Alahady 09 Desambra 2018.
Fandalinana ny Boky : 1 Samoela
1 Samoela 20.24-42
1-Mety hahafehy tena vetivety ihany ny ratsy
Mariho fa tamin’ny takariva voalohany nahabanga ny toeran’i Davida teo amin’ny latabatry ny mpanjaka dia mbola tsy naninona akory i Saoly . Hitantsika amin’izany fa na ny ratsy fanahy aza dia mba mety mampiseho toetra tsara kely ihany ao anatin’ny fotoana fohy .
2-Vaky bantsilana ihany anefa ny tao am-pony
Tamin’ny andro faharoa dia tsy hainy nafenina intsony ny tao am-pony . Vaky teo ny resaka fa tsy zakany mihitsy ny mijery an’i Jonatana sy i Davida mifankatia , satria raha mbola eo i Davida , ilay lehilahy mahery ,tsy ho mari-toerana ny fanjakan’i Jonatana zanany . Izany no hevitr’i Saoly !Ka nony nanome fanazavana ny amin’i Davida hanala tsiny azy i Jonatana dia tora-defona no vokany . Izany tokoa no izy , na ho ela na ho haingana , tsy maintsy hiseho ihany ny tena toetran’ny olona sy izay ao am-pony tokoa. Ibebaho dieny tsy mbola vaky ny hevi-dratsy mikobona ao am-ponao .
3-Tsy tery làlana ny tena fiiavana
Na teo aza ny saika nahafaty an’i Jonatana tsy nahasakana azy tsy hamonjy ny fotoana nifanaovany tamin’i Davida ihany izany , mba hanambarana ny zavatra rehetra sy hanamafisana orina ny fifankatiavany , izay hahatratra sy taranany . Izany tokoa no tena fitiavana , ary ny fitiavanao , manao ahoana ?
« Raiso ny Tenin’ Andriamanitra » Boky faha-3