Mois : juin 2020

Sabotsy 06 Jiona 2020.

ASAN’NY APOSTOLY 4.32-37

Kristiana miaina amin’ny fahasoavana

Rehefa nitory an’i Jesoa ny kristiana tamin’ny taonjato voalohany dia ambaran’i Lioka fa « …fahasoavana no tao amin’izy rehetra » (and33) .Fiainana feno fahasoavana no nentin’izy ireo nitory an’i Jesoa Kristy .

1-Kristiana niray fo sy saina (and32)

« Ary niray fo sy fanahy ny olona rehetra izay nino ». Nasehon’ireo kristiana voalohany tamin’ny firaisana tao amin’i Jesoa Kristy .Tena lavitry ny fiainana samy naka ho azy izy ireo , ary tena hita teo amin’izy ireo ny voalazan’i Paoly hoe : »saina iray sy vava iray no hiarahanareo mankalaza an’ Andriamanitra,Rain’i Jesoa Kristy » (Rom 15.6). Anisan’izay nahatonga ny fahombiazan’ny fampielezana ny Filazantsara ity firaisana teo amin’ny kristiana voalohany ity. Zava-tsoa tsara fianatra tamin’izy ireo ho antsika taranaka ankehitriny izany .Rehefa tena hita eo amin’ny samy mpitory tokoa ny firaisana , fihavanana araka an’Andriamanitra dia ho mora ny mitaona ny hafa handray izany.

2-Kristiana manaiky hitovy (and34-35)

Ny fivarotana ny zavatra rehetra izay nananana sy ny fametrahana ny vidin’izany teo amin’ny tongotry ny Apostoly dia mariky ny toe-tsaina nanaiky hitovy teo amin’ny kristiana voalohany . Mba tsy hisy tombo sy hala , mba tsy hisy manana kokoa sy mahantra kokoa , dia tonga fomba fiaina teo aminy ny fitoviana tamin’ny endrika hita maso .Toe-tsaina efa lasa lavitra amin’ny finoana no mahavita toy izao .Mahafoy izay mety ho tombony manokana mba hitoviana amin’ny rahalahy mpiara-mitory .Mitovy ny fari-piainana ka afaka nifanohana.

Fanontaniana:

Mbola azo aseho ho hita maso ve ny fitoviana ao amin’i Jesoa Kristy ? Ahoana no fomba hahatanteraka izany?

Sampana Sekoly Alahady FOIBE FJKM

Zoma 05 Jiona 2020.

DEOTERONOMIA 5.16.19

Ireo didy mampiadana

Ny bokin’ny Deoteronomia no boky ahitana fanazavana bebe kokoa momba ny didy nomen’ Andriamanitra an’i Mosesy .Araka ny fandinihan’ny mpahay Soratra Masina dia ahitana taratra ny asan’ny olona mpahay fiaraha-monina ny boky .Amin’ny mpanoratra ny didin’ Andriamanitra dia:

1-Mampiadana eto an-tany (and16)

« …mba ho maro andro ianao , ary mba hahita soa any amin’ny tany izay omen’i Jehovah Andriamanitrao ho anao ». Ny fanarahana sy fanatanterahana ny didin’Andriamanitra no miantoka ny fiadanana eo amin’ny tany izay nomen’Andriamanitra ny Zanak’ Israely . Tsy vitan’ny hoe : miadana fotsiny fa tena loharanom-pitahiana ho azy ireo mihitsy izany .Tsy mahafaty antoka araka izany ny manaja ray sy reny . Voka-tsoa azo tsapain-tànana no azo avy amin’izany .Raha tiantsika ny hanam-piadanana sy hotahiana eto amin’ity tany nomen’ Andriamanitra antsika Malagasy ity dia andeha hotandremana tsara ny didiny rehetra.

2-Manampy amin’ny fifehezantena (and17-19)

Anisan’ny loharanon’ny korontana eo amin’ny fiaraha-monina ny tsy fahaiza-mifehy tena.Tsy mahay mifehy tena izay mangalatra , mijangajanga, mitsiriritra sns… Nomen’ Andriamanitra araka izany ny didy mba hifehezana ny tena tsy hanao izany .Raha vao miresaka didy anefa isika , dia izao no tokony hotsaroana mandrakariva : tsy afaka hahavita hankato izany isika raha tsy ao amin’i Jesoa izay nahatandrina tsara ny didy rehetra. Jesoa no afaka tena hanampy antsika amin’ny fanantanterahana izay takian’ny didin’ Andriamanitra amintsika. Manome hery ho amin’izany rahateo Izy .

Fanontaniana:

Inona no antony nanomezan’Andriamanitra ny didy folo ?

Sampana Sekoly Alahady FOIBE FJKM

Alahadin’ny Sekoly 2020.

FANDAHARANA IOMBONANA

MIHAVANA AO AMIN’NY TOMPO

1-Hira faneva faha-200 Taonan’ny Sekoly FJKM

2-Fiarahabana Apostolika

Ho amin’ny fanahinao anie ny fahasoavan’i Jesoa Kristy Tompo (Fil 4.23)

3-Fanatrehan’ Andriamanitra

Salamo 111.1-9

Hira 170

Vavaka fiderana

4-Ny Tenin’Andriamanitra

Hira 210.1-5

Vavaka fangatahana ny Fanahy Masina

Vakiteny : Lev 19.16-18/ Mar 9.33-50/ Fil 2.1-4

Hira 205.4

TORITENY

5-Vavaka setrin’ny Tenin’Andriamanitra sy Fifonana

Hira 447.2-3

6-Famelankeloka

Teny famelankeloka : Jak 4.9-10

sambatra ny olona izay voavela ny helony … ( Sal 32.1,2)

Hira HF 26.1-2

7-Fanekempinoana (Biblika)

8-Asa avvolombelona

9-Vavaka fangatahana (ny FJKM , ny Sekoly, ny asa fanabeazana ataon’ny fiang)

10- Asan’ny Fiangonana

Raharaha (Fiang sy Sekoly)

HAFATRA

Rakitra : Hira 787 na hiran’ny Sekoly

Vavaka fanolorana ny Rakitra

11-Famaranana

Hira 486.4-5

TSODRANO

Ho an’Andriamanitra irery ny Voninahitra

Trinite Masina

HAFATRA

Avy amin’ny FOIBE  FITONDRAN-TSEKOLY.

Ry Havana malala ao amin’nyTompo .

Ho aminareo  rehetra anie ny fahasoavan ‘ i Jesoa Kristy sy ny fitiavan’ Andriamanitra ary ny firaisana amin’ny  Fanahy Masina .Amena.

Galatiana 13.14

Miarahaba  antsika rehetra indrindra ny fianakaviamben’ny Sekoly FJKM rehetra eto Madagasikara nahatratra izao Alahady natokana hitondrana am-bavaka sy ho fanohanana ny Sekoly izao. Ary misaotra ny Prezidà Synodaly , ny Mpitandrina rehetra , ianareo biraon’ny Fiangonana , ny Fiangonana manontolo manokana izao fotoana ho an’ny Sekoly FJKM manomboka hatraty amin’ny Foibe Fitondrantsekoly , ny FPMP , ny Sekoly tsirairay.

Ny Sekoly FJKM dia endriky ny fijoroana vavolombelona ataon’ny Fiangonana . Izany no nahatonga ny teny Fanevan’ny Sekoly manao hoe: « Ary ianareo dia vavolombelona manambara  » Jao 15.27a

Koa manentana antsika FJKM rehetra mba hitodika amin’ireo Sekolintsika ary hatoky azy ireny mba ho fijoroantsika ho vavlombelon’iJesoa risty Tompontsika .

Misaotra ny Talem-paritra , ireo Talen-tSekoly ary ireo Mpampianatra sy ny mpiara-miasa rehetra ao aminn’y Sekoly FJKM noho ieo ezaka lehibe nataonareo hampandrosoana ny Sekoly na dia ao anatin ‘ny fahasarotana aza . Hoy ny Tompo : « Fa naharitra amin’ny fanahy iray ianareo ma mray ho hiara-miezaka hampandroso ny fonoana ny Filazantsara » Fil 1.27b

1-Mandalo fotoan-tsarotra isika ankehitriny noho izao Covid-19 izao . Manoloana  izany dia mampahery   ny Sekoly FJKM rehetra , ireo Talen-tSekoly , ireo Mpampianatra. Mahereza mivavaka fa momba antsika hatrany Andriamanitra .

2-Mikorontana avokoa ny fandaharam-pianarana  rehetra  ary misy aza ireo voatery nofoanana  toy ny Andron’ny Sekoly. Ny fanadinana andrana    dia samy hanao izay tandrifiny . Ny fanadinam-panjakana kosa dia miandry ny fandaminan’ny fanjakana isika .

3-Aoka mba hampahafantatra  ireo Ray amandreny  ny zava-misy ao amin’ny Sekoly ny Talen-tSekoly  ka handray fanapahankevitra  iombonana eo amin’ny saram-panarana.

Farany , ry Havana ,mahereza ao  amin’ny Tompo  isika rehetra ary hifampivavaka mandrakariva.

Hitahy anareo anie ny Tompo  . “ mba hofenoina ny fahalalana tsara ny sitrapony ianareo amin’ny fahendrena sy ny fahazavan-tsaina rehetra avy amin’ny Fanahy  ; mba handehananareo miendrika ny Tompo , hanaovana ny sitrapony amin’ny zavatra rehetra, dia mahavokatra amin’ny asa tsara rehetra sady mitombo aminn’y fahalalana tsara an’Andriamanitra” (Kol 1.9-10)

Ho an’ Andriamanitra irery ny Voninahitra

Ny Tonian’ny Departemantan’ny Sekoly FJKM

RAKOTONDRANAIVO Domoina            

Alakamisy 04 Jiona 2020.

MIHAVANA  AMIN’NY  TOMPO

1 TESALONIANA 3.9-13

Ny  asan’ Andriamanira eo  amin’ny Fiangonana

Ny  Fiangonana tao Tesalonika no  anisan’ny Fiangonana nahazo  sitraka  manokana  tamin’i Paoly  Apostoly   raha jerena ny asa sorany.Amin’i Paoly  , niasa ao  tamin’io  fiangonana io  ny Tompo  ka :

1-Nampitombo  sy nampandroso  ny fitiavana (and12)

Asan’ Andriamanitra araka izao fampianarana izao ny mampitombo ny fitiavana . Avy amin’Andriamanitra mantsy ny fitiavana. Izy no afaka mampitombo  izany ao  amin’ny olona . Izay manana  fitiavana sy manome fitiavana no afaka mampitombo  ny fitiavana. Hita  avy amin’izao  fampianaran’I Paoly  izao   fa rehefa ampitomboin’Andriamanitra ny fitiavana dia mandroso ny   fitiavana  an’  Andriamanitra sy ny hafa . Rehefa mitombo  sy mandroso  ny fitiavana ao  amin’ny olona vao hahatratra ny olona rehetra  izany  fitiavana izany  . Navelan’ Andriamanitra nitombo  tao Aminy  ny fitiavan’Andriamanitra ka nahatonga Azy  nandroso  be tamin’ny  fitiavana ny olona rehetra .

2-Nanampy  ny mino  tsy hanan-tsiny  (and13)

Rehefa  mifankatia tokoa ny olona rehetra ka mihavana tsara mba tsy hanan-tsiny  eo anatrehan’Andriamanitra .Io fanampian’Andriamanitra  ny mino  io  dia toy  ny  hery  manentana azy  hahajoroany tsara  ho  vavolombelon’I Jesoa Kristy  amin’ny fitiavana.Rehefa samy  mitombo  ao  amin’ny olona ny fitiavan’Andriamanitra dia hahay  mifankatia izy, ary rehefa mifankatia tsara  izy  dia voatahiry ny fahamasinana.Noho  io fanampian’Andriamanitra io koa dia maharitra mandra-piavin’I Jesoa  ny fifankatiavana. Meteza  omen’ Andriamanitra fitiavana mba haharetan’ny fahamasinana.

Fanontaniana:

Mbola tena miasa eo  amin’ny Fiangonana  ve Andriamanitra ankehitriny  ? Asa toy  ny ahoana no ataony ?

Sampana Sekoly Alahady FOIBE FJKM

Alarobia 03 Jiona 2020.

OHABOLANA 3.27-30

Ny asa soa kristiana

Anisan’ny manampy be dia be hananana fahendrena avy amin’Andriamanitra ny famakiana ny bokin’ny Ohabolana .Boky manome toromarika hendry izy . Amin’ny fifandraisana amin’ny hafa dia ireto no tsy tokony hohadinoina .

1-Mizara fanomezam-pahasoavana (and27,28)

Misy nomen’Andriamanitra tombom-pahasoavana eto amin’izao tontolo izao . Mazava ny antony nanomezan’Andriamanitra izany , mba hozaraina amin’ny hafa izay ao anatin’ny fahasahiranana.Tsy azo fihinina ny tombom-pahasoavana avy amin’ny Tompo fa natao hozaraina izany ho enti-manasoa ny hafa , indrindra fa ireo sahirana. Raha misy amintsika nahazo tombony manokana avy amin’ny Tompo dia tena tombony lehibe ho antsika izany satria ho tànan’Andriamanitra miahy ireo madinika sy sahirana isika. Raha teto amin’izao tontolo izao i Jesoa , dia tena niezaka nizara ny fahasoavan’Andriamanitra tamin’izay rehetra nifanerasera taminy.Izy no anisan’ny nanao soa indrindra ny mpiara-belona taminy.

2-Tsy manao ratsy olona (and 29,30)

Anisan’ny asa soa araka izao fampianaran’ny bokin’ ny ohabolana izao ny tsy fanaovana ratsy olona . Ny kristiana dia tsy mahazo mamorona sain-dratsy akory ho enti-miady amin’ny hafa, indrindra raha tsy mbola nanao ratsy azy ny olona.Tsy mahazo mamorona saina ratsy na dia amin’ny olona tsy nanao ratsy aza ny kristiana . Araka izany dia asa soa tsy maintsy tanterahina ny fihazonana ny fihavanana amin’ny hafa mba ho tsara mandrakariva .Koa satria hazonina ho tsara ny fihavanana dia miezaha manasoa , fa tsy manao ratsy olona . Fomba tsotra indrindra ifanasoavana izany .

Fanontaniana:

Asa soa toy ny ahoana no hanehoana ny maha-kristiana?

Sampana Sekoly Alahady FOIBE FJKM

Talata 02 Jiona 2020.

MIVAVAHA AO AMIN’NY TOMPO

1 JAONA 4.7-11

Ny tena fitiavana

Jaona Apostoly dia ambaran’ny mpandinika maro fa Apostolin’ny fitiavana .Tena vontoatin’ny hafatr’i Jaona ny amin’ny fitiavan’Andriamanitra . Azo lazaina ho ivon’ny asa sorany io fitiavana io. Ny tena fitiavana amin’i Jaona dia :

1-Fitiavana an’Andriamanitra aloha (and10)

Tia antsika Andriamanitra ka nomeny Jesoa ho antsika ho marik’ izany fitiavany izany . Ny fitiavan’ Andriamanitra rahateo no nialoha ny fitiavantsika Azy . Fitiavana miseho amin’ny alalan’ny asa fa tsy zavatra nolazaina fotsiny . Miseho amin’ny famonjena antsika tamin’ny alalan’i Jesoa Kristy izany . Araka izao fampianaran’i Jaona izao , tena azo tsara ny manaporofo ny fitiavana amin’ny asa . Azo atao tsara ny maneho ho hita maso ny fitiavana izay tsy hita maso . Izay mahatsapa io fitiavan’ Andriamanitra io no ho tia an’Andriamanitra koa . Jesoa dia tena tia an’ Andriamanitra Rainy noho Izy nahatsiaro ho tena tian’Andriamanitra .

2-Fitiavana ny namana koa (and11)

Ny fitiavan’Andriamanitra antsika dia tsy maintsy miteraka fitiavana ny namana .Raha misy milaza ny tenany ho manana ny fitiavan’ Andriamanitra ao aminy na mahatsapa ho tian’Andriamanitra dia miseho amin’ny fitiavany ny namany izany . Raha tsy mety tia ny namantsika isika dia tsy manana ny fitiavana an’Andriamanitra . Azo atao tsara anefa ny mangataka io fitiavan’ Andriamanitra io mba hitiavana ny namana . Ao amin’i Jesoa rahateo io tena fitiavana avy amin’ Andriamanitra io . Izany no nahatonga an’i Jesoa ho afaka nitia ny olona rehetra teto amin’izao tontolo izao .

Fanontaniana:

Amin’ny fomba ahoana no hahatongavana amin’ny fitiava-namana marina?

Sampana Sekoly Alahady FOIBE FJKM

Alatsinainy 01 Jiona 2020

MIVAVAHA AO  AMIN’NY TOMPO

ROMANA 12.9-21

Ny tena fihavanana marina ao amin’ny Tompo

Toromarika sy toro-làlana omen’i Paoly  izao  mofonaina raisintsika anio  izao mba hahatsara ny fifandraisan’ny samy kristiana .Ny fihavanana ao amin’ny Tompo  dia :

1-Marina sy madio (and 9,10)

Asain’I Paoly  mifandray  toy ny mpirahalahy  ny Kristiana. Mpirahalahy  tena mifankatia marina fa tsy  mifampihatsaravelatsihy  .Ioa  fifankatiavan’ny  mpirahalahy  io  mantsy  dia fifankatiavana ateraky  ny maha- mpiray tampo  . Koa amin’ny maha- mpiray tampo  dia tsy  mba mifampihatsaravelatsihy . Ny fihatsarahambelatsihy  izay mampalaza antsika Malagasy  dia tsy manatsara fa tena manimba sy mamotika ny  fifandraisana. Koa raha hihavana ihany , aoka ho marina sy madio  izany  , ho vokatry ny fo .Rehefa ao  amin’I Jesoa  ny olona dia ho mora aminy  ny mitia ny olona rehetra , toy izay   nitiavan’I Jesoa azy. Ny an’I Jesoa  mantsy  dia tena marina sy madio  ny fitiavany .

2- Mifanasoa (and17-21)

Tsy mifamaly ratsy  ny tena kristiana . Amin’ny maha-olombelona antsika mantsy  dia misy fotoana mety ho diso  amin’ny hafa isika.Ny hafa koa toy izany amintsika. Antsoin’ny Soratra Masina isika tsy  hifamaly ratsy .Koa rehefa tsy mifamaly ratsy  dia tsy maintsy mifanasoa. Rehefa manao soa isika dia tsy hanam-potoana  hiheverana ratsy  ho an’ny hafa . Araka  ny hita ao amin’ny and 21  dia io famaliana ny ratsy amin’ny alalan’ny soa io  no tena hanampy be dia be antsika  hiala amin’ny fanaovana valifaty  .Tsy zavatra mora ny mamaly soa ny ratsy natao tamin’ny tena , fa amin’ ny herin’I Jesoa vao tena hahavita izany ny mino  . Jesoa no nahavita namaly soa ny ratsy  natao taminy .

Fanontaniana:

Ahoana izany hoe:fihavanana marina ao amin’ny Tompo ?

Sampana Sekoly Alahady FOIBE FJKM