Alahady 02 Desambra 2018.

Fandalinana ny Boky 1 Samoela

1 Samoela 17.31-40

Ity perikopa ity  no maneho fa irak’ Andriamanitra i Davida fa tsy irak’i Jese rainy loatra akory.

1-Tsy mihaino ny fanakiviana izy .

Raha marina dia efa indroa izy izao no nokiviana : ny voalohany , ireo zokiny no niteny azy(and28), faharoa , izao tenin’i Saoly izao « Tsy tohanao ny  handeha hiady amin’io Filistina io , satria mbola zaza ianao , fa izy efa mpiady hatrizay niainany  » (and33). Ianao koa, raha te-hijoro ianao, tsarovy fa hisy foana ny mpanakivy . Manaova bemarenina ka mijoro!

2-Nitodika ny lasa izy .

Nambarany tamin’i Saoly mpitari-tafika fa i jehovah izay efa niady ho azy sy namonjy azy tany am-piandrasana ondry no hiady ho azy koa ka hanohitra an’i Goliata sy ny Filistina (and 31-37) .Ary lesona ho antsika izany : todiho ny zavatra efa nataon’ny Tompo taminao  dia havaozin’ny Tompo ny finoana sy ny fatokiana ao anatinao hiatrehanao ny adinao ankehitriny .

3-Nitana ny fahatsoran’ny finoany izy.

I Saoly dia nanavesatra azy tamin’ny fitaovam-piadiana  tsy nahazatra azy . Izy koa , tsy niala tamin’ny fahatsoran’ny fiadiany ety ivelany sy nitana mafy ny herim-pinoany tao anaty . Faka tahaka izany . Miorena tsara , aza miova!

« Raiso ny Tenin’ Andriamanitra » Boky faha- 3