Mois : février 2020

Diak sy lohol/Daty sy Toer

   FIHAONAMBEN’NY DIAKONA SY LOHOLONA

Daty :  22, 23, 24 Septambra 2020

  • Ny toerana sy ny Fitsinjarana ireo Synodamparitany miaraka aminy :

Toerana telo (03) no hanatanterahana ny fihaonambe ary nezahana ny hamaly ny tomban’ezak’ireo namonjy Fihaonambe farany :

  • BORIZINY-PORT BERGE,  ao amin’ny SP Sofia Andrefana (30):

Ireto ny laharan’ireo SP miaraka ho any :09, 12, 16, 17, 18, 20, 21, 26, 27, 29, 30, 34, 35.

  • AMBATONDRAZAKA , ao amin’ny SP Ambatondrazaka  Vaovao (05):

Ireto ny laharan’ireo SP miaraka ho any : 01, 02, 03, 05, 10, 13, 22, 24, 28, 31, 32.

  • MORONDAVA, ao amin’ny SP Fahazavan’Atsimo Andrefana  (36)

Ireto ny laharan’ireo SP miaraka ho any : 04, 06, 07, 08, 11, 14, 15, 19, 23, 25, 33, 36

Alarobia 19 Febroary 2020.

LIOKA 5.1-7

Ny baikon’i Jesoa Kristy

1-Ankatoavina amin’ny finoana (and5)

Rehefa tapitra ny fampianarana nataon’ i Jesoa dia nitodika tamin’i Simona Izy ka nanome baiko azy mba handatsaka ny haratony mba hahazoana hazandrano. Nisalasala i Simona satria ny alina izay fotoana maha-betsaka ny trondro aza tsy nahazo, mainka fa ny andro .Izany no nampisalasala an’i Simona satria ny maha- olona azy no tao an-tsainy . Soa ihany fa tsaroany ny nitenenan’i Jesoa , ka hoy izy hoe : « noho ny teninao » . Raiso amin’ny fatokiana sy fankatoavana ny tenin’i Jesoa Kristy , izay miantefa aminao . Aza mijery izay mety fahaizanao , aza misaina ny zava-misy akory fa raiso amin’ny finoana ny tenin’i Jesoa dia ho hitanao ny herin’izany amin’ny fiainanao

2-Ankatoavina hahazoana vokatra (and6)

Rehefa nanatanteraka ny baikon’i Jesoa Kristy i Simona dia nahazo hazandrano mihoatra noho izay zakan’ny haratony , ary voalaza mihitsy aza fa « nisy triatra ny haratony ». Vokatry ny fankatoavana ny tenin’i Jesoa Kristy dia nahazo vokatra tsara i Simona , eny mihoatra noho izay heveriny ho azo aza. Rehefa tsy miantehatra amin’ny herin’ny tenany intsony ny olona , fa miankina amin’ ny fankatoavana ny tenin’i Jesoa Kristy dia hahazo vokatra tsara eo amin’ny asa ataony izany olona izany .Tsinotsinona ny fahaizan’ny olona tsy misy finoana ny tenin’i Jesoa Kristy , mampahavokatra ny asan’ny olona izay mankato ny teniny .

Fanontaniana:

Inona no efa azonao vokatry ny fankatoavana ny tenin’i Kristy ?

Sampana Sekoly Alahady FOIBE FJKM

Fahaiza-mitantana

MAHAY MITARIKA FIVORIANA VE ISIKA ?

Mialoha ny fitarihana ny fivoriana, dia misy zavatra tsy maintsy homanina mialoha. Tsy misy azo atao maivana sy kitoatoa ireto dingana horesahana manaraka ireto, dia ho fivoriana lavorary no hisy, ary hahafaly ny mpivory ny mandray anjara amin’izany.

FANOMANANA ( 50%)

Misy fanomanana ara-tsaina : inona ny lahadinika hivoriana, inona ny tanjona hahatongavana, inona ny drafitra hitondrana ny fivoriana. Misy koa ny fanomanana ara-pitaovana : ny toerana hivoriana, ny fitaovana hampiasaina, ny fandraisana ny mpivory, ny tahirin-kevitra ilaina. Vita ny 50% amin’ny asa, rehefa ity fanomanana ity no voalamina tsara. Ny fivoriana no lavorary tsara, dia ny fanomanana ara-tsaina sy ara-pitaovana no mipetrapetraka tsara.

FIVORIANA ( 20%)

Raha hitarika fivoriana isika, dia aoka tsy ho mpivory hamoaka sosokevitra, fa ho mpitarika hatrany. Ireto ny zavatra miandry ny mpitarika fivoriana : mitarika ny mpivory ho any amin’ny tanjon’ny fivoriana, manana ny toetra takina amin’ny mpitarika fivoriana, mitarika ny fivoriana araka ny Fitsipika, mitana ny fe-potoana voatokana hivoriana, mibanjina hatrany ny vokatra. Araho ary aza misy asiana latsaka ireo zavatra voalaza ireo, dia ho mpitarika fivoriana mahay isika.

Fahadisoan-kevitra lehibe eo amin’ny mpitarika ny miziriziry hampanaiky izay hevitra arosony hodinihan’ny mpivory. Raha nantsoina hivory ny rehetra, ary hanapa-kevitra no anton’izany fa tsy fampitam-baovao fotsiny, dia avela ny mpivory hikaroka izay hanatsarana io tolokevitra nomena hodinihiny io, fa ny mitana ny fitarihana voalaza teo aloha kosa no anjaran’ny mpitarika. Vita ny 20% amin’ny asa rehefa toy izany ny fitarihana ny fivoriana.

TATITRA (30%)

Raha ela indrindra, dia 36 ora aorian’ny fivoriana, no tsara hivoahan’ny Tatitra. Mandritra izany fotoana izany no tsara ny fitadidiana sy ny fahatsiarovana. Aorian’izay, dia efa mamotsotra ny fitadidiana, ary manova mihitsy izay tapaka aza io fitadidiana mamotsotra io. Satria izay naharesy lahatra ny mpitantsoratra ihany no tavela maharitra ao an-tsainy amin’izay fotoana izay. Vita ny 30% amin’ny asa miandry, rehefa voatatitra ny asa notakin’ny fivoriana.

A.Zaka, Mpitandrina

SP 12 /FJKM Andrainarivo F.

Sampana Tanora Kristiana Zokiny

FANASANA

Asaina am-pitiavana ianao mba hiara-hidera sy hisaotra an’ Andriamanitra ary hitondra amam-bavaka ny vehivavy kristiana manana andraikitra samihafa eto amin’ny firenena sy ny fiangonana .

Izany dia hatao ao amin’ny FJKM ANDRAINARIVO FAHASOAVANA ny Alahady 08 Martsa 2020 ,amin’ny 9ora maraina .

Ramatoa ANDRIAMAHAZOSOA Esther ,Mpitandrina , vadin’ny Filohan’ny FJKM no hitoriteny .

Maniry ny fahatongavanao ho Voninahitr’Andriamanitra.

Talata 18 Febroary 2020.

1 TIMOTY 1.12-16

Mahatoky i Jesoa Kristy

1-Manendry mpanompo (and12)

Velom-pisaorana an’i Jesoa Kristy i Paoly Apostoly, satria isan’ny voatendry ho mpanompony hanao ny asany , na dia efa isan’ny olona mpanao ratsy aza teo aloha mpiteny ratsy , mpanenjika ny fiangonana , mpampahory ny kristiana noho ny tsy fahalalana an’i Kristy . Rehefa tonga mpanompon’i Kristy kosa i Paoly , dia tsaroany fa nomba azy i Kristy ka tonga mpanompo azo antoka tamin’ny asan’Andriamanitra izy . Araka izany , na dia mpanao ratsy aza taloha rehefa tonga olom-boafidy na voatendry amin’ny asa fanompoana an’ Andriamanitra , dia mahatsiaro mandrakariva fa momba azy Andriamanitra ka tonga olona azo antoka sy mahavita tsara ny asan’ Andriamanitra izy.

2-Mamindra fo amin’ny mpanompony (and13,16)

Asehon’i Paoly , fa izy no lohan’ny mpanota , kanefa noho ny fahasoavan’i Jesoa Kristy , dia isan’ny olona izay nandray famindrampo izy ka notendreny ho mpanompo noho ny finoana Azy. Famindrampo no mahatonga ny olona ho mpanompon’i Kristy .Ary izany no mitarika azy hanompo amin’ny fahatokiana tanteraka . Noho izany , izay rehetra mahatsiaro fa mpanota ka tamin’ny famindrampo no nahatonga azy ho mpanompon’i Kristy , dia azo antoka amin’ny asa fanompoana izy , ary fianarana ho an’ny hafa hahatonga azy ireo handova ny fiainana mandrakizay .

Fanontaniana:

Azo antoka amin’ny asa fanompoana ve ianao ? Inona no antony ?

Sampana Sekoly Alahady FOIBE FJKM

Alatsinainy 17 Febroary 2020.

JOSOA 1.1-9

Ny olona manana ny Tenin’Andriamanitra

1-Mahita fandresena

« Tsy hisy olona hahajanona eo anoloanao… » (and5)

Voalaza eto fa tsy hisy hahatohitra an’i Josoa mihitsy amin’ny ady hatao ho fakana ny tany Kanana , raha mitana tsara ny voalazan’ny bokin’ny lalàna izy . Antoka hahazoana fandresena amin’ny ady rehetra atao ny fankatoavana ny lalàna sy ny didin’ Andriamanitra. Koa raha te- hahita fahombiazana , fandresena amin’ny ady rehetra ataony ny mpanompon’ Andriamanitra dia tsy maintsy manome lanja ny fankatoavana ny didin’ Andriamanitra izy .Ary ny fandresena ao amin’i Jesoa Kristy no fandresena lehibe indrindra omen’ Andriamanitra ny mpino sy mpankato ny sitrapony.

2-Mahazo fanambinana (and 8)

Rehefa mandinika tsy tapaka ny Tenin’ Andriamanitra sy manaiky ho tarihany i Josoa dia mitondra hery hanampy azy amin’ny ady ataony izany. Hery mitarika azy handroso hatrany fa tsy hihemotra ny teny fampanantenana sy ny fananarana avy amin’Andriamanitra . Ka ny fanambinana amin’izay fotoana izay dia ny ady atao miaraka amin’ Andriamanitra . Ary izany ny adin’ny kristiana , ady miaraka amin’ny herin’ny fampanantenam-pamonjena sy fiainana ho amin’i Jesoa Kristy . Noho izany , tsy tokony hisy kristiana hihemotra amin’ny iraka nampanaovin’ Andriamanitra azy satria tsy mandeha irery fa miaraka amin’ny fanambinan’ny Tompo .

Fanontaniana:

Iainanao ve ny vokatry ny fankatoavana ny didin’ny Tompo ?

Sampana Sekoly Alahady FOIBE FJKM

Alahady 16 Febroary 2020.

1 PETERA 1.22-25

Ny tenin’ny Filazantsara

1-Manadio ny fo

 » …nodiovinareo ny fanahinareo… » (and 22). Ny fanadiovana ny fo izay itoeran’ny fitiavana dia midika ho fanapotehana ireo fironana amin’ny fitiavan-tena sy ny fahalotoana rehetra. Ny fanekena hankato sy hiaina ny fahamarinana araka ny voalazan’ny Filazantsara ihany anefa no nahatanteraka izany. Koa ny fitiavana araka an’Andriamanitra dia tsy izay mety amin’ny olona akory fa araka izay mety amin’ Andriamanitra . Andriamanitra ,fa Izy irery ihany no afaka mampianatra ny olona hahay hitia ny hafa amin’ny fahamarinana, amin’ny fitiavana tsy misy fihatsarambelatsihy .Koa diovy amin’ny Filazantsara ny fonao mba hahafahanao mitia ny hafa amin’ny fahamarinana.

2-Mahary ho olom-baovao

« ...teraka indray ianareo… » (and 23) .Tsy maintsy hateraka indray ny olona mba hahatonga azy ho olom-baovao mahay mitia ny hafa amim-pirahalahiana tanteraka. Ny tanjon’ny fahaterahana indray izany dia ny fitiavana ny hafa .Tsy avy amin’izao tontolo izao anefa izany fanavaozana izany fa avy amin’Andriamanitra , araka ny voasoratra hoe: »tamin’ny tsy mety lo » dia ny Filazantsara izany . Izay nateraky ny Filazantsara ihany no velona amin’ny fitiavana ny hafa. Koa tsy vitan’ny ezaka ataon’ny olona izany fa asan’ny tenin’ny Filazantsatra , fahariana ho olombaovao izany.

Fanontaniana:

Efa madio fo sy manam-pitiavana ny hafa ve ianao?

Sampana Sekoly Alahady FOIBE FJKM

Sabotsy 15 Febroary 2020.

SALAMO 33.1-10

Ny maha-Izy Azy ny Tenin’Andriamanitra

Manana anjara toerana teo amin’ny fanatanterahan’ Andriamanitra ny asany ny Teniny .

1-Teny mahitsy .

« Fa mahitsy ny Tenin’i Jehovah« , izay azo adika hoe: marina , azo antoka , azo iankinana.Niseho tamin’ny fanatanterahan’ Andriamanitra ny asany izany :asa marina , asa tsara , asa mahakasika ny fiainan’ny zanak’olombelona. Misitraka ny famindrampon’Andriamanitra sy ny fahatsarany tokoa ny mananaina rehetra.

2-Teny manankery

Ampahatsiahivina amin’izao salamo izao ny asan’ny Tenin’ Andriamanitra tamin’ny fahariana izao tontolo izao . Teny miasa , teny mpahary ny Tenin’ Andriamanitra .Teny nampiova ny zavatra rehetra .Teny manankery sy manam-pahefana amin’ny zava-boahary rehetra izany. Tsarovy mampandresy anao amin’ny fotoana sarotra ny Tenin’Andriamanitra raha mino marina ianao.

3-Teny mandresy lahatra

Resy lahatry ny asan’ny Tenin’ Andriamanitra ny mpanompony .Mitaona ny olo-marina hidera an’Andriamanitra izy .Olo-marina afaka hiatrika ny Voninahitr’Andriamanitra , afaka mitoetra ao amin’ny fitoerany masina . Rehefa izany koa anefa dia mitaona ny olona rehetra mahita ny asan’Andriamanitra mba hatahotra an’ Andriamanitra izy .Izany dia tahotra ho fanajana sy fanomezana voninahitra Azy marina tokoa.

Fanontaniana:

Mitondra inona amin’ny finoana ny fahamarinan’ny Tenin’ Andriamanitra?

Sampana Sekoly Alahady FOIBE FJKM

Zoma 14 Febroary 2020.

ASA 20.32-35

Ny tenin’ny Fahasoavana

Mananatra ny loholon’ny Fiangonana tao Efesosy i Paoly Apostoly .Handao izy , faniriany mba hisy vokany teo amin’ny fiainan’izy ireo ny teny izay notoriany.

1-Teny mampandroso

Ny hoe: »mampandroso » eto dia ilazana ny fiorenana sy fandrosoana tsara amin’ny finoana. Nanao ny ainy tsy ho zavatra i Paoly Apostoly, nanatanteraka ny asa fanompoana nanirahan’ny Tompo azy dia ny fitoriana ny Filazantsara . Raha handeha izy dia fantany ny fisian’ireo sokajin’olona mitady hampivily na hampiala ny olona amin’ny finoana marina. Mananatra noho izany izy fa ny Tenin’ Andriamanitra notoriany sy nampianariny irery ihany no hahafahan’ny olona mijoro sy miorina amin’ny finoana an’i Jesoa Kristy . Mila mianatra sy mandray ilay tenin’ny fahasoavana mandrakariva ny Tompo.

2-Teny hahafantarana ny anjara lovan’ny mpino

Ny hahafahan’ny olona mitombo sy miorina amin’ny finoana dia ny fahafantarany fa Andriamanitra dia manatanteraka hatrany ny Teniny . Fampanantenana ambaran’ny Tenin’Andriamanitra ho an’ny mino Azy ny fisian’ny anjara lova manokana . Valim-pitia omeny ho an’izay rehetra mahajoro sy miorina tsara amin’ny finoana , na toa inona toe-javatra atrehina teo amin’ny fanompoana sy ny fanarahana Azy . Rehefa mandray ny Tenin’ Andriamanitra ny olona dia mahafantatra izany ka tsy hivadika amin’ny finoana marina.

Fanontaniana :

Fantatrao ve ny anjara lova voaoman’ Andriamanitra anao ? Inona no tokony nataonao mba handraisana izany ?

Sampana Sekoly Alahady FOIBE FJKM