Fanazavana Perikopa Nov 2017 .

Miandry ny Tompo ny vavolombelona mino

Ny Perikopa voalahatra amin’ny Alahady roa farany, volana  Novambra 2017 mialohan’ny hidiran’ny Fiangonana amin’ny vanim-potoan’ny advento no atolotra eto.

Araka ny lohahevitra enti-mibanjina ny perikopa amin’izao volana Novambra izao, ilay voasoratra hoe : miandry ny Tompo ny vavolombelona mino, dia fanontaniana iray no hoezahana ho valiana : Iza moa ny Tompo andrasana ? Ny fahafantarana ny valin’izany ho mitondra ny olona hahay hijoro ho vavolombelony satria efa mahafantatra marina Azy .

Isaia 25, 9- 12 : Ny anaran’ny Mpaminany Isaia dia efa manambara ny amin’Ilay Andriamanitra Tompony. « Ny Tompo no Mpamonjy » no hevitry ny anarana hoe : Isaia. Ilay Mpamonjy no andrasana raha izany. Io Tompo Mpamonjy io dia eo anoloan’ny olona no sady miaraka aminy, araka ny filazana Azy eto, hoe : « Indro Andriamanitsika… Indro Jehovah » (and.9). Manamafy izany ny fiarahany monina amin’ny olona ka hoy Isaia : « fa hipetraka amin’ity tendrombohitra ity ny tànan’i Jehovah. » (and.10)
Ambara ihany koa fa Izy no nandrasan’ny olony. Tsy maintsy ho nisy teny fampanantenana ny ho fihaviany no miteraka ny antom-piandrasan’ny olona Azy. Andriamanitry ny fampanantenana ny Tompo ka hanandratra ny olony kanefa hampietry ny fahavalony (and.10- 11)

Jaona 4, 19- 26 : Araka ny fanambaran’i Jesoa an’Andriamanitra, dia Fanahy sy Fahamarinana Izy.Ary satria Andriamanitra i Jesoa izay manambara an’Andriamanitra tamin’ilay Samartana dia efa fanehoana
ny maha Izy Azy an’Andriamanitra izany. Izany hoe : Andriamanitra dia Ilay hany afaka manambara nytenany amin’ny olona. Koa raha tsy afa-manambara ny tenany izay ataon’ny olona ho andriamanitra dia tsy
Andriamanitra izy.

Ny hoe : mivavaha amin’ny Fanahy sy ny Fahamarinana dia fisehoan’Andriamanitra ivavahana izany. Tsy ny ara-nofo fa ny ara-panahy indrindra no isehoany. Taratra izany tamin’ny fiainan’ity Samaritana, izay nitafa tamin’i Jesoa ity. Fa ny maha- Fahamarinana an’Andriamanitra dia fanehoana fa ny Tompo no toy ny fitaovana enti-manamarina ny olona. Izany no antsoina hoe : fahasoavana. Tsy ny lalàna mitondra ho amin’ny fanamelohana fa ny fanamarinana manafaka amin’ny fitsarana. Tanteraka ao amin’i Jesoa izany. Ny fahafatesany no nisolo ny fahafatesan’ny olona ary ny fahavelomany no ho santatry ny fiainana mandrakizay ampanantenaina ho azony. Koa izany no itaomana ny olona hino ny Tompo.

Titosy 2, 11- 15 : Andriamanitra Tompo dia fantatra amin’ny alalan’ny fahasoavany dia ny famonjena atolony ho an’ny olona rehetra. Amin’izany, ny famonjena dia manova ny olona hiaina ny ara-panahy kokoa mba handavany ny filan’ny nofo na ny fahotana. Noho ny fahasoavan’Andriamanitra no anantenan’ny mino an’Andriamanitra sy isehoan’ny voninahitr’ilay namonjy azy.

Zefania 3, 14- 20 : Andriamanitra manafaka ny Tompo ka amin’izany, ireto no endrika isehoan’ny fanafahany : Andaniny, Izy mitondra ny olony hitoetra amin’ny fifaliana maharitra ary ankilany mampitsahatra ny fanamelohana noho ny tsy fahatanterahan’ny olony. Ny fiarahany mandeha amin’ny olony no isan’izay manaporofo ny asa-panafahany. Miseho ny heriny ka mampandresy ny olony izay hifaly sy hiravoravo ka miombona amin’ny fifaliany ny Tompo.

Lioka 21, 25- 28 : Ny perikopa eto dia manambara ny Tompo amin’ny anarany hoe : Zanak’olona.Anarana fampiasan’ny Filazantsara ho enti-manambara ny fijaliany ho fisandratany izany. Ny Zanak’olona no hitondra hery sy voninahitra ho an’ny olony satria hifarana tsy ho ela ny fijaliany.

Jakoba 5, 7- 11. Ny Tompo dia i Jesoa Kristy, Ilay antenaina hiverina indray ka itaomana ny olona hiandry Azy am-paharetana mba handraisany ny valim-piandrasany. Ho fanampin’izany, atolotra ny olona ny toe-panahy rehetra enti-miandry ny Tompo.

Ho an’Andriamanitra irery ihany anie ny voninahitra.

RAKOTOZANANY Andrianirinomena Jules, Mpitandrina