janvier 2018

Fdl sy Fitsipika / Ny Filohan’ny FJKM

Araka ny Foto-dàlanan’ny FJKM, and. 34, ny Filohan’ny FJKM dia sady Filohan’ny Mpiandraikitra Foibe no Filohan’ny FJKM. Tsiahivina fa ny Mpiandraikitra Foibe(MF) dia ireo mpikambana miisa 100 izay nofinidin’ny Synoda Lehibe (SL) hisolo-tena azy eo anelanelan’nySynoda lehibe roa ; izany hoe : manomboka eo amin’ny fahavitan’ny Synoda Lehibe iray ka hatramin’ny fiafaran’ny Synoda lehibe manarak’io izay anavaozana ny ho MF vaovao. Izy no mitarika io MF io, dia ny MF izay manana ny Birao ho mpiara-miasa aminy. Ireo Birao ireo no antsoina hoe : Biraon’ny Mpiandraikitra Foibe (BMF), izay manana ny Filohany antsoina hoe : Filohan’ny Biraon’ny Mpiandraikitra Foibe. Izy no Filohan’ny FJKM.

Noho izany, ny BMF dia sehatra itantanana ny MF koa eo ampanatanterahany izany andraikitry ny MF izany dia antsoina hoe : Filohan’ny Mpiandraikitra Foibe na Filohan’ny BMF izy
Fa eo amin’ny fanatanterahany ny fanapahan-kevitry ny SL kosa dia izy no mitarika ny Fiangonana manontolo ka izany no iantsoana azy ho Filohan’ny FJKM.
Koa raha tsiahivina dia toy izao amin’ny ankapobeny no lalana ahatongavana eo amin’ny toeran’ny Filohan’ny FJKM na Filohan’ny MF. Izy dia Mpitandrina izay fidin’ny SL (FDF and.22) araka ny fanolorana
ataon’ny Mpiandraikitra Foibe (FDF and. 24.1). Efa-taona azo havaozina no fotoam-piasany (FDF and. 29) ka matihanina amin’ny asany izy (FDF and.32).
Eto am-pamaranana dia “Toy izao manaraka izao no andraikiny :

1. Miantoka ny maha-iray ny FJKM,

2. Misolotena ny FJKM eo anatrehan’ny Fiangonana tsirairay sy eo anatrehan’ny Fiangonana hafa na Vondrom-Piangonana ary eo anatrehan’ny Fanjakana.

3. Mamaritra ny fijery sy ny fanatanterahana ny asan’ny FJKM mandritra ny efa-taona araka ny soridalan’ny Synoda Lehibe.4. Miandraikitra ny fanatanterahana ny hevitra tapaky ny Synoda Lehibe miaraka amin’ny Mpiandraikitra Foibe,

5. Mamory sy mitarika ny fivorian’ny Mpiandraikitra Foibe,

6. Mampahafantatra ny fanapahan-kevitry ny Synoda Lehibe amin’ny Fiangonana,

7. Mamangy ny Synodamparitany ho fampirisihana azy amin’ny fitoriana ny Filazantsaran’i Jesoa Kristy.” (FDF And.34)
Lehibe sady goavana ny andraikiny koa antenaina hanandratra vavaka ho azy ny rehetra fa tsy ho tapitra teo am-piarahabana tsy akory.

Rasorapiangonana

Fanazavana Perikopa Janoary 2018

Mihainoa ny tenin’ny Tompo

Hilaozana sahady ity ny janoary ka hitsena ny volana faharoa amin’ity taona 2018 ity ny Fiangonana. Volana hiaraha-mibanjina ny lohahevitra hoe : « Mihainoa ny tenin’ny Tompo ». Ny perikopa amin’ireo Alahady roa mamarana ny epifania no atolotra eto amina fehezanteny vitsy monja mba ho tari-dalana.

Deoteronomia 5, 25- 30 : Ny olona izay mandre ny didin’Andriamanitra dia manambara izay teny hasetriny izany ka raha teny ho amin’ny fankatoavana dia mampanatena fahasoavana ho azy sy ny taranany Andriamanitra (and. 26). Fa Andriamanitra miteny dia maniraka olona mba hampita ny teniny amin’ny Fiangonana (and.27) dia ilay Fiangonana izay tiany hizotra mahitsy (and.29- 30)

Josoa 3, 9- 17 : Andriamanitra dia miteny amin’ny alalan’ny mpanompony mba hampita amin’ny Fiangonana fa eo aminy mandrakariva Andriamanitra (and. 9- 13) Koa ho porofon’izany no anehoan’Andriamanitra ny heriny eo anatrehan’ny olony (and. 14- 17)

Jaona 10, 22- 30 : Ny tenin’ny Tompo renesin’ny Fiangonana dia hitondra finoana ao anatiny (and. 25- 26) mba hahazoana fiainana (and. 28- 30)

Lioka 8, 4- 15 : Ny tenin’ny Tompo dia iandrasana vokatra eo amin’ny fiainan’izay rehetra mihaino, toy ny fahavokaran’ny voa izay nafafy na tsia. Tsy ho teny mandalo na ho teny nanaitra teo ampandrenesana azy na ho teny very anjavony tao anaty fotoan-tsarotra.

1 Tesaloniana 2, 13- 16 : Ny tenin’ny Tompo izay renesina amin’ny endriky ny toriteny dia natao ho raisina mba hiasa (hisy vokatra) ao anatin’ny Fiangonana tsirairay.

Jakoba 1, 16- 25 : Ny Tenin’ny Tompo dia « teny fahamarinana » manamarina ny Fiangonana ka hahatonga fihavaozana tanteraka (nateraka indray) (and.18). Koa amin’izany, ny tenin’ny Tompo dia mitaky fankatoavana (and. 22) mba hahazoan’izay mihaino manitsy na manatsara ny fiainany (and.24)

Ho an’Andriamanitra irery ihany anie ny voninahitra.

RAKOTOZANANY Andrianirinomena Jules, Mpitandrina

SAMPATI / vaovao ampitaina

« Aoka hirehitra ny jironareo » Lio.12:35

Misaotra an’Andriamanitra lehibe isika fa tanteraka soamantsara ny fotoana tetsy Mahamasina ny Alahady 21 Jan.2018 ho fitondrantsika am-bavaka ny taom-piasana FJKM 2018 sy ny fitondrana am-bavaka ny filohan’ny FJKM.Isaorana isika SAMPATI FJKM fa tena mahafinaritra ny ezaka nataontsika, tsara ny fandraisana andraikitra nataontsika, tonga maro isika … Tena mahafaly tokoa… Tohizo r’se!Tsy nasakana antsika ny orana, satria marina tamintsika tokoa ny tononkirantsika hoe: « na andro merika, na oram-baratra; tsy mahasakana….. »Mitohy hatrany ary ny hetsika am-bavaka sy fijoroana vavolombelona ataontsika ho fanabeazana. Ao amin’ny FJKM Atsimon’i Mahamasina, ny Asabotsy 03 Fév.2018 amin’ny 2 ora:- Fitondrana am-bavaka ny Taom-piasana SAMPATI 2018- Fanolorana sy fitondrana am-bavaka ny Tonia SAMPATI Foibe- Fanolorana ireo Komity faha-25 Taona SAMPATI.Aoka ary hifanentana isika.Hitarika ny fotoana ny Birao Foibe SAMPATIHitory ny Tenin’Andriamanitra ny SEKRETERA JENERALY FJKM, Ny Mpitandrina RADIMISAON Jonah.Isika SAMPATI avy amin’ny Faritany na synodam-paritany dia handefa solontena.Isika eto Antananarivo sy manodidina kosa dia ho tonga avokoa.Ry mpanabe malala, raiso izao vina izao

SAMPATI FJKM, HETSI-PANABEAZANA

HO FAMPANDROSOANA NY FIANGONANA SY NY FIRENENA

Ry mpanabe malala, ampiharo izao tanjona izao:SAMPATI – Vavolombelon’i Kristy – Vonona – Vanona – Mandray andraikitra.

» Ianareo no fahazavan’izao tontolo izao » Mat.5:14 » Koa amin’ny zavatra rehetra dia asehoy ny tenanao ho fianarana ny asa tsara » Tit.2:7

RANDRIAMANANTENA SOLO

Jean Jacques Séraphin Jhons, Mpitandrina

Tonia SAMPATI FOIBE

034 90 163 67

Filazana manjo

Nodimandry teo amin’ny faha-83 taonany

RAFRANSOA Maxime Victory , Mpitandrina

Ny Alatsinainy 29 Janoary 2018 tao Antananarivo

Hoy ny vadiny : Rahariseheno Jacqueline

Ny zanany :

Rafransoa Tsiry sy ny ankohonany

Rafransoa Zoary sy ny ankohonany

Rafransoa Ken Mika sy ny ankohonany

Ny nofony dia hiala ao Ankadivory Antehiroka Lot 77 BS ny Alarobia 31 Febroary 2018 , amin’ny 10 ora maraina , hanomezam-boninahitra ao amin’ny Paroisse Internationale Andohalo mialohan’ny hametrahana azy ao amin’ny fasam-pianakaviana ao Ambohimamory .

« …satria Izy efa nanendry andro iray izay hitsarany izao tontolo izao amin’ny fahamarinana amin’ny alalan’ny Lehilahy voatendry, koa efa nanome vavolombelona hampino ny olona ny olona rehetra izany Izy tamin’ny nananganany Azy tamin’ny maty . »Asa 17.31

AFIFAB / Pylône RADIO FAHAZAVANA

Fanamboarana ny pylône

ho fanatsarana ny fampitana ny feo

Isaorantsika ny Tompo fa mizotra soa aman-tsara ny asa fanamboarana ny Pylône ho an’ ny Radio Fahazavana eny Ambohibe Ilafy, efa vita ny fototra; efa voarandrana ny vy ary efa hampiakatra ny Vy (massif pylône) isika tsy ho ela. Raha sitrapon’ ny Tompo dia heverina ho vita ny volana Aprily izao ny asa rehetra. Mbola antenaina sy irina ny tolo-tanana avy amintsika na ny vavaka na ny ara-bola. Afaka manatona mivantana ety @ Foibe FJKM Analakely, rihana faha-6 Ifanomezantsoa Analakely izay liana sy vonona ho amin’ ny tolo-tanana.

AFIFAB FJKM

Alarobia 31 Janoary 2018.

Manapaka amin’ny fahefany ny TompoHebreo 1.1-4

Ny halehiben’ny voninahitry ny Zanaka

Ny halehiben’ny voninahitr’i Kristy no tanisaina eto mba hahaizantsika midera Azy sy mametraka Azy amin’ny toerany :

1-Izy no voatendriny ho mpandova ny zavatra rehetra

Azy ny zavatra rehetra , ary afaka mizara izany amin’izay Azy Izy . Amin’izany dia tonga mpiray lova Aminy izay rehetra mino (Rom 8.17;Gal 4.7)

2-Izy no nahariana izao tontolo izao

Tsy mba isan’ny voahary tahaka izay mpaminany fahiny na tahaka ny anjely Izy . Efa tao amin’ Andriamanitra hatrizay hatrizay Izy . Tamin’ny alalany no nahariana ny zava-boahary rehetra (Jao 1.1;3.1;1 Ko 8.6)

3-Izy no famirapiratan’ny voninahitr’ Andriamanitra Andriamanitra « tonga nofo, ka nonina tamintsika »Izy . Hita namirapiratra tamin’ny maha-olona Azy ny voninahiny , araka ny voasoratra hoe: »…ary hitanay ny voninahiny … »(Jao 1.14). Izy dia tonga hanamabara ny Ray izay naniraka Azy.4-Izy no nanao fanadiovana hahafaka amin’ny fahotana

Tamin’ny nanaterany ny tenany indray mandeha no nanadiovany ny mpanota ho afaka amin’ny fahotana rehetra. Tsy misy fomba hafa hahazoantsika famonjena afa-tsy izay nataony ho antsika .

5-Izy dia nipetraka teo amin’ny tànana ankavanan’ny lehibe any amin’ny avo

Rehefa vitany ny asany dia naka ny toerana ambony nomena Azy Izy , Mpanjakan’ny mpanjaka Izy , Mpisorona mandrakizay , ilay mipetraka amin’ny seza fiandrianana avo indrindra (Apo 5.13).

Fanontaniana :Ekenao eo amin’ny fiainanao ve fa Mpanjaka be voninahitra Izy?Birao Sekoly Alahady FOIBE FJKM

Talata 30 Janoary 2018.

Manapaka amin’ny fahefany ny Tompo

Isaia 47.1-5

Andriamanitra no Tompon’ny fahefana rehetra

Nihambo hanana fahefana maharitra mandrakizay Babylona ka nihevitra fa tsy hisy afaka hanaisotra izany (jereo and7).

1-Afaka manaisotra ny fahefan’olombelona Izy

Nanao tsinotsinona an’i Jehovah Andriamanitr’Israely i Babylona tamin’ny nadravany tempoly tao Jerosalema . Noheveriny fa ny faharavan’i Jerosalema sy ny fahababoan’ny vahoakan’Israely dia fahafoanan’ny fahefan’i Jehovah sy ny heriny . Nitokiany fatratra ireo sampiny . Ambaran’ny mpaminany ny handravana ny fahefany sy ny hampitanjahana azy amin-kenatra lehibe (and3.5). Fahefana avy amin’ Andriamanitra samirery ny mametraka sy manaisotra ny olona amin’ny toeran’ny mpitondra sy mpanapaka . Fampitandremana ho an’izay rehetra mihevitra azy ho manam-pahefana izany mba hanaovany tsara ny asany amin’ny fahatahorana an’ Andriamanitra.

2-Izy no manafaka ny vahoakany

Jehovah no mpanavotra ny olony . Mampahatezitra an’i Jehovah ny fampijaliana atao amin’ny vahoakany , ary izao dia hanao valifaty tokoa Izy . « Hitondra famaliana Aho ka tsy hiantra olona » (and3 d). Tsy mahafoy ny olony izay mitaraina sy miverina Aminy Izy ka mamonjy azy amin’ny tànan’ny fahavalo . Tsy sitrak’ Andriamanitra ny fanompoan-tsampy . Hofaiziny sy hesoriny amin’ny fahefany izay mirehareha sy mihevitra Azy ho tsy misy ka mampijaly ny vahoaka voafidiny .

Fanontaniana:

Inona no andraikitry ny fiangonana manoloana ny fampahantrana sy fampijaliana mahazo ny vahoaka ?

Birao Sekoly Alahady FOIBE FJKM

Alatsinainy 29 Janoary 2018.

Manapaka amin’ny fahefany ny Tompo Matio 8.1-4

« Mety Aho , madiova ianao »

Tena sitrak’i Jesoa tokoa ny hahasitrana ny marary , ary manam-pahefana hahasitrana ny kara zana aretina izay heverin’ny olona fa tsy azo sitranina Izy . Inona kosa àry no tokony hataon’ny marary?

1-Manatona Azy (and2)

Na dia teo aza ireo vahoaka marobe manaraka an’i Jesoa (and1), mety nisy koa ny fanilikiliana sy ny fitsaran’olombelona noho ilay aretin-koditra . Tsy nahasakana azy hanatona an’i Jesoa izany rehetra izany . Ny fanatonana an’i Jesoa ihany no vahaolana . Aza mijery olona , aza mijery olana , fa manatona Azy.

2-Miankohofa eo anatrehany (and2)

Fantar’ilay marary fa afaka manasitrana azy ny Tompo raha sitrany izany , ka dia hoy Izy : »Tompo ô raha sitrakao dia hainao diovina aho » (and 2b-DIEM). Ka dia sitraky ny Tompo ny hanasitrana azy . Mivavaha ka manompoa Azy . Izany no fiankohofana eo anatrehany , maneke fa tsy mahavita na inona na inona isika . Raiso Jesoa hanam-pahefana sy ho mpanapaka ny fiainanao.

3-Mandehana miseho amin’ny mpisorona (and4)

Nirahin’i Jesoa ilay lehilahy mba hiseho any amin’ny mpisorona sy hitondra fanatitra . Manana andraikitra amin’izay rehetra nositranin’ny Tompo ny mpitondra fivavahana , ary izay nositranina kosa hivavaka sy hisaotra an’ Andriamanitra.

Fanontaniana:Rehefa marary mafy ny olona vao mitady an’i Jesoa . Nahoana ?Birao Sekoly Alahady FOIBE FJKM

Alahady 28 Janoary 2018.

Manapaka amin’ny fahefany ny Tompo Levitikosy 14.1-9

Mihevitra manokana ny marary ny Tompo

Teo amin’Israely dia ninoan’ny ankamaroan’ny olona fa endrika isehoan’ny famaizan’ Andriamanitra ny aretina . Isan’izany ny habokana . Noheverina ho maloto ara- pivavahana ny olona voan’izany ka natokana sy tsy navela hifangaro amin’ny vahoaka . Mampalahelo fa voahilikilika sy natoka-monina ireny olona ireny . Mihevitra manokana azy ireny ny Tompo ka manome andraikitra :

1- Ny andraikitry ny mpisorona (and2-7)

Na dia tsy dokotera aza ny mpisorona dia manana andraikitra amin’ny marary mba hizaha sy hamantatra ny karazana aretina misy sy ny fivoarany . Ankinin’ny Tompo amintsika fiangonana ny fijerena manokana ireny marary izay tsy mba afaka mamonjy fotoambavaka ireny noho ny toetr’ aretiny . Ilaina izany mba hiarovana ny fiparitahan’ny aretina amin’ny manodidina . Tsarovy fa nitondra ny aretintsika tokoa Izy . (Isa 53.4) .

2-Ny andraikitry ny marary (and8,9)Mila mikarakara tena koa ny marary (ilay hodiovina). « …ka hanasa ny fitafiany sy hanaratra ny volon-dohany rehetra ary handro amin’ny rano ka hadio izy » (and8,9). Tsy tokony hihevitra ny teneny ho enta-mavesatra mandrakariva ny marary , fa hanao izay azony hatao kosa izy mba ho fanampiana aamin’ny mpitsabo sy ny mpikarakara. Ilaina ny fahadiovana sy ny fidiovana araka izay azony atao , fa tsy hiandry fotsiny .Fanontaniana:Inona ny andraikitry ny fiangonana manoloana ny VIH/SIDA?Birao Sekoly Alahady FOIBE FJKM

Sabotsy 27 Janoary 2018.

Manapaka amin’ny fahefany ny Tompo

Isaia 45.1-5

Andriamanitra no mpamorona ny zavatra rehetra . Izy koa no Tompon’ny fahefana amin’ny firenena rehetra . Noho izany :1-Izy no manome fahefana ny olona izay antsoiny

Kyrosy dia mpanjaka jentilisa izay voalaza fa tsy mahalala an’i Jehovah akory , nefa dia nofidin’ Andriamanitra sy nirahiny . Mampiseho amintsika izany fa tsy miankina amin’izay mety ho fahalalan’ny olona na ny fankatoavan’ny olona an’ Andriamanitra ny fiantsoana . « Ary nomeko izany laza izany ianao na dia tsy nahafantatra Ahy aza » (and4b). Fahefana avy Aminy ny mifidy sy manendry olona ho amin’ny andraikitra iray sy mampahomby azy amin’izay rehetra ataony . Amin’izany dia Izy mihitsy no mialoha làlana amin’ny fanatanterahana ny iraka ampanaoviny , »tohanako ianao mba handresy firenen-kafa… Izaho mihitsy no handeha anoloanao » (and1.2a)DIEM .

2-Izy no manafaka ny olony

Misy antony sy dikany avokoa izay rehetra ataon’ny Tompo . Nomeny fahefana i Kyrosy mpanjakan’i Persia ka tonga mpandresy . Io fandreseny io no miantoka ny fanafahana ny vahoakan’Israely . « Noho ny fitiavako ny firenen’i Jakoba mpanompoko sy ny vahoaka Israely voafidiko no niantsoako anao tamin’ny anaranao…« (and4-DIEM) . Eo am-pelatànan’ny Tompontsika avokoa ny fahefana rehetra . Tsy misy mahasakana izay tiany hatao ho fanafahany sy fanavotany antsika .