Mois : février 2025

Zoma 28 Febroary 2025

Sal 92, 1-3 / Hira 21:1.3 / Mofonaina / Hira 643 : 1,2

Josoa 10.8-11

Josoa sy ny Isiraely miakatra miandalana handova ny tany Kanana. Ady tamin’ireo mpanjaka dimy no natrehana niaraka tamin’Andriamanitra amin’izao mofonaina izao.

1. Manafa-tahotra amin’ny Teniny Andriamanitra

Vaovao tsara no voarain’i Josoa manoloana ny ady atrehiny ka nitenen’ Andriamanitra azy hoe «aza matahotra » (And.8). Josoa vao avy nofitahin’ny Gibeonita anefa hiatraka ady indray no nahazo izany fampaherezana izany. Ary teny fanomezan-toky fa handresy ireo fahavalo na maro aza ka nahatonga azy nanana risi-po hiatrika ny ady ka nanao lava alina avy hatrany nakany Gibeona.

Tsaroana etoana ny adin-tsaina nahazo an’i Maria rehefa nitoe-jaza izy. Tonga Andriamanitra nampahery azy tamin’ny alalan’ny anjely ka nilaza hoe: « Aza matahotra ry Maria…» (Lio 1, 30)

2. Mandray anjara amin’ny adin’ny olony Izy

Rehefa roso tamin’ny ady ry Josoa dia nandray anjara fa tsy nijery fotsiny Andriamanitra. Maneho fa Mpiady mahery sady manana fahefana tsy hay tohaina Izy amin’ny maha Tsitoha Azy. Nampifanaritaka ny fahavalo (And.10) sady nandatsaka havandra vaventy Izy (And. 11). Teo anatrehan’ny miaramila Egytiana sy ny ranomasina mena no efa nandray anjara toy izao Izy. Tena miara-mandeha amin’ny olony Andriamanitra ka momba sy miandany mba handresen’ireto farany. Nohamarinin’ny Tompo ny Teniny fa ho « fahavalon’ny fahavalonao sy ho rafin’ny rafinao Aho » (Eks 23, 22). Hezekia mpanjaka dia resy lahatra fa ny Tompo dia hiady ho azy ireo nanoloana ny Asyriana tamin’izany (2 Tan 32, 7-8).

Fanontaniana:

Maninona no tsy manaiky ny fidiran’ Andriamanitra an-tsehatra amin’ny adiny ny kristiana maro?

Sampana Sekoly Alahady Foibe

Alakamisy 27 Febroary 2025

Sal 23 / HF48 / Mofonaina / Hira 548:1

Isaia 40. 9-11

Andriamanitra mampahery ny olona no hita amin’izao mofonaina izao ka ilazany fa ho avy Izy amin’ny heriny hamonjy azy ireo ka miseho ho toy ny Mpiandry ny Isiraely:

1. Hangoniny izay lasa lavitra

Tonga lavitra an’Andriamanitra ireto vahoaka ireto vokatry ny fandikany ny didy voalohany tamin’ny nanompoany andriamanitra hafa ka nahalasa ho babo azy ireo tany Babylona. Sady lavitra an’Andriamanitra amin’ny lafiny ara-panahy no lavitra ara-toerana satria tsy ao Jerosalema intsony. Ankehitriny dia mitondra teny soa mahafaly fa vita ny adiny ary voavela ny helony (And.1). Ny famelan’ Andriamanitra ny helok’izy ireo no fiatombohan’ny fanangonany ireto vahoakany. Haneho ny heriny amin’ny maha Andriamanitra azy Izy ka ho tafaverina avokoa izay sisa.

Jesoa Kristy ilay Mpiandry tsara nandatsaka ny rany mba hamonjena ny olona rehetra. «Fa ankehitriny kosa, ao amin’i Kristy Jesoa, hianareo izay lavitra fahiny dia efa nampanakeken ‘ny ran’i Kristy » (Efe.2, 13)

2. Mitantana ireo marefo

Asehon’Andriamanitra mandritra izany fanangonana izany ny fomba itantanany ireo vahoaka hiverina ao Aminy indray. Hampatsiahiviny fa ilay sandriny mahery nitondrana azy ireo nivoaka tany Egypta no mbola hitrotroany ireo mbola kely hery, « zanak’ondry » (And.11b) eo an-tratrany hiala any am-pahababoana. Maneho fiarovana lafatra izany satria tsy misy maharombaka ny eo an-tanany. Ny zanak’ondry mbola minono (And. 11b), marefo ary tsy maintsy kenakenaina, dia ho entiny miadana. Jesoa dia nijery manokana ireo mila vonjy.

Fanontaniana:

Efa ao anatin’ny valan’ondrin’Andriamanitra ve ianao?

Sampana Sekoly Alahady Foibe

Alarobia 26 Febroary 2025

Sal 93 / Hira 6:12 / Mofonaina / Hiva 334

Lioka 4.31-37

Jesoa mampiseho ny heriny no resahina eto. Kapernaomy izay midika hoe tananan’i Nahoma na tanana fanovozana hery. Tsy kisendransendra raha toa ka tao no nanehoan’i Jesoa ny fahefan’ny Teny izay mahagaga sy manome hery ary manafaka. Manana fahefana ny Tenin’i Jesoa ka:

1. Manaitra izay tena mihaino (And.32)

Ny teny hoe talanjona dia misy heviny iray hafa koa ao amin’ny teny fototra hoe taitra mafy. Ny zavatra manaitra mafy dia zavatra tsy nampoizina, tampoka ary tsy mahazatra.

Ary tsy mahagaga raha tampoka tamin’ny olona ilay teny satria tsy toy ny fandre isan’andro. Teny mampitodika ny olona amin’ Andriamanitra indray ary azo antoka fa teny mitondra ho amin’ny famonjena ka mampahazo aina ny mandre azy. Tokony hisy akony ny Tenin’i Jesoa izay efa notoriana taminao.

2. Mandresy ny asan’ny demonia (And 33-36)

Nisy olona izay efa voafatotry ny demonia, azo heverina fa mitady fanafahana dia namonjy Synagoga. Nifanojo tamin’i Jesoa ary mba te hiaraka amin’Andriamanitra izy fa nosakanan’ny demonia. Fa rehefa tonga Jesoa dia nilaza tsy nanontaniana ny hakelin’ny fahefany ny demonia ary natahotra fandringanana. Tonga Ilay Tompon’ny fahefana rehetra ka niala maina hatramin’ilay ratsy izay namatotra hatrizay.

Aza avela hisy hamatotra anao tsy ho ao amin’Andriamanitra, fa raha misy izany ka tianao ho rava dia antsoy Jesoa. Sarotra ho an’ny olona ny mandresy ny asan’ny ratsy raha tsy manana an’i Jesoa Tompon’ny hery sy ny fahefana.

Fanontaniana:

Mbola manaitra anao ve ny mandre ny Tenin’i Jesoa feno hery sy fahefana?

Sampana Sekoly Alahady Foibe

Talata 25 Febroary 2025

Sal 33. 18-22 / Hira 16.1, 3/ Mofonaina / Hira 20 1,3

Salamo 119. 41-48

Miantso ny famindrampon’ Andriamanitra ny mpanao Salamo satria fantany fa mifamatotra amin’ izany ny famonjena araka ny Tenin’ny Tompo. Mamonjy ny Tenin’Andriamanitra ka:

1. Manafa-tahotra

Ny Tenin’ Andriamanitra no itokiana manoloana ireo fahavalo. Tsy mamerina ireo teny ratsy izay ambarany na manaraka ny teny feno fitaka sy lainga mety ho lazaina ihany koa. Tsy mora koa anefa ny mandaha-teny manoloana ny fahavalo. Ny Tenin’ Andriamanitra, teny tsara sady mamy, teny marina, feno fahasoavana, izany no atolotra ireo mitsangana ho fahavalo. Jesoa Kristy dia nampianatra fa tokony ho tia na dia ny fahavalo aza. Tsy fisainan’ny kritiana rahateo ny mamaly ratsy ny ratsy. Hoy i Paoly Aza mety ho resin’ny ratsy ianao, fa reseo amin’ny soa ny ratsy (Rom 12, 21)

2. Iravoravoana

Maneho fahavonona hitandrina ny lalån’ Andriamanitra ny mpanoratra (And.44). Antenainy fa hitondra fanahafahana sy antoka ho azy izany ka hananana fahasahiana, tsy amin-kenatra, hijoroany vavolombelona eo anatrehan’ny manam-pahefana. Ny asa rehetra tanterahiny dia hifanaraka mandrakariva amin’ny sitrapon’ Andriamanitra. Ny fitiavany ny Tenin’Andriamanitra no manosika azy hanao izany rehetra izany ka hiteraka fifaliana ary ho tonga firavoravoana ho azy. Ny Tenin’Andriamanitra no loharano tsara indrindra hanorenana ny fifaliana satria maharitra mandrakizay, Ny lanitra sy ny tany ho levona fa ny teniko tsy mba ho levona (Mat 24.33)

Fanontaniana

Nahoana no be fanahiana ny olona ankehitriny ka tsy manam-pifaliana intsony, eny fa na dia ny kristiana aza?

Sampana Sekoly Alahady Foibe

Alatsinainy 24 Febroary 2025

Sal 117 / Hira 171 : 1, 3 / Moforaina / Hira 332 : 1

Sal 138.1-8

1. Midera an’Andriamanitra

Miantomboka amin’ny teny hoe midera Anao » ity Salamo ity. Maneho ny fikasana tsara ao anatiny ny mpanoratra fa te hidera an’Andriamanitra izy ary amin’ny fo tokoa fa tsy an-tendro-molotra fotsiny ihany. Ary tsy mba nafeniny izany fa hasehony mihanbary manoloana ireo andriamani-tsy izy. Manandratra an Andriamanitra ho ambonin’ny zavatra rehetra sy izay heverin’ny olona fa andriamanitra mahavonjy azy. Ary tsy izy ihany no tiany hidera fa ny mpanjaka namany ihany koa.

Tena ankasitrahan’Andriamanitra ny fiderana Azy amin’ny fo madio tsy mihatsaravelatsihy. Ny Fiangonana dia toerana iray natokan’ny mpino rehetra hiderana sy hanomezana voninahitra an’Andriamanitra.

2. Tsy mivadika amin’ny Teniny Izy

Tamin’ny fahasahiana no nideran’ny mpanoratra șatria tsapany loatra ny fahatsaran Andriamanitra tamin’ny misitrahany ny famindrampon’ny Tompo sy ny fahamarinany. Tamin’ny fotoana sarotra nolalovana dia tsy nahatsiaro ho irery satria nohenoin’Andriamanitra ny fitarainany (And.3). Ireo toky sy teny fampanantenana dia tanteraka tokoa. Toa tsy lavitra azy ny fahavalo, izay anatin’ny fahatezerana ary mikendry handavo azy saingy niaro azy Andriamanitra. Ilay toe-draharaha mampitebiteby sy mampatahotra teo nivadika ho fifaliana satria nandray famonjena noho ny Tenin’Andriamanitra.

Marina sy tsy miova ary azo antoka ny Tenin’Andriamanitra ka anantenana valim-bavaka mandrakariva. Vokany, hitoetra amin’ny fahatokiana an’Andriamanitra hatrany ny mpino (And.7-8).

Fanontaniana:

Nahoana no misy tsy mahatsiaro midera an Andriamanitra kanefa mandray zava-tsoa avy amin’ny Teniny?

Sampana Sekoly Alahady Foibe

Alahady 23 Febroary 2025

Sal 32, 1-2 / Hira 167: 1,2 / Mofonaina / Hira 295 : 1,4

1 Jaona 2. 12-14

Natanjaka ny Fiangonana satria mbola velona ny Apostoly. Nisy ihany koa ny fampianaran-diso hanoherana ny finoan’ny Kristiana. Mampianatra i Jaona ka mampatsiahy izay tokony iveloman’ny mino. Ary mampahery amin’ny teny sao:

1. Manadino ny famelan-keloka efa azony (And.12)

Izay manaiky an’i Jesoa ho Tompo sy Mpamonjy dia voavela heloka. Izany no vontoatin’ny fahatongavan’i Jesoa tety an-tany sy fototry ny Teniny rehetra ary nambaran’ny mpianatra. Mbola natanjaka anefa ireo fandemen-tsaina nahazo ny olona ka niteraka fisalasalana tamin’izany. Koa ny teny toriana no fitaovana ifampaherezana fa izay mino an’i Jesoa dia mpanota voavela heloka. Aza avela hisy hahasaraka antsika amin’ny famonjen’i Kristy Jesoa fa azo antoka izany.

2. Mivaona amin’ny Tenin’Andriamanitra (And.14)

Ny Tenin’ Andriamanitra irery ihany no fanalahidin’ny fisalasalana rehetra. Ary ao amin’ny teniny no ampahalalany ny sitrapony. Ny olona mitoetra sy mandala ny teny dia mahery satria tafaorina tsara ny finoany ka tsy voahozongozona. Ny teny hoe mitoetra mantsy dia anehoana zavatra iray tsara fototra sy mafy orina ka tsy mihetsika intsony. Jesoa no ilay vatolampy fototry ny teny izay inoantsika. Izay miantehitra Aminy dia tsy misy mahazera satria tsy miova ny heriny.

Ilay ratsy dia mitady ny hevitra rehetra izay hanakorontanana antsika tsy hiorina tsara ao amin’i Jesoa. Tsarovy fa ny heloka vitatsika dia efa navelan’ny Tompo. Koa aza misaraka amin’ny Tenin’Andriamanitra fototra iorenan’ny finoana velona.

Fanontaniana:

Tsapanao ary tsaroanao ve ny hasarobidin’ny famelan-keloka omen’ Andriamanitra anao amin’ny alalan’ny Teniny?

Sampana Sekoly Alahady Foibe

Sabotsy 22 Febroary 2025

Sal 91, 1-8 / Hira 8 / Mofonaina / Hira 512. 1,2

Ohabolana 22.17-21

Ny Tenin’ Andriamanitra dia miteraka fahatokiana Azy

Solomona mpanjaka no nanoratra ary momba ny fahendrena no amharany amin’ izany ka itaomany ny mpamaky. Ny fahendrena na ny tenim-pahendrena izay nananany dia avy amin’ Andriamanitra araka izay nangatahany. Manasa antsika ary izao mofonaina izao mba hiaino sy hitahiry ary hiaina izany teny izany ka hahatoky ny Tompo (And. 19)

Rehefa henoina ka ampidirina ao anaty ny Teny dia tonga fiainana ary tsy afaka am-bava. Ny teny avy amin’ny Soratra Masina dia mampitombo ny fahalalana an’Andriamanitra ary hanehoany ny maha izy azy Azy. Ary izany fahalalana izany no hitarika ho amin’ny finoana. Ny finoana anefa dia fahatokiana an’ Andriamanitra. «Koa ny finoana dia avy amin’ny toriteny ary ny toriteny dia avy amin’ny tenin’i Kristy » (Rom 10.17)

Ny fahafenoana ny Tenin’ Andriamanitra eo amin’ny fiainana dia mamelona fanantenana mandrakariva satria fahatsarana hatrany no ambara ao ary mikendry izay hahasoa. «Tsy efa nanoratra zava-tsoa ho anao va aho, izay misy hevitra tsara sy fahalalana » (And 20). Izao tontolo izao dia mamafy zava-dratsy mety hiteraka fahakiviana na famoizam-po sy ny maro hafa. Ny Tenin’ Andriamanitra kosa dia mampahery sady manoro lalana satria «teny mahatoky», azo antoka tanteraka.

Izay manana ny Tenin’Andriamanitra dia tsy hanana ahiahy na tebiteby na tahotra intsony fa fahatokiana an’Andriamanitra tanteraka no maneno ny fiainany.

Fanontaniana

Mbola misy kristiana tsy matoky an’ Andriamanitra ve? Nahoona?

Sampana Sekoly Alahady Foibe

Zoma 21 Febroary 2025

Sal 66, 8-12/Hira 141 :1,5/Mofonaina/Hira 486 :1,5

2 Timoty 2.8-13

Mifampahery ny samy mpanompon’Andriamanitra sady mpanompon’ny teny. Mampianatra ny zoky fa hisedrana olana ny fanompoana ary tsy mahaketraka izany noho ilay Mpandresy dia Jesoa. Toriana hatrany ny teny mba ho tsaroan’ny olona fa:

1. Nandresy ny fahafatesana i Jesoa (And.8)

Fahavalo tsy hain’ny olona resena vokatry ny fahotany sy ny fandaozany an’Andriamanitra ny fahafatesana. Tsy manana vahaolana manoloana ny fahafatesana, satria hiharan’izany fotsiny ny olombelona. Tsy namela antsika ho resy anefa ny Tompo na faly hahita ny fahaverezantsika fa indro nasehony tao amin’i Jesoa fa izay tsy resintsika dia resiny. Nitsangana ho velona izy ary nasehony ho hitan’izao tontolo izao izany.

Aloky ny fahafatesana ny ety an-tany fa tsarovy fa an’Andriamanitra ny fahefana rehetra.

2. Tsy ny fahafatesana no tompon’ny teny farany (And.11)

Mety mahaketraka tokoa ny ady atrehana ety an-tany, koa na ny mino aza rehefa misedra olana samihafa dia toa milofika. Raha mamaky izay niaretan’i Paoly tamin’ny asa fitoriana izay heverina fa hitondra fifaliana dia mahadiso eritreritra. Kanefa tafajoro hatrany izy noho ny fanantenany fa velona i Jesoa izay Tompoiny. Mitory hatrany izy, na dia hahafaty aza, mba ho ren’ny olona rehetra fa ny fahafatesana dia resin’ny mino an’i Jesoa. Ny Tenin’Andriamanitra no tsy mety voafatotra, ary izany teny izany no hanafaka ny olona izay mbola mifatotra.

Tsarovy àry fa marina amin’ny Teniny ny Tompo. Koa aza ketraka mitory ny teny fa ny Fiangonana no mijoro ankehitriny dia velomin’ny tenin’i Jesoa velona.

Fanontaniana:

Mbola mifampahery marina ve ny samy mpitory filazantsara?

Sampana Sekoly Alahady Foibe