Mois : septembre 2020

Alarobia 30 Septambra 2020.

OHABOLANA 9.7-12

Ny fahatahorana an’ i Jehovah

1-Fiandoham-pahendrena

Ny olon-kendry dia manatanteraka fihetsika sy asa mifanaraka amin’ny zava-kendreny sy ny foto-kevitra ijoroany . Fahendrena ihany koa ny fahaizana manavaka ny tsara sy ny ratsy , fahalalana ny paikan-damina sy ny fepetra mifehy ny tontolo , ary ny fifandraisana fanapahankevitra mifanaraka amin’ny rariny sy ny hitsiny . Ny bokin’ny Ohabolana dia maneho amintsika fany fahatahorana an’i Jehovah no fiandoham-pahendrena . Araka izany , raha misy milaza azy ho hendry nefa tsy manana tahotra an’Andriamanitra dia tsy hafa fa fahendren’izao tontolo izao . Fahendrena sadasada toy ny ataon’ny vahiny izay mifono fampianaran-diso .

2-Fahazavan-tsaina

Fanontaniana :

Tanisao ireo maha-zava-dehibe ny Tompo.

Sampana Sekoly Alahady FOIBE FJKM

Talata 29 Septembre 2020.

OHABOLANA 16.1-7

« Ankino amin’i Jehovah ny asanao dia ho lavorary izay kasainao » (Oha 16.3)

Ny mpino miantehatra amin’Andriamanitra

1-Manankina tanteraka ny asa Aminy

Ny hoe: manankina ny asa amin’ny Tompo dia midika fa mametraka feno eo am-pelatànany ny fizotry ny asa. Mandray ny toromarika avy Aminy, miandrandra ny fitahiana sy ny fahasoavany , manaiky ny fitantanany ary manantena ny fiarovany mandrakariva. Eo amin’ny fiainana andavanandro dia samy manana izay tarazo mahazatra azy ny tsirairay. Misy ny miankina amin’ny razana , ao ny miankina amin’ny vola aman-karena , ny voninahitra . Misy ny miantehatra amin’ny olombelona tahaka azy ihany . Ny mpino miantehatra amin’ny Tompo kosa dia manankina feno ny asany amin’Ilay Mpahary izay mpanorina izao rehetra izao amin’ny finoana tanteraka.

2-Mahazo valimbavaka

Midika izany fa ilay fikasana , ilay nofinofy , nankinina tamin’ny Tomo dia indro fa tanteraka soamantsara . Tontosa an-tsakany sy andavany , vita ara-potoana ary ahafahana mijoro ho vavolombelona fa tena miasa ny Tompo , manolo-tsaina Izy . Fomban’i Jesoa mihitsy rehefa manatanteraka ny andraikitra nankinina taminy ny tsy mijanona antenatenany na sanatria mihemotra fa miroso hatramin’ny farany ka indro Izy miteny hoe :« vita » (Jao 19.30). Miasa ary mamaly vavaka ny Tompontsika .

Fanontaniana :

Manomeza ohatra amin’ireo valimbavaka efa azonao .

Sampana Sekoly Alahady FOIBE FJKM

Alatsinainy 28 Septam. 2020

Miasà amin’ny fahatahorana an’Andriamanitra

EFESIANA 5.8-12

Ny  vokatry  ny mazava dia :

1-Ao amin’ny fahatsarana rehetra

Ambaran’i Paoly  eto mazava fa ao amin’ny Tompo  isika ankehitriny . Miara-dàlana  amin’izany ny fitaomana antsika tsy hiray petsapetsa amin’ny asan’ny maizina . Tanterahina amin’ny fanaovana asa tsara izany .Fomba fiasa mazava , mahasoa , maharesy lahatra , manitsy izay diso , mitaiza  amin’ny fahamarinana, ary mizotra  ho amin’ny fahatanterahana  (2 Tim 3.16) . Ny fahatsarana  ambara eto àry dia fahatsarana  eo anatrehan’ny Tompo aloha, mitohy eo amin’ny mpiara-manompo ary azo ijoroana vavolombelona amin’ny tranga rehetra  sy ny sehatra rehetra.Fihetsika  faka tahaka. Tsy hiandrasana dera na laza aman’ olona fa atao ho an’ny Tompo .

2-Ao amin’ny fahamarinana sy ny fahitsiana

Ny teny  hoe : fahamarinana dia avy  amin’ny teny hoe : marina , toy ny marindrano  ka tsy misy avo sy iva fa mitovy tantana  lalandava.Tsy miankina  amin’ny tontolo  misy azy no mahatonga  ny rano ho marindrano na tsia  fa amin’ny sehatra rehetra . Raha ao anaty tavoahangy ny rano , na tsy manaraka   ny jidina aza ny tavoahangy , eny fa na dia  hatongilana aza , ny marindrano  tsy miova  fa eny hatrany . Toy izany koa no takiana amintsika mpanara-dia  ny  Tompo . Tsy hanao  tahaka ny tanalahy  ka mora hiova loko  , na tahaka ny trandraka ka hanaraka volontany.

Fanontaniana :

Inona avy ireo  fihetsika sy fitondrantena  ary  toetra mampiavaka ny olona mandeha amin’ny fahazavana ?

Sampana  Sekoly Alahady  FOIBE FJKM

Alahady 27 Septambra 2020.

MARKA 12.1-12

Izay andrasan’ny Tompo amintsika

1-Ny fanajana ny fanekena

Nanaiky hanofa tanimboaloboka ny mpiasa tany voalaza eto. Misy ny fotoana nifanarahana tamin’ny tompontany mba hanefana ny hofany . Indrisy anefa fa fisamborana ny iraka no nafitsok’ireto mpanofa . Mpivadika , tsy azo itokisana . Izany no ilazana ireto mpanofa ireto . Fihetsika mandiso fanantenana ny Tompo tsotra izao izany . Nanafatra antsika izy mba hiasa sy hitandrina ny saha (Gen 2.15), saingy tsy araka izany no ataontsika.

2-Ny fialana amin’ny herisetra

Fahatsorana , fahaizana mandray olona, fihanoana, fanatanterahana ny hafatra nampitain’ny iraka no nantenaina . Indrisy anefa fa herisetra no valinkafatra hita teto : fisamborana , kapoka , ratra , fanalambaraka. Izany dia maneho miharihary ny habibiana nataon-dRaolombelona . Aoka hialana ny herisetra.

3-Mihaino sy manaraka ny fananarana

Mba takatr’ireo mpihaino ihany ary nazava tamin’izy ireo tsara ilay hafatra teto, saingy ny fisamborana ihany no nasetrin’izy ireo . Ny vahoaka izay olombelona tahaka azy ireo indray no natahorany fa tsy ny Tompo . Raha ny tokony ho izy dia fanetrentena , fandinihantena , fibebahana , fialana amin’ny toetra ratsy no hita . Mahaiza mihaino .

Fanontaniana :

Nahoana ny olona sasany no mafy hatoka sarotra anarina ?

Sampana Sekoly Alahady FOIBE FJKM

Sabotsy 26 Septambra 2020.

JEREMIA 32.36-41

Mpanorina fa tsy mpandrava ny Tompontsika

1-Mpanorina firaisankina

Ny hoe : « omeko fo iray izy » dia midika fa ny Tompo mihitsy no miasa ao amin’ny tsirairay mba hananan’izy ireo firaisankina sy fiombonana . Mitovy ny tanjona , miara-paly miaraka ory , miara-manompo Tompo iray , araka ny vavak’i Jesoa hoe : « mba ho iray ihany izy  » (Jao 17.14).Miara-mientana amin’ny fanompoana masina .

2-Mpanorina sori-dàlana

Homeko lalàna iray izy mba hatahorany Ahy lalandava (and 39) . Manana vina sy sori-dàlana mazava ho an’ny olona ny Tompo . Amin’ny alalan’i Jesoa Kristy, Ilay lalàna sy fahamarinanna ary fiainana dia mitantana antsika hizotra amin’ny fiainana mandrakizay ny Tompo . Sitrany raha miaina amin’ny fahatahorana Azy isika amin’ny andavanandrontsika mihitsy.

3-Mpanorina toe-po mba hatahorana Azy

« Ary ny fahatahorana Ahy dia hataoko ao am-pony kosa mba tsy hialany Amiko » (and 40) . Ambaran’ny Tompo eto izay hataony sy ny anton’izany .Izy no mahalala izay mahasoa antsika .Isan’izany ny handraisantsika fitahiana sy fahavokarana (and41) . Miara-dàlana amin’izany dia mamolavola toe-po sy toe-tsaina mba hifikirantsika Aminy hatrany ny Tompontsika . Tsy mijanona amintsika irery izany fa mitohy amin’ny taranaka fara mandimby .

Fanontaniana :

Inona avy ireo dingana tanterahan’ny Tompo amintsika mariky ny fitiavany antsika ?

Sampana Sampana Sekoly Alahady FOIBE FJKM