Sabotsy 30 Aprily 2022
LIOKA 21.12-19
Tian’ny Tompo handresy isika ka :
1-Ampiomaniny mialoha
Mampiomana antsika izay hitranga amin’izao vanim-potoana farany izao ny Tompo . Hisy fisamborana, sy fampidirana am-ponja , fampijaliana noho ny Anaran’ny Tompo , hisy havana akaiky hanolotra sy hamadika , hisy fankahalana .Izay tsara fiomanana ,hoy ny fitenenana tsy tampohan’ny loza.Tia antsika ny Tompo ka mampahafantatra antsika mialoha izay hitranga .
2-Tolorany saina
Tsy mionona amin’ny fampiomanana mialoha ihany ny Tompontsika fa manolo-tsaina ihany koa Izy . « Koa aoreno ao am-ponareo ny tsy hihevitra rahateo izay havalinareo , fa Izaho hanome anareo vava sy saina izay tsy ho azon’ny fahavalonareo rehetra valiana na resena » (and 14-15).Omen’ny Tompo antsika ny Fanahy Masina ,Ilay mpanolo-tsaina , mpisolo vava sy saina entina miatrika sy mandresy ny fahavalo.
3-Omeny toky
« nefa tsy hisy ho very na dia singambolo iray eo lohanareo aza » (and18).Ireo fiasan’ny Tompo tamin’ireo mpanompony natoky Azy hatrami’izay dia tsy miova omaly sy anio ary mandrakizay . Ny fandresena ny lafaoro mahamay , ny liona noana , ireo karazana Goliata izay miseho amin’ny endrika hafa indray dia azo resena tsara .
4-Omeny paikady mazava tsara
« Amin’ny faharetanareo no hahatananreo ny ainareo »(and18) .Efa nambaran’i Jesoa fa izay maharitra hatramin’ny farany no hovonjena (Mar 13.13)
Fanontaniana :
Inona no azonao ambara momba ny fitiavan’ny Tompo ?
Sampana Sekoly Alahady FOIBE FJKM