Alarobia 20 Martsa 2019.
Fandalinana ny Boky 1 Mpanjaka
1 Mpanjaka 15.9-24
Takila maloka ila ity novakintsika ity:
1-Etsy andaniny :
Maharavo ny fandehanan’i Asa tamin’izay mahitsy teo imason’ny Tompo. Taorian’ireo tantara mahamenatra tamin’i Solomona sy i Rehoboama ary i Abia dia tena mahafaly ny mamaky ireo and 11-13. Ny tenan’i Asa nanao ny tsara , ny olona nanao ratsy nofaiziny , ny sampin-drainy nariany . Ary mahavariana , na ny reniny aza sahiny naetry tsy ho andriambavy satria efa nanao sampy. Hafanampo maha-te-hidera izany . Ary moa tsy mba irintsika ny holazaina toa azy koa hoe: « mahitsy teo imason’i Jehovah ny fon’i Asa tamin’ny andro rehetra niainany » (and 24) .
2-Tetsy ankilany :
Mampalahelo ny fifanarahany tamin’i Beni-hadada, mpanjakan’i Syria. Mampalahelo ny mamaky hoe: « Ary Asa naka ny volafotsy sy ny volamena rehetra izay sisa tamin’ny rakitry ny tranon’i Jehovah sy tamin’ny rakitry ny tranon’ny mpanjaka, ka natolony teo an-tànan’ny mpanompony , ary Asa mpanjaka nampanatitra azy tany amin’i Beni-hadada » (and 18) . Ary izany dia noho ny tahotra an’i Basa, mpanjakan’Israely izay namely azy. Ianao koa ve mba alaim-panahy hitady fiarovana hafa toy izany rehefa poritra noho ny ataon’ny fahavalo ka na dia ny fanaka masina aza dia afoy ho azy ?
« Raiso ny Tenin’ Andriamanitra » Boky faha- 3