Talata 31 Janoary 2017
<
Mois : janvier 2017
Alatsinainy 30 Janoary 2017
VAVOLOMBELONA MAHATOKY NY TOMPO
Eksodosy 4.1-8
Aza matahotra !
Natahotra mafy i Mosesy rehefa nirahin’ Andriamanitra . Mety ho tojo ny tahaka izany koa isika rehefa irahin’ Andriamanitra , nefa aza matahotra .
1-Ampy ho antsika ny teniny
Noho ny fisalasalan’i Mosesy no nanehoan’ Andriamanitra famantarana taminy , mba handresy lahatra azy sy hanaisotra ny fisalasalany . Hoa an’ny tsy mino sy misalasala amin’ny Tenin’ Andriamanitra ny famantarana . Tsara raha tsy manahaka an’i Tomasy isika fa izy no nilazan’i Jesoa ho:« sambatra kosa izay tsy nahita nefa nino » (Jao 20.29). Koa aza matahotra rehefa irahin’ ny Tompo . Esory ny fisalasalana fa ampy ho anao ny teniny .
2-Manome famantarana ampy ho antsika ny Tompo
Fantatry ny Tompo ny fahalementsika , tahaka ny fahalemen’i Mosesy ihany .Nomeny famantarana tokoa i Mosesy , ary isika koa . Zava-dehibe ny Batisa sy ny Fanasan’ny Tompo izay sady Tenin’ Andriamanitra hita maso sy azo tsapain-tànana no famantarana hita maso hanamafy orina ny finoantsika (1 Kor 11.24) . Aza mitady fahagagana hafa intsony , fandrao midika ho tsy fatokiana sy tsy finoana an’ Andriamanitra izany .Ilay Andriamanitra tsy miova , ary mahatoky amin’ny Teniny no maniraka antsika . Koa « aza matahotra » . Antoky ny fahombiazana eo amin’ny iraka ampanaovin’ny Tompo ny fahatsapana fa tsy miova Izy (Heb 13.8), ary ao amin’ny Teniny no hanamarinany izany mandraka ankehitriny . Noho izany , ianao koa : « Aza matahotra »
Fanontaniana
Inona no antony mampisalasala anao tsy hanao ny asan’ Andriamanitra ?
Birao Sekoly Alahady FOIBE FJKM
Alahady 29 Janoary 2017
Vavolombelona mahatoky ny Tompo
LIOKA 4.23-30
Mijoro vavolombelona i Jesoa
Efa nambara tamin’ity volana Janoary ity tamin’ny alalan’izao Mofonaina izao fa vavolombelona amin’ny tsara ataontsika , na amin’ny toetra sy fomba ratsy asehontsika ny Tompo .
Vavolombelona Izy amin’ny fombàny sy fiarahany amintsika mandrakariva. Ny vavolombelona dia sahy manambara ampahibemaso izay hitany sy reny tamin’ny trangan-javatra iray. Ny fiainan’I Jesoa teto an-tany , ny nataony nanoloana ny mpiray tanàna sy mpiara-belona taminy dia nahazoany nijoro ho vavolombelona tamin’izay hitany sy reny teo amin’ny fiaraha-monina . Noho izany dia sahy nanambara ampahibemaso ny fahitany ny fihetsiky ny mpiara-belona sy ny fiaraha-monina Izy .
-Vavolombelon’ny tsy finoana sy ny tsy fahaizantsika mankasitraka Izy (and23-24) . Hitany izany !
-Vavolombelon’ny hamafin’ny fontsika tsy mety mandray ny famonjena Izy ka izany no hamindra ny famonjena tokony ho antsika ho an’ny hafa (and 25-27), zahao Apo 2.5) . Miharihary eo anatrehany koa izany ka mahaiza mandray .
-Vavolombelon’ny tsy fahazakantsika ny “fampianarana tsy misy kilema” ny Tompo , ka mahita antsika tezitra sy misafoaka rehefa ambara mazava ny Tenin’ny Tompo (and28-30) . Tsy miafina Aminy koa izany .
Manoloana izany , dia aoka tsy ho faly fotsiny isika amin’ny hoe: miaraka amiko ny Tompo , fa vavolombelona koa Izy ary mahita tsara ny toetrantsika .
Fanontaniana:
Inona amin’ireo voalaza ireo no mbola toetrantsika koa?
Birao Sekoly Alahady FOIBE FJKM
Hafatry ny Filoha Jan 2017
Vontosy Filazantsara ny Nosy Madagasikara !
Isaorana ny an’i JESOA KRISTY tokoa ny nahatontosana ny fotoan-dehibe teny Antsonjombe tamin’ny Alahady 15 Janoary 2017 teo. Ho Azy Andriamanitra irery anie ny voninahitra!
Tamin’izany moa no nanaparitahana voalohany ny trakitra izay natao ho fitaovana hoenti-mitory ny Filazantsara. Marihina fa sady tsy natao hasolo ny fitaovana rehetra efa nampiasaina hatramin’izay izy io no tsy ny hoe ny hany fitaovana azo ampiasaina akory; fa natao kosa ho fanampiana amin’ny fanaingana izao ezaka lehibe ataontsika izao.
Indro atolotra eto ny ventin’ny fanofanana tsotra nomena teny Antsonjombe ny amin’ny Fomba ampiasa ny trakitra “VAOVAO MAHAFALY HO ANAO”.
A-Raiso ho an’ny tenanao aloha izy: vakio dia ataovy izay itarihany anao, mba ho anao aloha no ho vonton’ny Filazantsaran’i Kristy.
B-Dia zarao amin’ny hafa amin’izay avy eo:
ka izao no azo anaovana azy:
1-Ento tsy hahasaraka anao izy
Raha azonao atao, asio trakitra iray tsy mahasaraka anao any anaty kitapo na paosy na poketranao any, rehefa mandeha ianao.
2-Mivavaha mba hitarihan’ny Fanahy Masina anao
Ny Fanahy Masina no tompo-marika amin’ny olona tokony hohatonina hitoriana an’i Jesoa (Asa 8.2; 16.6, 7).
3-Resaho tsotra amin’ny olona izy
Tsarovy fa resaka tsotra no nataon’i Jesoa tamin’ny olona nanatona Azy (Jao. 3.1 snm), na niresahany teny am-pantsakana (Jao. 4, 7 snm). Anontanio izy raha efa nahita ilay trakitra na tsia. Raha tsia, anontanio izy raha tiany ny hanazavanao aminy izany ao anatin’ny fotoana fohy. Raha manaiky izy dia iaraho mamaky sy mijery aminy ilay trakitra.
4-Ny takila resahina ihany no ataovy eo anoloana
Aforeto hatrany ilay trakitra rehefa ampiasaina. Hazavao tsotra ny sary sy ny hevitra ambara eo.
5-Ampandraiso anjara ny olona iresahana
Raha mahay mamaky teny izy dia asaivo vakiny ny Soratra Masina ao amin’ny trakitra.
6-Ezaho hatao feno ny fampiasana azy
Vakio hatrany amin’ny farany. Rehefa tonga eo amin’ilay vavaka, dia vakio aminy aloha izay voasoratra eo, dia anontanio izy raha tiany ny hanao izany vavaka izany ho mariky fanekeny handray an’i Jesoa. Raha manaiky izy dia angataho izy hamerina izay vakinao. Mariho aminy tsara mba hataony amin’ny fony tokoa izany vavaka izany. Dia ataovy mihitsy ilay vavaka fandraisana an’i Kristy, fa aza dinganina!
7-Taomy fa aza terena handray an’i Kristy ny olona
Raha tsy afaka hiresaka na tsy manaiky handray izy, aza tezitra! Isaory amim-panajana sy fitiavana izy.
8-Ampio hitombo ara-panahy ny olona nandray an’i Kristy
Ataovy izay hanatonany Fiangonana. Tsy mitaona olona ho FJKM isika fa mitaona olona ho an’i Kristy, saingy raha te hanaraka antsika izy dia raiso amin’ny fifaliana sy ny fitiavana tsara (Marihina fa misy bokikely hoe : Talaky mandeha sy Rononom-panahy, afaka hanampy anareo ny fitaizam-panahy ho an’ny olona vao nandray an’i Kristy. Jereo ao amin’ny Fivarotam-boky Antso).
9-Ataovy fanomezana ho an’ny olona notaomina ny trakitra
Rehefa vita ny resaka dia azonao omena azy iny trakitra iny mba hiverenany manamasaka azy sy hitaomany ny hafa koa. Tsy maninona na voatery hividy vaovao indray aza ianao, fa tsy voavidin’ny 200 Ariary ny fanahin’olona voavonjy tamin’ny fitoriana nataonao!
10-Araho vavaka hatrany ny asa
Samy tsarovy amim-bavaka na ny trakitra nozaraina, mba tsy ho verivery foana, na ilay olona notaomina, mba tena haharitra ho an’i Kristy!
IRAKO ANDRIAMAHAZOSOA Ammi, Mpitandrina
Filohan’ny FJKM
Sabotsy 28 Janoary 2017
ISAIA 45.20-25
Vavolombelona mahatoky ny Tompo
Andriamanitra manambara ny tenany ny Tompo . Fijoroana ho vavolombelona miezinezina ny amin’ny maha- izy azy no ataon’ Andriamanitra eto . Vavolombelona mahatoky Izy satria :
1-Andriamanitra tokana sady Mpamonjy (and21-22)
Tsy sampy Andriamanitra ary tsy mitovy amin’ny sampy ihany koa Izy . Jehovah dia Andriamanitra tokana sady tsy manam-paharoa. Ampahatsiahivina eto indray izany mba hananan’ny mpino fahatokiana fa Izy irery ihany no manana ny hery ho enti-mamonjy sy manafaka . Jesoa no endrik’ Andriamanitra tokana , nirahin’ny Ray hanatanteraka ny famonjena antsika teo amin’ny Hazo fijaliana. Mazava ny fanambaran’ny Soratra masina : « Tsy misy famonjena amin’ny hafa…izay hahazoantsika famonjena » afa-tsy ny Anaran’i Jesoa Kristy irery ihany (Asa 4.12) . Andriamanitra tokana sady Mpamonjy tokana no antsika .
2-Mahatoky amin’ny teniny Izy , hanamarinanay izay manatona Azy (and23-25)
Andriamanitra mahatoky ny Tompo , na amin’ny ataony sy ny asany na amin’ny teniny . Tsy mba miala na mivadika amin’ny teniny Izy . Efa nanaiky ny hamonjy antsika Izy ka mitaona antsika mba hanatona Azy , handraisantsika ny fanamarinana antsika . Notanterahan’i Jesoa izany fanamarinana antsika izany . Tonga marina sy natao ho marina isika ao amin’i Jesoa . Ivelan’i Jesoa dia tsy misy fanamarinana ny mpanota . Tenin’ Andriamanitra izany , ary marina sy tsy miova , satria mahatoky amin’ny teniny ny Tompo , hanamarinany izay manatona Azy‘(Kor 6.11).
Fanontaniana :
Ahoana no ahazoantsika fanamarinana maimaimpoana ?
Birao Sekoly Alahady FOIBE FJKM
Zoma 27 Janoary 2017
Vavolombelona mahatoky ny Tompo
2 Korintiana 1.17-20
Ny fanapariahana ny Filazantsaran’i Kristy
1-Mitaona antsika tsy hanao kitoatoa na hisalasala
« Raha nikasa izany aho , moa nanao kitoatoa ? ». Nikasa ny handalo any Korinto indray izy ary nilaza ny fandaharam-potoanany . Nisy olona nanaratsy sy nanohitra azy , ka nilaza fa tsy sahy nandalo any i Paoly. Izany no nolazainy fa tsy kitoatoa ny teniny , na misy fisalasalana sy fanelezana ny Filazantsara . Ny fisalasalana no fahavalon’ny finoana , ka tandremo .
2-Mitaona antsika hanahaka an’i Jesoa
Vavolombelona mahatoky amin’ny fankatoavana an’ Andriamanitra i Jesoa . Hatramin’ny fahafaresana teo amin’ny hazo fijaliana no nanehoany izany (Jao 4.34), satria « eny », mariky ny fankatoavana hatrany ny Azy fa tsy mba misy « tsia » , fandavana . Ambara eto aza ny « Amen,milaza fanatanterahana , mba tsy ho « eny »am-bava sy eo imolotra ihany. Izany no nataon’i Jesoa . Koa ataovy marika alain-tahaka Izy .
3-Mitaona antsika hanahaka ireo mpitory zokintsika
I Paoly Apostoly sy ireo mpiara-dia taminy no horaisina ho Mpitory zokintsika . Nambarany fa nanahaka ny an’i Jesoa izay toriany izy . Tsy niroa teny izy ireo . Niezaka nankato tahaka an’i Jesoa , teo amin’ny fitoriana , na dia niharan’ny fanenjehana aza izy . « Eny », fankatoavana hatrany no nasehony mba ho Voninahitr’ Andriamanitra , ka hoy izy : »Aoka hanahaka ahy ianareo dia tahaka ny anahafako an’i Kristy « (1 Kor 11.1) . Fomba ahazoantsika manapariaka sy mampiely ny Filazantsara izany .
Fanontaniana :
Mety amin’ny kristiana ve ny miroa teny ? Nahoana ?
Birao Sekoly Alahady FOIBE FJKM
……………… ……………………………………………………….
Alarobia 25 Janoary 2017
Vavolombelona mahatoky ny Tompo
1 Jaona 5.18-21
Ny Zanak’ Andriamanitra
Ny mpino dia olona efa naterak’ Andriamanitra indray tamin’ny alalan’ny Batisa . Noho izany dia efa tonga Zanak’ Andriamanitra . Ny zanak’ Andriamanitra dia:
1- Mankahala fahotana (and 18-19 )
Sady tsy minia manota ny Zanak’ Andriamanitra no miaro ny tenany amin’ny ratsy ihany . Nijoro ho vavolombelona mahatoky tamin’izany i Jesoa fony tonga teto an-tany ka tsy mba nanota Izy na nikambana tamin’ny ratsy . Tsy mankahala ny mpanota i Jesoa fa mankahala ny ota . Ilaina ho toy izany koa isika , amin’ny maha-olona efa naterak’ Andriamanitra tamin’ny Batisa , satria efa tonga zanak’ Andriamanitra isika. Koa ankahalao ny ota , aza miray amin’ny asan’ny maizina tsy mahavoka-tsoa .
2-Miaro tena amin’ny sampy (and20-21)
« Arovy ny tenanareo amin’ny sampy » (and21) . Fehin’ny Epistily voalohany nosoratan’i Jaona izany fiarovan-tena amin’ny sampy izany . Sampy avokoa izay rehetra itokiantsika mihoatra noho Andriamanitra . Ny fiarovan-tena amin’ny sampy dia ny finoana sy fahatokiana ny Tompo . Ny Tenin’ Andriamanitra no mitondra finoana ka mitaona antsika hatoky sy hanantena an’ Andriamanitra . Raha sanatria , foana ny finoana sy ny fanantenana ao amintsika dia hirona ho azy hanompo andriamanin-tsy izy isika . Koa hatanjaho ny finoana , mitodiha amin’ny Soratra masina sy ny Tenin’ Andriamanitra hamantaranao ny sitrapon’ Andriamanitra fa fomba iray iarovanao tena amin’ny sampy izany .
Fanontaniana:
Inona no ataonao raha sendra latsaka ao anatin’ny fahotana ianao ?
Birao Sekoly Alahady FOIBE FJKM
Talata 24 Janoary 2017
Vavolombelona mahatoky ny Tompo
Isaia 46.3-7
Mahatoky sy tsy miova ny Andriamanintsika
1-Manasa antsika hihaino Azy Izy
Asain’ny Tompo mihaino azy ny vahoakany (and3). Ilaina tokoa ny fahaizantsika mihaino Azy . « Isika » , satria enti-milaza ny vahoaka voafidy ny hoe: « taranak’i Jakoba », ka isika fiangonana ankehitriny no tondroina amin’izany . Henoy Izy ! Raha mihaino ny Tompo isika dia ho tsapantsika fa mahatoky sy tsy miova amin’ny teniny Izy . Mahatoky , na amin’ny heriny na amin’ny toetrany ny Tompo Andriamanintsika . Matoa isika tsy mahatsapa izany dia isika no manenti-tadiny na manadino ny teniny .
2-Mahatoky amin’ny famonjeny Izy
Hatramin’ny fahazazana ka mandraka antitra dia tsy miova amin’ ny fitiavany Izy ka mamonjy antsika sy misahirana amintsika. Ny vahoakan’ Andriamanitra na ny Zanak’Israely mantsy dia heverina ho zaza tamin’ny andron’ny Patriarka. Ny andron’ny fahatanorany kosa dia fony izy tany anefitra avy tany Egypta , ary ny fiainany rehetra taty aoriana no fahalehibiazany , ny andro ho avy rehetra no fahanterany . Tsy miova amin’ny fitiavany ny Tompo . Tsy tantaran’ny lasa sy ny fahazazantsika ihany ny famonjeny , fa tsy miova Izy mandra-pahantintsika ary mbola vonona hisahirana amintsika hatrany Izy . Ny toetrany mahatoky amin’ny famonjeny no nanirahany an’i Jesoa zanany no tonga olona niara-nonina tamintsika mba ho akaikintsika hatrany ka hamonjy antsika amin’izay manjo antsika .
Fanontaniana:
Inona no ifandraisan’ny hevitra voalaza eto amin’ny hira FFPM 3 and 1? Hazavao sy ifampizarao
Birao Sekoly Alahady FOIBE FJKM
Alahadin’ny Foibe Arsiva sy Tranombakoka FJKM 2017
Vavolombelon’ny fanekena ny Tompo
Alahady 19 Febroary 2017
FANDAHARAMPOTOANA
Fidirana : na Feon-javamaneno Antoko mpihira
Fiarahabana Apostolika : 1 Tim 1/2b Amena
Fiantsoana ny Anaran’ Andriamanitra : Salamo 119/11-18
Hira 1.1,4
Vavaka fiderana
Sitrapon’ Andriamanitra : Matio 22.37-39
Sambatra ny mahitsy làlana …
Hira 242 :1,4
Vavaka fifonana : Hira 439 : 2,3
Famelankeloka / 2 Tim 6. 11-12
Sambatra ny olona izay voavela ny helony …
Hira 428.4
Fanekempinoana lah 3
Feonjavamaneno na Antoko mpihira
Hafatra avy amin’ny Foibe Arsiva sy Tranombakoka Raharahan’ny fiangonana
Fanatitra (Antoko mpihira)
Fanolorana ny fanatitra :
Hira 443.2
Fankalazana ny Tenin’ Andriamanitra
Hira 6.1
5mn ‘ Sekolin’ny Tenin’ Andriamanitra
Hira 133.1,4
Vavaka sy Soratra masina
Lev 26 :40-45/ Mat 22 :34-40 / 1 Tim 6.11-16
Hira 176.1,2
Toriteny : (Hira Antoko mpihira)
Vavaka fangatahana +vavaka nampianarin’ny Tompo
Asa vavolombelona
Hira 427.1,2, 3
Tsodrano : 1 Tes 5.23-24
Ho an’ Andriamanitra ny Voninahitra . Amena
………………………………….
HAFATRA
Koa aza menatra ny ho vavolombelon’ny Tompontsika « 2 Tim 1.8a
Ry Havana ,
Faly miarahaba antsika rehetra nahatratra ny Noely 2016 sy ny taona vaovao 2017. Isaorantsika Ilay Andriamanitra Tsitoha , nitantana sy mivimbina hatrany ny fiainantsika . Vita soamatsara ny Synoda lehibe faha XVIII izay notanterahana tany Antsirabe . Maneho ny asan’ Andriamanitra velona izay mandray anjara ao anatin’ny tantara izany ka miantso sy mifidy ny mpanompony hiara- hiasa aminy .
Tsarovantsika amin’ity taona 2017 ity koa ny faha- 120 taona nahafatesan’i BENJAMIN ESCANDE sy i PAUL MINAULT izay nijoro hatramin’ny farany ho fiarovana ny fivavahana Protestanta, indrindra koa ny faha- 50 taonan’ny FJKM izay hosokafana amin’ny volana Aogositra ho avy izao any Antsiranana .
Mahereza àry ry havana miaina , manoratra , manangona ny tantara mba hananantsika fahasahiana hatrany tsy ho menatra ny ho vavolombelon’ny Tompontsika Ilay tsy miova omaly sy anio ary ho mandrakizay .
Entanina ny Mpitandrina sy ny fiangonana mba samy hanao fandrotsahana ny rakitra amin’ ny Alahadin’ny ARSIVA ho an’ny Foiben’ny Arsiva sy ny Tranombakoka FJKM eto Faravohitra na arotsaka amin’ity kaonty ity :
BNI Madagascar kaonty n° 01 044929 020 0 00 Association FOIBE FJKM Bibliothèque Archives BP 623 101 Antananarivo . Na apetraka ao amin’ny Foibe SAF/FJKM .
Tolorana fisaorana manokana ireto fiangonana ireto izay nandrotsaka ny anjara rakitra ny taona 2015 sy ny taona 2016 . Aza misalasala mifandray aminay raha misy fanamarihana tianareo atao .
Ny Filohan’ny Komity
RAHAJARY R. Tsialoninarivo
Ny Tale
RALISON R. Fara Fanja
Alatsinainy 23 Janoary 2017
Vavolombelona mahatoky ny Tompo
Jaona 5.19-23
Vesarina fiampangana roa i Jesoa ato amin’ny Jaona 5, satria nahasitrana tamin’ny sabata Izy , manao ny tenany ho mitovy amin’ Andriamanitra Izy . Mamaly ny fiampangana Azy i Jesoa amin’ity Mofonaina ity .
Vavolombelona amin’ny tenany i Jesoa
1-Ambarany fa iray ihany Izy sy ny Ray amin’ny asany
Tsy miteny mivantana izany i Jesoa , kanefa mazava ny tiany holazaina . Izay ataony dia izay hitany fa ataon’ny Ray ihany . Tsy mamorona asa hafa ivelan’izay ataon’ny Ray i Jesoa (and19a). Koa raha manamasina amin’ny sabata i Jesoa dia tsy hafa noho ny asan’ Andriamanitra izany . Eo amin’ny asany dia iray ihany i Jesoa sy ny Ray .
2-Ambarany fa manana andraikitra manokana Izy .
Ny Sal 7 no milaza fa mpitsara marina ny Ray , ary averin’ny Heb 12,23 izany . Ambaran’i Jesoa eto , fa efa nomen’ny Ray Azy io andraikitra io (and22). Vavolombelona manambara ny tenany i Jesoa fa mitovy Izy sy ny Ray. Isika ankehitriny amin’ny maha- kristiana antsika dia aseho sy ambara amintsika ao amin’ny Soratra masina izany fijoroana ho vavolombelona ataon’i Jesoa Kristy izany . Koa minoa , aza misalasala ny amin’i Jesoa Zanaky ny Ray . Andriamanitra , tonga hanome fiainana ho an’izao tontolo izao , ary isika no mahazo tombony amin’izany , satria Mpamonjy antsika Izy , fa tia ny olombelona rehetra hovonjena (1 Tim 2,3,4).
Fanontaniana:
Misy fivavahana milaza an’i Jesoa ho Zanaka ka eo ambany fahefan’ny Ray . Ahoana , hoy ny Soratra masina ?
Birao Sekoly Alahady FOIBE FJKM
