Auteur/autrice : admin

Alarobia 29 Desambra 2021

LIOKA 2.15-20

Mpiandry ondry , mino ny vaovao mahafaly

Tsara alain-tahaka ny fihetsik’ireto mpiandry ondry ireto . Rehefa nandre ny vaovao mahafaly nambara taminy mantsy izy ireo dia :

1-Nitady an’i Jesoa (and 15,16,)

Niseho tamin’ireo mpiandry ondry tany an-tsaha ny anjelin’ny Tompo ka nanambara taminy ny vaovao mahafaly mikasika ny fahaterahan’ny Mpamonjy . Rehefa lasa ireo anjely dia nanapa-kevitra ireo mpiandry ondry fa handeha ho any Betlehema mba hizaha ny zava-baovao nambara taminy . Olona maro no efa nandre sy nanambarana ny vaovao mahafaly momba an’i Jesoa Kristy sy ny famonjeny , saingy vitsy no nanaraka izay rehetra nambaran’ny Tenin’Andriamanitra : ao ny malaina mihetsika , ao ny tsy mino ,ao ny voafatotry ny fananany ka tsy afaka …

2-Nanambara tamin’ny hafa (and 17,18)

Rehefa nandeha tokoa izy ireo dia nahita an’i Maria sy Josefa ary ny zazakely nandry teo amin’ny fihinanam-bilona . Rehefa izany dia nampiely ny vaovao izay nambaran’ny anjely taminy momba an’i Jesoa izy ireo . Gaga sy talanjona izay rehetra nandre ny filazan’ny mpiandry ondry .Ny olona mino ny Filazantsara dia faly manambara ny momba an’i Jesoa amin’ny namany sy ny olona rehetra , tsy amin’ny faneriterena fa tena an-tsitrapo . Endrika hanehoana izany ny fanaovana Tafika masina .

3- Nanome voninahitra an’Andriamanitra (and20)

« Ary ny Mpiandry ondry niverina nankalaza sy nidera an’Andriamanitra noho ny zavatra rehetra izay reny sy hitany araka izay nolazaina taminy « . Ny fiderana sy fankalazana ankasitrahan’Andriamanitra dia izay vokatry n faharesen-dahatry ny olona , efa nahita sy nahatsapa ny fahamarinan’ny Teniny . Ao amin’ny fihainoana an’i Jesoa Mpamonjy no tanteraka izany .

Fanontaniana :

Ambarao amin’ny namanao izay fantatrao momba an’i JESOA

Sampana Sekoly Alahady FOIBE FJKM

Talata 28 Desambra 2021

ROMANA 1.1-7

Ny olona nantsoin’ny Tompo hanao ny asany

Tokony ho haintsika ny mamantatra ny olona tena voantso :

1-Mpanompo (and1)

Ny dikan’ny teny hoe: « mpanompo » dia « andevo » . Ny andevo dia fananan’olona , tsy manan-tsafidy , fa izay sitrapon’ny tompony no tsy maintsy tanterahiny . Nanaiky an-tsitrapo ho andevon’i Jesoa Kristy ny Apostoly Paoly .Ary tsy avy Aminy , na tamin’ny zalalan’ny olona no nahatonga azy ho Apostoly fa avy tamin’ny alalan’i Jesoa Kristy sy Andriamanitra Ray . Ny tena mpanompon’Andriamanitra dia manetry tena , ary ny sitrapon’Ilay niantso azy no zava-dehibe aminy .Izany no anekeny an-tsitrapo ho andevo .Tokony hifantoka tsara amn’izany toe-panahy feno fanetrentena izany izay rehetra manao ny asan’Andriamanitra . Ka ny maha-mpanompo , « andevo » dia aseho amin’ny asa eo anatrehan’Andriamanitra sy eo anatrehan’ny namana . « Fa izay rehetra manandra-tena no haetry , ary izay manetry tena no hasandratra » (Lio 14.11)

2-Voatokana ho amin’ny Filazantsaran’Andriamanitra

Mety hanana ahiahy ny Fiangonana noho ny fisian’ny mpaminany sy ny Apostoly sandoka izay manakorontana sy mampisara-bazana ny samy kristiana . Noho izany , dia tokony ho fantatra mazava tsara dieny aty am-piandohana ny mombamomba ireny olona mamita iraka na nandefa taratasy samihafa ireny . Nanome toky ny Apostoly Paoly fa ny Filazantsaran’Andriamanitra no toriany , izay miorina ambonin’ny fanambaran’Andriamanitra ny tenany ao amin’ny Soratra Masina . Jesoa Kristy no ivon’ny Filazantsara , Zanak’Andriamanitra tonga olombelona sady manana ny toetra maha-Andriamanitra Azy .Voatokana ho amin’izany ny mpanompon’Andriamanitra .

Fanontaniana :

Fomba ahoana no hamantarana ny fivavahan-diso ?

Sampana Sekoly Alahady FOIBE FJKM

Alatsinainy 27 Desambra 2021

2 TANTARA 23 .18-21

Fomba nenti-nandrava ny fahefan’ny mpanjaka ratsy fanahy

Ny fifandimbiasam-pahefan’ny mpanjaka teo amin’i Atalia sy Joasy no ambaran’ny Tenin’Andriamanitra amintsika anio .

1-Manana andraikitra ny mpitondra fivavahana

Marihana fa ny fahefan’ny mpanjakavavy Atalia dia tsy ara-dalàana satria fanjakana nalaina an-keriny , ary ny tena loza dia izy nanome vahana ny fanompoan-tsampy tao amin’ny fanjakany . Nilaina ny fandraisana andraikitry ny Mpisorona sy ny Levita ho famerenana izany araka ny fampanantenan’Andriamanitra ho amin’ny taranak’i Davida sy Solomona . I Joiada mpisoronabe no nanomana ny tetika sy ny toromarika rehetra handravana ny fanjakan’i Atalia sy hametrahana ny mpanjaka Joasy izay hisolo azy .. Ny mpitondra manome vahana ny fanompoantsampy dia mampitotongana ny fiainana ara-panahy , ka tsy afa-mitazana fotsiny izany mpirondra fivavahana fa mila mandray andraikitra araka izay hitarihan’ny Fanahy Masina azy .

2-Manana andraikitra amin’izany ny vahoaka

Tsy ho tanteraka anefa izany raha tsy manaraka an-tsakany sy an-davany izay rehetra nitarihan’iJoiada mpisoronabe mpifehy ny Tempoly azy ny vahoaka . Ny mpisorona tokoa mantsy no mampifandray ny vahoaka amin’Andriamanitra sady mampita ny fitahian’Andriamanitra ho azy . Nahafaly ny vahoaka ny fametrahana an’i Joasy mpanjaka sy ny fahafatesan’i Atalia satria nahatsiaro ho nitondra faisana ny ankabeazany nandritra ny fotoana nanjakan’itsy farany ., ‘Dia nifaly ny vahoaka rehetra ary nandry fehizay ny tanàna » (and21a). Mariky ny fitahian’Andriamanitra ny fisian’ny fandriampahalemana toy izany .Ny fiverenana amin’Andriamanitra no mitondra fiadanana .

Fanontaniana :

Inona no andraikitra andrasana amin’ny Fiangonana sy ny mpitarika manoloana ny fahalovan’ny firenena?

Sampana Sekoly Alahady FOIBE FJKM

Alahady 26 Desambra 2021

ISAIA 40 :6-8

Mitondra fanavotana ho an’ny olony Andriamanitra.

Teny fampiononana no entin’Andriamanitra maneho fa :

1-Andriamanitra no Tompon’ny fahefana rehetra.

Eto amin’ity faminanian’Isaia ity dia efa madiva hifarana ny fotoana famaizan’Andriamanitra,ary efa manakaiky ny fotoam-panafahana avy amin’ny fahababoana.Ny Persiana no hery eo am-pelatànan’Andriamanitra ho enti-manafaka ny olony eo ambany fanapahan’ny Babyloniana. Izy no Tompon’ny teny farany. Voafetra sy voafehy  eo am-pelatànan’Ilay Andriamanitra Mpahary ny zava-boahary rehetra ,ka na iza na iza milaza azy ho matanjaka,na iza  milaza ho mahery,rehefa tonga ny fetra omen’Andriamanitra, dia  tsy maintsy mifarana izany.”Maina ny ahitra, malazo ny voniny, satria tsofin’ny  fofonain’I Jehovah ireny, eny ahitra tokoa ny olona”(and.6). Na ny hery  na ny fahefana,na izay heverin’ny olona ho fahatsarana dia samy tsy haharitra fa mandalo ihany.

2-Tsy maintsy tanteraka izay nampanantenainy.

“Fa ny Tenin’Andriamanitra dia haharitra mandrakizay”(and.8b). Na teo aza ny fahababoana tany Babylona izay nahatonga ny sasany hiala tamin’Andriamanitra,dia nisy ireo sisa izay nino  sy nanantena fa ho avy  ny fotoana izay hanehoan’ny Tompo ny heriny, ka hanafahany azy ireo sy hampodiany azy indray ho any amin’ny taniny .Tsy tokony ho kivy na hihevitra an’Andriamanitra ho manadino azy ny olony,raha sendra ka mandalo fotoan-tsarotra. Sambatra izay rehetra mitahiry ka mitandrina izay lazain’ny Tenin’Andriamanitra fa  sady hanana faharetana amin’ny fahoriana izy no hiorina tsara ny fanantenany ny  fiainana mandrakizay.Fa izay rehetra nampanantenainy dia tsy maintsy ho tanteraka amin’ny fotoana izay heveriny ho mahamety izany.

Fanontaniana:

Inona ny Tenin’Andriamanitra anorenanao ny fanantenanao ?

Sampana Sekoly Alahady FOIBE FJKM

Sabotsy 25 Desambra 2021

LIOKA 2.8-14

Ny nahaterahan’i Jesoa Kristy

« …fa Mpamonjy no teraka ho anareo anie ao an-tanànan’i Davida dia Kristy Tompo « .Mahafaly antsika ny mahalala fa :

1-Jesoa no Kristy

Ny anarana hoe: Kristy dia midika hoe : « voahosotra » .Io no teny mahalaza ny voambolana Hebreo hoe: « Mesia » . Jesoa no Ilay voafidin’Andriamanitra sy voatendriny ka nirahiny hamonjy ny olombelona rehetra . Jesoa no Ilay voahosotr’Andriamanitra tamin’ny alalan’ny Fanahy Masina , ho mpaminany mitondra antsika ho amin’ny fahalalana ny fahamarinan’Andriamanitra .Izy no voahosotra ho mpisorona izay nanolotra ny tenany ho fanatitra fampihavanana antsika amin’Andriamanitra .Izy no hanapaka ny oony .Raha misy olona milaza ny tenany ho Mesia na milaza azy ho Kristy ankoatra Azy dia mpandainga sady mpanohitra an’Andriamanitra .

2-Izy no Mpamonjy

Samy efa nanota teo anatrehan’Andriamanitra avokoa isika rehetra fa tsy misy na dia iray akory aza . Ny fahotantsika dia mahatonga fanamelohana sy fitsarana ary fahafatesana ho antsika .Rehefa tafasaraka amin’Andriamanitra ny olona dia simba ihany koa ny fiandraisany amin’ny oona , ary mihasimba koa ny fifandraisany amin’ny zava-boahary .Koa na inona na inona ezaka atao hikatsahana fiadanana dia tsy hahomby velively izany .Miharatsy sy mihasimba ny tontolo iainana . Ny fihavanana amin’Andriamanitra irery ihany no làlana tokana hahazoam-pamonjena .Ao amin’i Jesoa Kristy no tanteraka hy fampihavanana antsika amin’Andriamanitra . Ny mpiandry ondry any an-tsaha no nisehoan’ny anjely sy nampahafantarina izany vaovao mahafaly ho an’ny olona rehetra izany .

Fanontaniana :

Inona no tena mahafaly anao amin’izao krismasy izao?

Sampana Sekoly Alahady FOIBE FJKM