Alahady 17 Septambra 2017 .

Aza menatra ny ho vavolombelon’ny Tompo 

1 Samoela 17.38-51

Ny olona matoky  an’ Andriamanitra 

Mijoro  vavolombelona ny amin’ny finoana sy ny fatokiany an’ Andriamanitra i Davida.

1-Miankina  amin’ny herin’ Andriamanitra 

Ady sarotra  no miandry an’i Davida . Na dia  nanome fitaovam-piadiana entina miatrika izany aza i Saoly mpanjaka dia nesoriny  izany  , toa asehony  fa tsy ny fananana fitaovana ary fomba entina miady  no zava-dehibe fa ny fatokiana an’ Andriamanitra . Ny fitaovana efa nanany , hainy  mampiasa araka ny fanomezam-pahasoavana nomen’ Andriamanitra azy no nampiasainy . Mampianatra antsika koa izany  fa rehefa mampiasa ny aminn’y finoana ny fanomezam-pahasoavana nomen’ny  Tompo antsika izany  dia mahita fahombiazana hatrany .

2-Miroso  amin’ny finoana

Niroso  naneho ny heriny  i Goliata ny fahavalon’i Davida . Nirehareha , nanao tsinotsinona an’  Andriamanitra izy . Tsy nampihemotra an’i Davida izany  fa indro  niroso izy , vonona hiatrika  ady . Feno  fahasahiana  nijoro  vavolombelona fa mahery  Ilay Andriamanitra itokiana . Nijoro  ho mpanafika avy hatrany  izy , nampiasa ny fanomezam-pahasoavana nomen’ Andriamanitra azy . Resy  noho  izany  ny fahavalony  . Rehefa  manaky  handroso  eo ambany  fomban’ Andriamanitra  isika dia tsy  ho resy fa ho  mpandresy hatrany .

Fanontaniana:

Afaka mijoro  ho vavolombelona amin’izany fanomezam-pahasoavana nomen’ny Tompo anao ve ianao ?

Birao Sekoly Alahady FOIBE FJKM