Alarobia 20 Janoary 2021
APOKALYPSY 1.1-8
» Izaho ny Alfa sy Omega, hoy ny Tompo Andriamanitra , ilay ankehitriny sy taloha ary ho avy , dia ny Tsitoha » (Apo 1.8)
Tao anaty vanim-potoana mamaivay sy niaretana ny mafy no teraka itony literatiora apokalyptika itony . Tanjon’ny mpanoratra amin’izany ny hampahery ny mpino manoloana ny ady mafiny . Eto dia asehon’i Jaona ny momba an’i Jesoa mba hampitraka ireo enjehina noho ny Aminy , ka hahafikitra amin’ny finoana Ambarany ary fa i Jesoa dia :
1-Tompon’ny tantara
« Izaho no alfa sy omega » : ny fampiasana ireo litera manomboka sy mamarana ny alfabeta grika ireo dia entina maneho fa tompon’ny tantara i Jesoa , ka ny zava-mitranga rehetra eo amin’ny vanimpotoana hatrany am-piandohana ka hatramin’ny fiafaran’izao tontolo izao dia eo ambany fifehezany sy fandaminany avokoa .Ao anatin’izany ny fanenjehana mitranga izay natao hitsapana ny finoana . Mahazo matoky ary ny mino fa an’i Jesoa ny teny farany .
2-Tompo Andriamanitra
« Ilay ankehitriny sy taloha ary ho avy » teo amin’ny fivavahana Jiosy tamin’ny andron’ny Grika dia niverimberina ny fampiasana an’io fomba fijery io ary fanazavana ny Anaran’Andriamanitra izay nisehoany tamin’i Mosesy (Eks 3.14) , entina manondro an’i Jesoa izy eto . Midika izany fa ny Tompo Andriamanitra tokoa i Jesoa ary iray ihany Izy sy ny Ray . Tsy diso safidy izay mifikitra amin’i Jesoa satria tena Andriamanitra Izy .
3-Tompon’ny hery
« ...dia ny Tsitoha » : Ny dikan’ny Tsitoha dia hoe : tompon’ny hery . Teo amin’ny tontolo Grika dia nanondroana ny Amperora io teny io . Eto dia seho fa ambony lavitra ny fahefan’ny Amperora ny hery sy fahefan’i Jesoa Kristy . Tsy miantehitra amin’ny hazo boboka izay mino Azy sy mialoka Aminy .
Fanontaniana :
Hatraiza ny fahatokianao an’i Jesoa?
Sampana Sekoly Alahady FOIBE FJKM