SP ALAOTRA CHROME / Talemparitra vaovao

  SP ALAOTRA CHROME (SP 03)  / SEKOLY FJKM

Nandray Talem-paritra vaovao

Natolotra araka ny fomban’ny fiangonana ny Sabotsy 10 Novambra 2018 tao amin’ny FJKM Amparafaravola ho Talen’ny Fari-piadidian’ny Fampianarana ao Alaotra Chrome SP 03 Andriamatoa  ANDRIAMIHAJA Mahaleo Josoa Ernest, Mpitandrina.

Manana ny maripahaizana Master II en Théologie ity mpitandrina ity sady mahay tenim-pirenena telo hafa ankoatry ny teny frantsay. Talen’ny Sekoly FJKM La Providence ao Brieville Distrikan’Amparafaravola ihany koa izy izao voatendry ho Talem-paritra izao ka mahafantatra tsara ny fiainan’ny Sekoly FJKM any amin’iny faritra Alaotra Chrome iny.

Izany indrindra no nilazany fa laharam-pahamehana ny fananganana Sekoly FJKM isaky ny Kaomina misy Fitandremana FJKM, manaraka izany ny fanatsarana ny fahaiza-manaon’ny mpampianatra amin’ny alalan’ny fanofanana azy ireo, ary farany ny fikarakarana ara-panjakana ny taratasin’ireo fotodrafitrasa ireo amin’ny maha fananan’ny FJKM azy ireo. Tsy adinoina koa ny fiainam-panahin’ny mpiasa sy fijerena loharanom-bolamaharitra hiatrehana ny fahasahiranana fahita any ambanivolo.

Miisa 14 ankehitriny ny Sekoly FJKM anatin’ny faritra Alaotra Chrome ka nahazoana vokatra 100% avokoa tamin’ny fanadinana CEPE teo, 80% teo amin’ny BEPC ary 56% ny Bacc. Nanatanteraka izany fanolorana Talem-paritra vaovao izany Andriamatoa RANDRIAMAMONJISOA Georges Henri, Filoha Lefitra Laika ao amin’ny Biraon’ny Mpiandraikitra Foibe sy Andriamatoa RAHARISON Ny Hery Zo, Tomponandraikitra ao amin’ny Foibe Fitondran-tsekoly FJKM sady Talen’ny FPMP Mangoro Moramanga. Nandray ny Talem-paritra vaovao kosa ny solontenan’ny Sekoly FJKM Alaotra Chrome sy ny Synodamparitany manontolo tarihin’ny Prezidà Synodaly Andriamatoa RALAIARIVELO Fanomezantsoa, Mpitandrina.

Ity fotoana ity ihany koa no nitsofan-drano sy nanolorana maripankasitrahana sy fanomezana samihafa ho an’ny Talem-paritra teo aloha.

NIRINA, SF

Perikopa

Jona: Meteza hofenoina ny Fanahy Masina

| | 23. Alah I man Trin / SVM Foibe
Mik 3.6-8 / Lio 1.8-17 / Jak 4.1-10

| | 30. Alah II man Trinite
Isa 59.17-21/ Mar 13. 1-11 / Rom 8.5-11