03 Septambra 2017 – Ala.XIIman.Trin
Sal 25.1-7 / Mat 27.57-61 / Jak 5.13-18
Sal 25.1-7 / Mat 27.57-61 / Jak 5.13-18
Mandresy ny fijaliana ny vavolombelon’ny Tompo
Salamo 91.9-16
1-Manana mpiaro
Na eo aza ireo fahavalo sy ny loza manodidina antsika dia indro isika fa mbola mijoro , mandresy ireo fandrimpandrika maro samihafa . Mazava izao fa ny Tompo mihitsy no mandidy ny anjeliny mba hiaro anao eny amin’izay rehetra halehanao ». Manamafy izay Jesoa araka ny teniny hoe : « Izaho momba anareo mandrakariva ambara-pahatongan’ny fahataperan’izao tontolo izao » (Mat 28.20)
2-Afaka mandresy ny sarotra
Isan’ireo biby masiaka sy atahoran’ny olona ny liona sy ny vipera ary ny menarana. Omen’ny Tompo fahefana hanitsaka sy hanorotoro ireny isika . Ny fandresena ireny dia tafiditra ao amin’ny mason-tsivana ho famantarana ny mino , izay fandresena ny asan’ny devoly sy ny miaramilany izany .
3-Manana ho avy mamirapiratra
Mazava ny teny fikasana voalaza eto : « hovokisako fahela-velona izy » (and16). Miahy ny ankehitriny sy ny ampitsontsika ny Tompo . Fiainana maharitra lavitry ny tebiteby sy ny fanahiana no homaniny ho antsika .
Fanntaniana :
Hatraiza ny fahatsapanao ny fiarovan’ Andriamanitra ?
Birao Sekoly Alahady FOIBE FJKM
Ho anareo mpitendry zavamaneno sy mpikirakira zavamaneno eo anivon’ny FJKM . Asaina ianareo ho tonga amin’ny Fihaonambe natokana ho anareo .
Toerana : FJKM ANDRAINARIVO FAHASOAVANA
Daty : Alarobia 13-Zoma 15 Septambra 2017
Aoka samy hiomana amin`ny vidim-boky : Boky Fiofanana sy Boky Solfa hira Litorjika Laharana Faharoa
Hisy ny sakafo antoandro hamidy eny an-toerana
Mandresy fijaliana ny vavolombelon’ny Tompo
Jeremia 38.7-16
Efa nampiomana an’i Jeremia ny Tompo fa maro ireo fijaliana tsy maintsy atrehany , nefa hoy Izy hoe : « momba anao Aho , hamonjy anao Aho » Jer 1.8. Ny fanafahana sy fiarovana no nasehon’ny Tompo an’i Jeremia .
1-Fanafahana
Teo anatrehan’ny fanenjehana , fanagadrana , fandatsahana an-davaka dia naneho ny fahalehibiazany ny Tompo . Na dia eo aza ny fijaliana tsy maintsy atrehan’ny mpanara-dia ny Tompo dia tsy mitazam-potsiny Izy , fa manafaka amin’ny loza. Ebeda-meleka eto no fitaovana nentiny nanafahana an’i Jeremia . Andriamanitra dia tsy mitsahatra mikaroka ny fomba rehetra hanafahana antsika . Ny zanany lahitokana no antoka tsara indrindra amin’izany .
2-Fiarovana
Nanome toky i Zedekia mpanjaka ary nianiana fa tsy hanome na hanolotra an’i Jeremia eo an-tànan’ireo olona mitady ny ainy ireo . Sady manafaka ao anaty lavaka ny Tompo no miaro ny ain’ny mpanompony . Toky ho antsika izany fa misy olona efa omanin’ny Tompo izay hitondra vahaolana azo antoka ho antsika . Porofon’ ny teniny izany manao hoe : « hamonjy anao Aho »
Fanontaniana :
Tanisao ireo toe-javatra efa niainanao nanehoan’ny Tompo ny fiarovana sy ny fanafahany anao ?
Birao Sekoly Alahady FOIBE FJKM
Mandresy ny fijaliana ny vavolombelon’ny Tompo
Salamo 4.1-8
1-Mahazo valimbavaka
Manome safidy malalaka ny Tompo ho an’ny tsirairay . Tsy tokony hadinontsika anefa ny herin’ Andriamanitra fa tena azo ianteherana tokoa , na dia potika sy rava aza ny zavatra rehetra , ary na eo aza ny fijaliana sy ny fahoriana , ny Tompo eo mandrakariva . Jehovah hihaino raha miantso Azy Aho (Sal 4.3) , tsy miova omaly sy anio ary mandrakizay Izy ka mamaly vavaka . Mampanantena ny Tompo fa ho avy ny fotoana izay hanavahany ny tsara sy ny ratsy , ary ny tsara izay ankasitrahany dia hiaina amin’ny fiadanana sy fifaliana mandrakizay .
2-Mandresy ny fahotana
Misy ny sasany , izay milaza azy ho mpanompo kanefa miaina ao anaty faharatsiana . Toa zary endrika ivelany ihany ny maha- kristiana kanefa manara-po amin’ny filàna maro samihafa ary miaina amin’ny tsy fahamarinana , manjary manala baraka an’i Kristy . Tia zava-poana . Miala amin’izany ny tena mpanompon’ Andriamanitra araka ny baiko hoe : « tezera fa aza manota » (Sal 4.4).
Fanontaniana :
Inona avy ireo fepetra sy dingana mba handraisana valim-bavaka ?
Birao Sekoly Alahady FOIBE FJKM
FANASANA
« ary aoka isika hifampandinika hampandroso ny finoana sy ny asa tsara . Fa Jobily izany ka ho masina ho anareo » (Heb 10.24;Lev 25.12a)
Ny Fihaonamben’ny Reninjaza Kristiana dia hotanterahina ny Alakamisy 14 – 17 Septambra 2017 eny amin’ny FJKM AMBOHIMALAZA Kanana Vaovao sy ny sekoly FJKM Vinet Ambohimalaza (SP 12).
Toy izao ny andinindiny :
-Fahatongavan’ny mpizaika : Zoma 15 Aogositra , 8ora maraina
-Fanompoampivavahana fanokafana : 10 ora maraina , FJKM Ambohimalaza K.V
-Famaranana : Alahady 17 Aogositra aorian’ny sakafo atoandro .
Samia mitondra Baiboly sy fihirana , fitaovam-panoratana , fanafody mitaiza , fitaovam-pihinanana , fitaovam-pidiovana , firakotra mafana , lafika fatoriana , lambaoany sy izay mampiavaka ny faritra .
Sarandasy : 50 000 Ariary / olona
vidimboky : 5000 Ar
Samy manao izay hahatongavany eny an-toerana
Mandresy fijaliana ny vavolombelon’ny Tompo
Genesisy 45.23-27
1-Mila mpamonjy
Ny fijaliana voalaza ato dia ny mosary . I Josefa no nirahin’ Andriamanitra hitondra vahaolana manoloana izany . Ny fitsinjovantsika ny ampitso amin’ny alalan’ny tahiry no vahaolana nentiny . Tandindon’i Kristy i Josefa eto . I Kristy , izay nanampy ny olona handresy ny mosary tamin’ny alalan’ny fahagagana nataony . Ao Aminy no misy fiainana be dia be (Jao 10.10). Miditra an-tsehatra amin’ny fiainana andavanandrontsika ny Tompo: manasitrana ny aretina Izy , mamoky ny noana ary manendry olona hitondra vahaolana . Misy vokatra amin’ny fiainantsika andavanandro sy ny ankehitrinintsika ny famonjen’ Andriamanitra ;
2-Mila fanolorantena
Rehefa voavonjy tamin’ny alalan’i Josefa ny olona dia nanolotena ho mpanompon’i Farao .Araka izany , izay mahatsiaro ny famonjen’i Kristy dia mila manolotena ho Azy . Izy rahateo nilaza fa izay manatona Azy tsy mba holaviny mihitsy (Jao 6.37). Ny fitia mifamaly mahatsara fihavanana . Midika fitiavantena ihany raha toa ka nandray fahasoavana avy amin’ny Tompo , nefa sady tsy mahay mankasitraka no tsy nanolotena ho Azy .
Fanontaniana:
Inona no valimpitia omentsika ny Tompo noho ny famonjeny antsika ?
Birao Sekoly Alahady FOIBE FJKM
Mandresy fijaliana ny vavolombelon’ny Tompo
2 Korintiana 1.3-7
1-Ahazakana fahoriana
Raha jerena dia miverina imbalo ny teny hoe: « mampionona na fampiononana » eto .Eo anatrehan’ireo mitondra fahoriana sy fijaliana dia vao mainka mihamahery ny mpiara-dia amin’ny Tompo . Manampy azy ireo hahazakany fahoriana ny fampiononana azy ireo . Ny teny hoe: « mampionona » dia midika hoe: mitoetra eo anilan’ny olona anankiray ka mampahery sy manampy azy eo anaty fotoam-pahasahiranana . Andriamanitra no tena mahatanteraka izany andraikitra izany amin’ny fanirahany ny Fanahy masina hitondra fampiononana ho an’ny zanany .
2-Manorina fanantenana
Niainan’i Paoly teo amin’ireo zava-manahirana maro efa nitranga teo amin’ny fiainany fa tsy misy fahoriana mihitsy na dia ireo izay tena maharary indrindra aza, afaka hampisaraka ny mpino amin’ny fanantenana sy ny fikarakaran’ny Tompo . Manomana valimpitia lehibe ho azy ny Tompo . Toy izany koa isika arakaraka ny handalovantsika fotoan-tsarotra no vao mainka velombelona ny fanantenantsika handresy .
Fanontaniana :
Lazao ireo andinin-tSoratra masina ho fampaherezana ireo mandalo fijaliana
Birao Sekoly Alahady FOIBE FJKM
Tatitra fiofanana
Notanterahina ny 24 -25 Aogositra 2017 , teny amin’ny CFD Ampandrana ny fiofanan’ ireo Talen-tsekoly miisa 13 , ao amin’ny Faritra Analamanga , ny mpikambana ao amin’ny ny Foibe Fitondran-tSekoly ary ireo nasaina manokana hanatrika izao fiofanana izao toy ny tomponandraikitry ny Tranokalampifandraisana (AFIFAB / FJKM ) .
Izao fiofanana izao dia nokarakarain’ny Foibe Fitondran-tSekoly sy ny CBM (Christoffel Blinden Mission) TETIKASA MAHAY , mivoy indrindra ny « Fanabeazana Mampiaty » ho amin’ny « fahombiazan’ny ankizy tra-pahasembanana ».
Novelabelarin’ ny Mpitandrina Andriamampianina Zaka ,BMF FJKM sy Randrianarivony Radasy Rolland , mpandrindra MAMPIATY FLM ,nandritra ny roa andro ny mikasika ny LEADERSHIP sy ny MANAGEMENT .
Saiky voaresaka tamin’izany : izay tsara ho fantatra momba ny FITARIHANA ( ny toetra fito maha- mpitarika , ny karazana mpitarika , ny fifampitokisana … )sy ny FITANTANANA ( ny asan’ny mpitantana , « ireo Nahoana miisa dimy »…) .Ny tanjona dia ny ho fanatsarana ny fandraisana ireo ankizy tra- pahasembanana ao amin’ny Sekoly FJKM ,ho fanamafisana ny fahaiza-manaon’ny mpitarika ho amin’ny fahombiazan’ny « fanabezana mampiaty » (Education Inclusive).
Marihana fa mbola hitohy sy hihitatra hatrany amin’ny faritra samihafa eto Madagasikara izao fiofanana izao, mba hahatratra ireo tommponandraikitry ny Sekoly FJKM ,ho fampandehanana izao tetikasa vaovao eo anivon’ny Fiangonana FJKM izao .
Nangonin-dRamatoa Sahondra
Mandresy fijaliana ny vavolombelon ‘ny Tompo
Jaona 16.25-33
1-Manana mpihaino vavaka
Hoy i Jesoa :« Amin’izany andro izany dia hangataka amin ‘ny anarako hianareo, ary tsy milaza aminareo aho fa Izaho hangataka amin’ny Ray ho anareo » (Jao 16.26) . Mahantra tokoa ny kamboty fa tsy mba manana hitarainana , mahatsiaro ho manirery . Tsy mba toy izany isika fa eo i Jesoa sady mihaino vavaka no mitady ny fomba rehetra hahazoantsika valimbavaka . Tafita any amin’ny faratampony ny hetahetantsika ary vonona hanaporofo hatrany ny fitiavany antsika Izy (Jao 16.27). Sady mihaino Izy no vonona hitondra valimbavaka .
2-Miaraka amin’ny mpandresy
Mahafehy tsara ny sehatra sy ny olana misy eo amintsika ny Tompo . Na mosary , na fanenjehana , na fanalambaraka , na fijaliana eny hatramin’ny fasana aza dia efa resiny . Hamafisiny izany manao hoe: « aty amin’izao tontolo izao no ahitanareo fahoriana , nefa matokia , hoy Izy , Izaho efa naharesy izao tontolo izao « . Toky no omeny antsika . Ny hany andrasana amintsika dia ny fanankinana feno eo Aminy ny fiainantsika .
Fanontaniana:
Hatraiza ny fahavitrihanao manambara ireo valimbavaka efa azonao taimn’ny Tompoko ?
Birao Sekoly Alahady FOIBE FJKM
| |
19. PENTEKOSTA – Mpiasa Foibe FJKM
Isaia 61. 1–3 | Jaona 3. 1–8 | Asan'ny Apostoly 4. 8–12
| |
26. Ala. Trinite – Alahady FFPM
Genesisy 11. 1–9 | Jaona 14. 15–21 | 2Korintiana 13. 11–14
| |
02. Ala. I man. Trinite
Salamo 44. 1–8 | Matio 12. 1–8 | 2Timoty 4. 16–18
| |
09. Ala. Il man. Trinite – SEKOLY FJKM
Ohabolana 22. 17–23 | Jaona 6. 34–40 | Efesiana 4. 11–16