Alatsinainy 30 Janoary 2023
ISAIA 65.17-21
Ny fanavaozan’Andriamanitra
1-Mitaona ny olona hifaly
Tontolo roa tsy afa-misaraka ,mahalavorary ny fiainana ny lanitra sy ny tany . Ny fahotana anefa no nitondra ny fahafatesana teto amin’izao tontolo iainantsika ankehitriny izao . Indro Andriamanitra manome toky sy mamelona fanantenana indray fa « mahary lanitra vaovao sy tany vaovao » Izy . Tontolo vaovao izay anjakan’ny fifaliana sy fiadanana ary fandriampahalemana mandrakizay no atolony , satria Andriamanitra no manjaka ao .Izany fampanantenan’Andriamanitra mpahary izany indrindra no mitaona ny olona hifaly satria fantatra sy hita fa tsy sanatria fampanantenana poakaty tsy akory .
2-Fanambinana ho an’izao tontolo izao
Andro maro sy taona ela iainana no fanambinana ambaran’ny Soratra masina eto .Iza tokoa moa no tsy maniry izany ? Fanampin’izany dia eo ihany koa ny fahavokarana. Ary araka ny voalaza eto « …ny mponina aza dia hahatratra zato taona vao hozonina« . Fampanantenana miantefa mivantana tamin’ny firenen’Israely avy any am-pahababoana moa izao teny izao ,ka dia hitantsika eto ny firesahana ny amin’ny mbola hisian’ny fahafatesana satria na fiainana feno fanambinana tokoa aza izany , dia mbola voafetra ihany .Tsarovy àry ry havana fa na feno fitahiana sy fanambinana tokoa aza ny fiainanao amin’izao ankehitriny izao ,dia manam-pahataperana izany fa ny ao amin’ilay toerana efa namboarin’i Jesoa no mandrakizay .
Fanontaniana :
Inona no ataonao hoe: fifaliana tena izy ?
Sampana Sekoly Alahady FOIBE FJKM