Sabotsy 02 Martsa 2019.

Fandalinana ny 1 Mpanjaka

1 Mpanjaka 8.1-11

Vita soamatsara ny tempoly ary niroso tamin’ny fitokanana azy i Solomona mpanjaka :

1-Fitokanana niombonana no natao . Toa mandeha ho azy ny iheverantsika izany , kanefa manana heviny lehibe ny niantsoan’i Solomona ireo loholona , mpisorona , levita ary ny Zanak’Israely rehetra amin’izao fitokanana ny tempoly izao. Fa tena fampiraisana ny foko 12 izao sady tena fampiombonana azy amin’ny fiorenana amin’ny finoana an’ Andriamanitra tokana dia ny Tompo irery ihany .

2-Fitokanana mamaritra fotoana vaovao izao . Tapitra ny fotoanan’ny trano lay fihaonana nampiasaina tany an-tany efitra . Naman’ny tapitra koa ny fotoana nitondrana ny fiaran’ny fanekena nandehandeha . Izao dia manana fonenana raikitra ny Tompo ary ny tempoly no manambara ny fanatrehany sy ny fiarahany monina amin’ny vahoakany .

3-Fitokanana feno ny fanatrehan’ Andriamanitra izao. Endrey ny fahamasinan’izao fitokanana izao , fa rehefa tafapetraka tao amin’ny fitoerana masina indrindra ny fiaran’ny fanekena misy ny Didy folo , ka nivoaka avy tao ny mpisorona , dia feno rahona ny trano : feno ny fanatrehan’ Andriamanitra . Enga anie mba ho toy izany avokoa ny fitokanana trano fiangonana , ka ny voninahitr’ Andriamanitra no hamirapiratra .

« Raiso ny Tenin’ Andriamanitra » Boky faha-3