Alarobia 13 Febroary 2019.
Fandalinana ny Boky 2 Samoela
2 Samoela 24.11-25
Tohin’ny tantara mampalahelo novakintsika omaly no hitantsika eto ka ampianarin’ny Tompo fa:
1-Tsy misy fahotana afa-maina akory .Marina fa efa nifona i Davida , nefa tonga ihany ny Tenin’ny Tompo ary nihatra ihany ny areti-mandringana .Tsy misy hafa amin’izany ny nanjo an’i Jesoa : tsy maintsy maty Izy rehefa natao ho ota hamonjy antsika (2 Kor 5.21). Ary fampitandremana lehibe ho antsika izany sao sanatria isika alaim-panajhy hisaina hoe:hataoko ity ratsy ity fa rehefa avy eo aho mifona.
2-Mahatratra ny hafa ny fahotana ataontsika . I Davida no nanota , nefa ny zanak’Israely no niharan’ny fandringanana. Ary izany hatrany ny fahotana: tsy misy fahotana izay ianao irery no iharan’ny valiny , fa misy fiatraikany ratsy any amin’ny hafa foana izany . Ohatra : i Adama no nanota , nefa ny tany no voaozona (Gen 3.17). Tandremo àary sao ny vady aman-janakao na ny fiangonana na ny firenena no hizaka ny vokatry ny fahotanao.
3-Azo onerana ny fahotana vita. Teto dia nifona indray i Davida , nefa nanao fanatitra koa izy. Mariho ny teny nataony hoe: »tsy hanatitra fanatitra dorana ho an’i Jehovah Andriamanitro amin’izay azoko fotsiny aho » (and24). Ny fanatitra tsara indrindra hanafaka ny fahotantsika anefa dia efa vitan’i Jesoa teo ambony hazo fijaliana (Heb 10.12).Haleloia!
« Raiso ny Tenin’ Andriamanitra » Boky faha- 3