Sabotsy 03 Aogositra 2024

2Tantara 29, 1-11

Hafatra ho an’ny mpanompon’Andriamanitra

1-Hamasino ny tenanareo.

Mitantara momba an’i Hezekia mpanjaka ny voasoratra eto. Nasongadiny fa zava-dehibe sy saro-pady ny fanompoana. Tsy atao am-pahazarana, na araka izay heverin’ny olona ho mety amin’ny foto-pisainany fotsiny, fa atao eo ambany fitarihan’ny Fanahin’ny Tompo. Mazava eto ny baiko, fa ilaina ny fahamasinana ho an’izay rehetra miandraikitra ny fanompoana an’Andriamanitra.

2-Hamasino ny tranon’i Jehovah

Tsy ny tena ihany no hamasinina fa ny tranon’i Jehovah ihany koa. Tsy azo atao zohy fieren’ny jiolahy io toerana miavaka io: toerana natao hiantsoana ny Tompo, angatahana fifonana, fitahiana; natao hanjakan’ny fahamasinana sy fahadiovana. Toerana voatokana hanompoana ny Tompo ny Fiangonana.

3-Esory amin’ny fitoerana masina ny loto.

Tsy sitraky ny Tompo ny fivoriana masina haroharoim- paharatsina. Tsy azo atao am-pahazarana ireo fombafomba tanterahina eny amin’ny fitoerana masina. Mijery ny toe-pon’ireo rehetra manao fanompoana eny amin’ny fitoerana masina ny Tompo. Ny fanompoana tanterahana amin’ny fo maloto, amin’ny fihatsarambelatsihy dia tsy maintsy ialàna. Tsy maintsy tanterahina an-tsakany sy an-davany ny fanompoana fa tsy tapatapahana, na atao zara fa vita.

4- Mpanao fanompoam-pivavahana ianareo

Zava-dehibe ny safidin’ny Tompo miantefa amin’ny mpanompony (and 11). Tanterahina amin-joto izany, atao am-pifaliana. Tanteraho åry ny fanompoanao.

Fanontaniana

Inona avy no takiana amin’ny fanompoana ny Tompo?

Sampana Sekoly Alahady Foibe