Talata 12 Febroary 2019.

Fandalinana ny Boky 2 Samoela

2 Samoela 24.1-10

Tantara mampalahelo indray no hitantsika eto:

1-Resin’ny fiavonavonana i Davida . Ny fanisana ny vahoaka lazaina eto dia tsy fanoherana ny fanaovana antontanisa toy izany na ny bokin’i Nehemia na Ezra … Ny loza teto dia ny zavatra nanetsika an’i Davida hampanao azy : nampanao ny fanisana izy mba hireharehany ho mpanjaka lehibe, manana vahoaka betsaka sy tafika mahery . Tonga fiavonavonana hanakonana ny Voninahitr’ Andriamanitra izany .

2-Resin’ny fakampanahy i Davida. Mariho  fa ny filazana  hoe: nanome saina an’i Davida hampanao izany ny Tompo, eo amin’ny and1, dia tsy mahafa-tsiny azy . Lazain’ny 1 Tant 21.1 fa i satana no nomen’ny Tompo fahafahana haka fanahy azy , ary nanaiky ho resin’ilay fakampanahy i Davida. I Jesoa koa dia nentin’ny Fanahy halain’i satana fanahy, saingy nandresy Izy (Mat 4.1,11).

3-Soa fa mahay nifona nalaky i Davida. Tsaroany ny fahadisoany ka nifonany (and10). Mpitondra « velona eritreritra« mantsy izy ka , na teo aza ny fakampanahy nandresy azy , tsy namono ny fieritreretany izany , fa nahay niaiky ny fahadisoana nataony izy . Mivavaha mba hananantsika mpitondra velona eritreritra toy izany koa hiadanantsika.

« Raiso ny Tenin’ Andriamanitra » Boky faha- 3