Alatsinainy 25 Mey 2020.
ASA 4.18-31
Olona manana ny Fanahy Masina
Notsaraina teo amin’ny Synedriona i Petera sy Jaona noho ny nanasitranany ilay lehilahy malemy.Norarana tsy nahazo mitory sy manambara ny amin’i Jesoa intsony izy ireo . Ny Fanahy kosa :
1-Mampijoro ny mpino
Mafy dia mafy ny fandrarana nahazo an’i Petera sy Jaona tsy hitory ny Anaran’i Jesoa Kristy intsony .Tandindomin-doza ny fiainany raha mbola mikiry manao izany izy ireo .Mazava anefa ny fanambarany : »Fa izahay tsy maintsy milaza izay zavatra efa hitany sy renay « .Ny olona manana ny Fanahy Masina dia tsy voasakana , tsy matahotra , miroso , mijoro hatrany hanambara an’i Jesoa .
2-Mandresy
Manoloana ny fanambarana nataon’i Petera sy i Jaona dia very hevitra ireo mpikambana tao amin’ny Synedriona .Tsy hitany izay antonjavatra « hampijaliana » azy ireo ary indrindra noho ny vahoaka resy lahatry ny asa notanterahina ka nankalaza an’Andriamanitra (and21).Vokany : nalefany izy ireo . Mariky ny fandresena ny fampihorohoroana izany.
3-Mampiankina amin’Andriamanitra
Rehefa tafaverina teo aminn’y mpianatra i Petera sy Jaona dia nitantara ny toe-javatra natrehany .Ny fahafantaran’ny mpianatra izany toe-javatra izay sy ny fisian’ny fanenjehana dia nanosika azy ireo hivavaka amin’Andriamanitra ka nametraka ny adiny sy ny asa fanompoana izay tsy maintsy hotanterahiny amin’Andriamanitra.
Fanontaniana:
Nahoana no misy mpino kristiana tsy sahy mijoro vavolombelona manoloana ny fanenjehana na ny sakana?
Sampana Sekoly Alahady FOIBE FJKM