SAMPATI/ 25 Taona

SAMPATI FOIBE FJKM

Any Mahajanga no hanokafana ny Jobily faha-25 taona

« Aoka hirehitra ny Jironareo » Lio.12, 35

« Hianareo no fahazavan’izao tontolo izao » Mat.5, 14

Miarahaba ny Sampana MPANAZAVA sy TILY FJKM rehetra n’aiza n’aiza misy an’ise. Misaotra ny Tompo isika fa tanteraka soa aman-tsara ny hetsika ANTSANKIRAM-PIDERANA natao tao ANTSAHAMANITRA ny Sabotsy 16 Jona 2018 lasa teo. Tolorana fisaorana isika rehetra  tamin’ny fifanomezan-tanana sy ny fanohanana am-bavaka izany fotoana izany. Hetsika Voalohany amin’ny Fotoam-pankalazana an’Andriamanitra noho ny JOBILY faha-25 Taonantsika iny natao iny. Tolorana fisaorana koa ireo Mpanakanto maro nanafana ny fotoana : NY MENAFIFY – GMMC – Christophe Ratrema – Anjomara Anosivavaka – Taratry ny Mazava – BODO – Honorat Fohy hehy. Isaorana hatrany isika Komity amin’ny fikatsahana ny hevitra rehetra ho enti-manatanteraka ny hetsi-pankalazana.

FANENTANANA, FANOKAFANA JOBILY VOLAFOTSY SAMPATI :  MAHAJANGA

Ho tanterahana any MAHAJANGA ny fanokafana ny JOBILY faha-25 taona SAMPATI FJKM ny 14 -15 Jolay 2018 izao. Hitaomana antsika vahoakan’Andriamanitra rehetra ho tonga hanotrona izany. Toy izao ny fandaharam-potoana :

Sabotsy 14 Jolay 2018 :

• Amin’ny 8ora maraina : CARNAVAL SAMPATI
• Amin’ny 2ora sy sasany hariva : FANOMPOAM-PIVAVAHANA FANOMBOHANA ao amin’ny FJKM Ziona Vaovao Mahajanga
• Alina : Seho sehatra (isaky ny Synodam-paritany na tarika, hanasana ny manan-talenta rehetra

Alahady 15 Jolay 2018 :

Amin’ny 8ora sy sasany maraina : FANOMPOAM-PIVAVAHANA HO FANOKAFANA NY JOBILY izay tarihin’ny FOIBE FJKM ao amin’ny FJKM Betela Tsararano.

Fanamarihana : Entanina ho tonga maro any Mahajanga isika : Komitim-pivondronana sy Filoha Mpanazava sy Tily rehetra fa hisy dinika asa hiarahantsika manao amin’izany ho fampandrosoana ny SAMPATI FJKM.

RANDRIAMANANTENA SOLO

Jean Jacques Séraphin Jhons, Mpitandrina

Tonia SAMPATI  Foibe