Talata 16 Aprily 2019.

Fandalinana ny Filazantsara araka an’i MARKA

Marka 5.21-43

Nampifanohizan’i Marka eto ny amin’ilay zazavavy 12 taona efa ho faty sy ny amin’ilay vehivavy iray nitsi-dra nandritra ny 12 Taona . Tranga roa samy hafa tanteraka ireo , kanefa mampieritreritra ny hoe: « marary efa ho faty ny zanakovavy kely » ( zanak’i Jairo mpanapaka ny Synagoga ) : 12 taona ary narary nandeha rà 12 taona ny vehivavy iray.

Na i Jairo na ilay vehivavy dia samy naneho toetra na fihetsika tsara alaintsika tahaka izay :

Fanetretena : »niankohoka teo amin’ny tongony , …na dia ny fitafiany ihany aza no voatendriko dia ho sitrana aho »

Fahasahiana nanatona an’i Jesoa Kristy : niangavy fatratra taminy , nankeo ivohony namaky ny vahoaka ».

Tena zava-dehibe ary tsara alain-tahaka ny faharesen-dahatr’izy ireo sy ny finoany fa i Jesoa Kristy IHANY no afaka mamaha ny olany , mamonjy sy manasitrana ny zanany na ny tenany . Tsy nisalasala na ilay marary mivantana na ny olona akaiky azy nanatona ny Tompo tamim-panetrena . Mitaona anao koa i Jesoa anio hoe: « Aza matahotra , mino fotsiny ihany  » .

« Raiso ny Tenin’ Andriamanitra » Boky faha- 6