Alakamisy 04 Mey 2023

MPITSARA 6.33-40

Mampandresy ny mpanompony Andriamanitra

Nanao izay ratsy teo imason’Andriamanitra ny Israelita .Vokatr’izany dia navelan’Andriamanitra hampahory azy nandritra ny fito taona ny Midiana . Rehefa nitalaho tamin’Andriamanitra izy ireo dia novonjeny indray .

1-Manafy hery Izy

Ny teny hoe : « notsindriana » dia midika hoe : « notafiana » na « norakofana« .Fomban’Andriamanitra ny mifidy sy manendry olona hanatanterahany ny famonjeny .Hitantsika izany tamin’ny niantsoany an’i Mosesy hanafaka ny Zanak’Israely tany Egypta . Eto indray dia i Gideoana no nantsoiny sy nofidiny hanehoany ny fitiavany ,ka hamonjeny ny Israelita eo an-tànan’ny Midiana . Miasa amin’ny alalan’ny Fanahiny tao amin’i Gideona Andriamanitra .Ny Fanahin’Andriamanitra izay nandrakotra azy no hery nanetsika azy ka nananany fahasahiana hitsoka anjomara sy hamory ny vatan-dehilahy rehetra avy amin’ny fokon’i Manasse sy Asera sy Zebolona ary Naftaly mba hifanandrina sy handresy ny Midiana .

2-Manome toky Izy

Amin’ny maha-olombelona an’i Gideona dia mbola nitoetra tao aminy ny tahotra sy ny ahiahy manoloana izao andraikitra lehibe nanendren’ny Tompo azy izao .Nangataka famantarana izy , mba hahalalany sy ananany toky fa momba azy tokoa Andriamanitra ka hampandresy azy amin’ny ady izay atrehany. Indroa izy no nanao izany (and 36-39). Amin’izao androntsika izao dia ataovy ampy ho antsika ny Tenin’i Jesoa hoe:  » …indro Izaho momba anareo mandrakariva ambara-pahatongan’ny fahataperan’ izao tontolo izao  » (Mat 28.20). Ny Fanahy Masina izay miasa no hanome famantarana sy toky fa mampandresy antsika ny Tompo .

Fanontaniana :

Azonao antoka ve fa mampandresy anao ny Tompo? Hazavao .

Sampana Sekoly Alahady FOIBE FJKM

Alarobia 03 Mey 2023

1 TESALONIANA 5.12-21

Kristiana mahay miara-monina

Asehon’ny Soratra Masina antsika anio ny tokony ho fiaraha-monin’ny samy kristiana .

1-Kristiana manaja mpitondra fiangonana

Efa voalaza ao amin’ny didy folo rahateo ,fa ny fanajana ny ray amandreny dia mitondra soa sy fitahiana .Tsy ny ray sy reny niteraka ihany no tokony hajaina sy eken-teny ,fa eo koa ny mpitondra fiangonana izay voatendrin’ny Tompo hitarika sy hananatra ny vahoakan’Andriamanitra . »Ary mangataka aminareo izahay ,ry rahalahy mba hekenareo izay mikely aina eo aminareo sy mitondra anareo amin’ny Tompo ary mananatra anareo ». Endriky ny fankatoavana an’Andriamanitra izany ,satria izy ireny no mpitondra hafatra avy amin’Andriamanitra (and20) . Mirindra ny fiaraha-monina rehefa manao araka ny andraikitra napetraka taminy ny tsirairay (and19) hanao ny asany araka ny tokony ho izy ny mpitondra , ary ny vahoakan’Andriamanitra kosa hankato.

2-Kristiana miara-miasa sy mifanampy

Ny fiaraha-monin’ny samy kristiana no tokony ho modely ho an’ny olona rehetra .Ny fiombonan’ny mpino anefa dia ivondronan’ny karazan’olona samy hafa . Anjaran’ny matanjaka ny mampahery sy mananatra ny malemy ,ka hoy ny Apostoly : « Ary mananatra anareo izahay ry rahalahy , anaro izay tsy mitoetra tsara ,omeo toky ny malemy saina ,ampaherezo ny reraka » (and14). Ankoatran’izany dia ilaina ny fahaiza-mandefitra sy ny tsy fiezahana hamaly ratsy , ary koa hifanasoa . Ny fiainam-bavaka sy ny fandinihana ny Tenin’Andriamanitra eo ambany fitarihan’ny Fanahy masina no antoka hahatanterahana izany mba ho tena fiainam-pifaliana tokoa no iainan’ny samy kristiana .

Fanontaniana:

Azo heverina ve ny fisian’ny samy kristiana tsy mifankatia? Inona no antony ? Inona no vahaolana?

Sampana Sekoly Alahady FOIBE FJKM

Talata 02 Mey 2023

Matio 4,1-11

Azo resena ny fakampanahy

Ireo fakampanahy nahazo an’i Jesoa tany an’efitra dia mety handavo antsika koa. Resin’i Jesoa izany, ary isika koa dia ho mpandresy tahaka Azy. Ireto ny lesona ho antsika anio.

1- Mila mivonona amin’ny ady ara-panahy isika

Vita ny adin’i Jesoa, resiny ny fakampanahy mbamin’ny herin’ilay ratsy rehetra, nandao Azy ny devoly. Anjarantsika izay mpanara-dia Azy ankehitriny indray izao ny miatrika ady. Noho izany dia mila mivonona mandrakariva isika amin’ny fotoana sy ny toerana rehetra. Ny devoly no fahavalo : «Fa isika tsy mitolona amin’ny nofo aman-drà, fa amin’ny fanapahana sy amin’ny fanjakana sy amin’ny mpanjakan’izao fahamaizinana izao, dia amin’ny fanahy ratsy eny amin’ny rivotra.» (Efe.6,12). Tsy mifidy sarangan’olona izy fa izay azony dia harapany. «fa ny devoly fahavalonareo mandehandeha tahaka ny liona mierona mitady izay harapany» (1Pet.5,8)

2- Ny Tenin’Andriamanitra no fiadiana hanoherana azy

Tamin’ireo fakampanahy rehetra nolalovan’i Jesoa dia nampiasainy ny Soratra Masina. Ny Tenin’Andriamanitra ampiasaina araka ny tokony ho izy, eo ambany fitarihan’ny Fanahy Masina no anisan’ny fitaovana tsy maintsy ananan’ny Kristiana hanoherana fakampanahy. Manamafy izany ny Apôstôly Paoly raha nilaza hoe : «Ary raiso ny famonjena ho fiarovan-doha sy ny Tenin’Andriamanitra ho sabatry ny Fanahy» (Efe.6,17). Tsara ho marihina fa nampiasa ny Soratra Masina ny devoly raha naka fanahy an’i Jesoa. Tsy izay rehetra manonona andinin-tSoratra Masina akory dia ho eken-teny avokoa. Ekeo ny fitarihan’ny Fanahy Masina amin’ny fampiasana ny Soratra Masina mba hahalalana ny sitrapon’Andriamanitra.

Fanontaniana

Inona ny fakampanahy mandavo ny olona ankehitriny ? Hazavao.

Sampana Sekoly Alahady FOIBE FJKM

Alatsinainy 01 Mey 2023

ANDRIAMANITRA MIASA NY FANAHY MASINA

Mpitsara.3:7-11

I- Aza manao izay ratsy eo imason’i Jehovah ( and.7-8)

– Nanadino an’i Jehovah ny Zanak’Isiraely.

– Nanompo ireo Bala sy Aseraha izay sampin’ny jentilisa.

– Vokatr’izany dia tezitra tamin’ izy ireo Jehovah.

Koa tandremo , aza manao izay ratsy eo imasony ianao.

Tandremo ny toetranao. Tandremo ny fitondrantenanao. Tandremo izay ataonao eo imason’Andriamanitra fa hotsarainy ianao. Aza manao ratsy. Hazony mafy izay tsara fa aza mifikitra amin’ny ratsy.

II- Voasazin ‘Andriamanitra izay mivadika Aminy izay mivadika Aminy( and.8)

 » Dia nirehitra tamin’ Isiraely ny fahatezeran’i Jehovah la nivarotra azy tamin’ny mpanjakan’i Mésopotamia Izy » nandritra ny 8 taona.

– Tsarovy fa io Andriamanitrao io dia mety tezitra sady manafay no manasazy .

– Rehefa manao izay ratsy eo anatrehan’ny Tompo ianao dia tezitra aminao Izy. Manafay anao Izy.

– Mitandrema amin’ izay ataonao rehetra fa mitsinjo anao ny mason’i Tompo. Aza miandry fahatezerana vao hiverina Aminy.

III- Mamonjy ny mitaraina i Jehovah (and.9-11)

– Rehefa nitaraina tamin’ Andriamanitra ny Zanak’Isiraely. Nihaino Jehovah ka namonjy azy ireo tamin’ny alàlan’ny Mpitsara izay notendreny hamonjy ny olony.

– Tsy azonao hararaotina amin’izany izany anefa Izy.

Ho anao izay efa nanao ratsy. Mibebaha ka miverena amin’i Jéhovah mba handosiranao amin’ny fahatezeran’Andriamanitra mirehitra.Nandry fahizay nandritra ny 40 taona ny Zanak’Isiraely.

R.Robert Mpitandrina