Alakamisy 06 Mey 2021
EZEKIELA 37.1-14
Atsangano ny maty !
Nentin’ny Fanahy nankany amin’ny lohasaha feno taolana i Ezekiela Mpaminany mba hanambarany ny sitrapony :
1-Ankatoavy izay rehetra lazain’ny Tompo
Nasain’ny Tompo niteny tamin’ireo taola-maina i Ezekiela araka izay nandidiany . Rehefa nanaraka izay rehetra nampanaovina azy ny mpaminany dia hitany fa nihetsika avy tamin’ny toerany avy ireo faty sady nitambatra ka velona indray . Izao no hevitry ny fahitana : ny taola-maina dia ny taranak’Israely rehetra izay efa anatin’ny famoizampo sy ny tsy fanantenana intsony satria babo. Nankato ny Tenin’ny Tompo ny mpaminany , na dia sarotra inoana aza ny asa nampanaovina azy . Mety hisy fotoana ahatsiarovantsika fa mahatahotra sy sarotra tanterahina ny iraka ampanaovin’ny Tompo . Ny fankatoavana ihany no anjarantsika . Ataovy izay asainy atao , ary matokia ! Hoy ny mpaminany : « Jehovah Tompo o , ianao no mahalala » (and3b)
2-Mijoroa amin’ny maha-mpaminany
Ny Fanahy izay tao amin’i Ezekiela no nahafahany nijoro teo anivon’ny lohasaha feno taola-maina , ary izany Fanahy Izany ihany no mbola nahafahany nijoro hitondra fampaherezana ho an’ny vahoaka kivy sy miraviravy tànana . Hery lehibe ahafahantsika mijoro ny Fanahy Masina ka mamelona ny fanantenan’ny olona kivy sy ketraka , na dia manoloana ny fahafatesana aza . Ny Fiangonana no mpaminany eo anivon’ny firenena ka tokony hijoro ho mpanangana ny maty anatrehan’ny fahalovana vokatry ny fahotana . Ampaherezo izay azom-pahoriana ka ambarao fa Andriamanitra dia efa nanangana an’i Jesoa Kristy tamin’ny maty . Resiny ny fahafatesana !
Fanontaniana :
Inona no iraka tokony hotanterahin’ny Fiangonana manoloana ny fihanaky ny areti-mandringana mahazo ny firenena?
Sampana Sekoly Alahady FOIBE FJKM