olona voatokana rehefa hiala izy.

Fahasoavana ( and20-24 ) no nafindra tao amin’ny fizarana voalohany . Eto kosa , dia andraikitra no afindra. Tsy ny olona rehetra no namindrana an’izao raharaha izao , fa ny loholona avy tao Efesosy ihany (and17). Mitandrema (and28) , miambena (and31) ary miasà (and33-35). Izany no baiko napetrak’i Paoly tamin’ny loholona , dia ny hampiasa ny tànany mba hisy hampiasainy (and 34) ka tsy hahavaky tratra ny Fiangonana izy.

« Raiso ny Tenin’ Andriamanitra » Boky faha-8