Tatitra / Fanokafana ny Taompiasana 2018.
Tontosa soamatsara ny Alahady 21 Janoary 2018 , nanomboka tamin’ny 10 ora sy sasany maraina teo amin’ny Kianjaben’Imahamasina ny Fanompoampivavahana fitondrana am-bavaka ny Filohan’ny FJKM mivady sy ny ankohonany ary ny Taom-piasana 2018. Feno hipoka ny kianja na dia nijojo tsy nanam-pijanonana aza ny orana teto an-drenivohitra .
Nitarika ny fotoana , ny Mpitandrina Zarazaka Jean Louis, Filoha Mpanampin’ny BMF /FJKM . Namaky ny Teny avy ao amin’ny Soratra masina sy nitari-bavaka ireo mpikambana ao amin’ny Birao Foibe sy ny Mpanatanteraka .
Nitory ny Tenin’ Andriamanitra kosa , ny Mpitandrina Andriamampianina Zaka Hary Masy ,Mpanolotsaina BMF FJKM izay nalaina avy ao amin’ny bokin’ny Joda and 24-25 : Jesoa no miaro anao tsy ho tafitohina ary Jesoa no mametraka anao tsy hanan-tsiny anoloan’ny voninahiny . .
Nilaza ny vaovao tsara ho fantatra ny Sekretera Jeneraly :
Hisy ny Synodam-pinoana hotanterahina amin’ity taona 2018 ity : 15-18 Mey 2018 . Ny fankalazana an’ Andriamanitra noho ny ivon’ny faha- 50 taona kosa dia hatao any Toamasina ,ny volana Aogositra , sy ny famaranana eto Antananarivo . Hampiavaka ihany koa ity taona ity ny fihaonamben’ny zanaky ny Mpitandrina (26-28 Sept ) , fiofanan’ny Katekista , ny SAFIF , ny Diakona .
Nandray anjara fitenenana ny Filohan’ny Komitin’ny faha-50 taona FJKM, Andriamatoa Ravalomanana Marc izay niarahaba ny rehetra sady nanentana no nanome toky ny vahoaka kristiana , fa ho vita ny trano lehibe handraisana ireo mpianatra Mpitandrina ho fanampiny amin’ny efa misy , tsangambaton’ny fankalazana .
Nandray fitenenana ihany koa ny Filohampirenena Rajaonarimampianina Hery ka niarahaba sy nirary soa ny Filohan’ny FJKM mianakavy miatrika ny « famontosana Filazantsara ny Nosy Madagasikara » . Naneho ny fahavononany izy hanampy izany tetikasa lehibe izany .
Nandray fitenenana farany ny Filohan’ny FJKM , ny Mpitandrina Irako Andriamahazosoa Ammi .Nampahery sy nampionona ny vahoaka izy noho ny fandalovan’ny rivodoza AVA farany teo . Nisaotra sy nankasitraka ny mpino FJKM noho ny faharetana sy fiaretana izao ora-mikija izao izay tsy nahasakana azy ireo tsy hiombona tao anatin’ny Fanompoampivavahana.
Hafatra miisa 10 no nomeny hosaintsain’ny mpino FJKM.1-Ivelomy ny taon-jobily (Lev 25.11).2-Karakarao ny tantara (Eks17.14).3-Tohizo ny Tafika masina .4-Mazotoa mifandray amin’ny Soratra masina ( Jao 15 ).5-Ny Mpandray : tongava manatrika ankatoka .6-Tsarovy ny synodam-pinoana.7-Andao hidera ny Tompo .8-Mahereza manefa ny adidy.9-Mijoroa ho fanasin’ny tany .10- Aza menatra ny hanao politika (Estera 8.6).
Antso atao amin’ny kristiana mahatsiaro ny antson’ Andriamanitra mba hirotsaka handray andraikitra eto amin’ny firenena , mba hanao ny adidy handeha hifidy izay olona matahotra an’ Andriamanitra Ray, Zanaka ary Fanahy Masina . Tsy hanaiky hozarazarain’ny loko politika . Fa isika rehetra dia mba ho tena kristiana velona , kristiana vanona ary kristiana vonona .
Ny tolakandro dia mbola nisy ny fampisehoana nataon’ireo mpanankanto voafantina niara-nidera sy nanome voninahitra ny Tompo .Ny lahateny dia nofaranana tamin’ny Fanokafana tamin’ny fomba ofisialy ny Taompiasana 2018.Sary teny Imahamasina ( 21 01 18)
An’ Andriamanitra irery ny Voninahitra .
Nangonin- dRamatoa Sahondra Rabelison