Alarobia 13 Novambra 2019.

Fandalinana ny Boky JEREMIA

Jeremia 35.1-11

1-Mifady divay :

Faharesen-dahatra teo amin’i Jonadaba razamben’izy ireo izany (2 Mp 10.15-23), ary tena hainy ny nampita izany tamin’ireo taranany. Nambarany fa maha- ela velona izany (and7). Maneho hatrany ny Soratra masina fa ratsy ny toaka (Oha 20.1/ Isa 5.22/1Pet 4.3). Ampirisihany koa ianao mba hofenoina ny Fanahy (Efe 5.18). Ary aoka tsy hivary lavo amin’izany fa tsy handova ny fanjakan’ny lanitra ny mpimamo (Gal 5.21). Itaizao ny zanakao izany .

2-Mitoetra an-day :

Manana fitsipi-piaina tena hentitra tsy maintsy narahina ireto Rekabita ireto . Tsy mahazo manorina trano fa tsy maintsy tranolay no honenana. Tsy mahazo mamboly voaloboka na manana tanimboaloboka. Ho antsika kristiana , tsy ny fanarahana fomban-drazana befahatany no ilaina , fa mila mahatsiaro kosa isika fa mpitoetra an-day isika eto amin’ity tany ity . Izany hoe: vahiny ihany fa ny tena fonenantsika dia ny any an-danitra . Aoka tsy ho variana amin’ny fanaranam-pon’ny tany . Raiso àry ny fananarana : »fadio ny filan’ny nofo, fa miady amin’ny fanahy ireny » (1 Pet 2.11)

 « Raiso ny Tenin’ Andriamanitra » Boky faha-6