Zoma 13 Desambra 2019.

Fandalinana ny Filazantsara araka an’i MATIO

Matio 3.1-17

Ny fanompoan’i Jaona mpanao batisa no hitantsika eto :

1-Ny maha-izy azy an’i Jaona (3.1-6)

i Jaona dia olona miavaka na amin’ny fitafiany na ny sakafony . Ny fahadiovana sy ny fahatsorana no asehony amin’izany . Ny fanjakan’ Andriamanitra no toriny . Milaza ny vanim-potoana vaovao hiatrehana fa Izy no Mpanjaka ka mila haverina Aminy koa ny olony toy izay nataon’i Elia .

2– Ny vontoatin’ny hafatr’i Jaona (3.7-12)

Ny hafatr’i Jaona dia mazava : vanimpotoana vaovao , mitaky fiainana vaovao ka ny fibebahana (fiovana fo sy saina ary fiainana) sy ny batisa ny famantarana lehibe amin’izany. Ivantanan’ny hafatra ny sarambabe ,ny mpitarika ara-pivavahana izay mafy hatoka (Fariseo sy ny Sadoseo) sy nomena hafatra mavesatra hampiova azy. Indrisy tsy mamokatra !

3-I Jesoa tao Jordana (3.13-17)

Niahotra i Jaona ny hanao batisa an’i Jesoa. Ny batisan’i Jesoa anefa eto dia làlana amin’ny fanatanterahana ny fahamarinana rehetra momba ny maha-Mesia Azy (Sal 2.7/ Isa 42.1) . Manatrika feno ny maha-Izy an’ Andriamanitra isika eto, eo ny Ray miteny , ny zanaka manolo-tena , ny Fanahy masina manome ny hosotra masina . Fahariana vaovao no manomboka eto .

« Raiso ny Tenin’ Andriamanitra« Boky faha-6