Alakamisy 01 May 2025

VOLANA MAY 2025

« MITARI-DALANA NY FANAHY MASINA »

(Sal 98.1-4 / HF 9 / Vavaka / Mofonaina / Vavaka / Hira547.1)

Lioka 1.67-80

Feno ny Fanahy Masina i Zakaria:

1. Fiderana an’Andriamanitra no aloaky ny vavany.

Tamin’ny fotoana nanaovan’i Zakaria ny anjara asa fisoronana tao amin’ny Tempoly no nisy anjely niseho taminy, nilaza taminy fa hiteraka zazalahy izy. Tsy nino izany i Zakaria, satria efa antitra izy mivady ka noheveriny fa tsy afaka hiteraka intsony. Vokatr’izany tsy finoany izany dia nanambara ilay anjely fa ho moana izy ka tsy hahay miteny ambara-pahatongan’ny andro hisehoan’izany zavatra izany (Lio 1. 18-20). Tanteraka tokoa izany… Taorian’ny nahaterahan’i Jaona mpanao batisa vao afaka niteny indray izy. Araka izay hitantsika eto dia fisaorana an’Andriamanitra no nipololotra tao am-pony sy naloaky ny vavany raha vao afaka niteny indray izy. Miderà an’Andriamanitra raha mbola velon’aina ka afaka misokatra sy miteny ny vava, miderà Azy, noho ny asany lehibe.

2- Manambara ny asa lehibe nataon’Andriamanitra izy

Ny vontoatin’izay nambaran’i Zakaria dia ny fanehoana ny asa lehibe nataon’Andriamanitra ho an’ny Israely, tamin’ny alalan’ny fahatongavan’i Jesoa Kristy. Jesoa Kristy no Ilay Mpamonjy mpanafaka ny olona amin’ny fahavalo sy ny tanan’ny mpankahala, ary hamela antsika hanompo Azy tsy amin-tahotra (and.7174); Izy no masoandro miposaka avy any ambony hamangy antsika, tonga hanazava ireo mihitsoka ao anatin’ny aizina sy ny aloky ny fahafatesana, sady mitarika antsika hizotra mankany amin’ny fiadanana maharitra mandrakizay.

Fanontaniana:

Amin’ny fotoana manao ahoana no tokony hisaotra sy hidera an ‘Andriamanitra isika? Vitan’ny olona tokoa ve izany?

Sampans Sekoly Alahady Foibe