MIOMANA AMIN’NY FIAVIAN’NY TOMPO
Mofonaina anio: Alahady, faha 01 Novambra 2026
Sal.91,14-16 / Hira 167 / Vavaka / Mofonaina / Vavaka / Hira 489
Genesisy 6,9 - 22
9 Ary izao no tantaran'i Noa: Noa dia lehilahy marina sady tsy nisy tsiny teo amin'ny olona niara-belona taminy; eny, niara-nandeha tamin'Andriamanitra Noa. 10 Ary Noa niteraka zanaka telo mirahalahy , dia Sema sy Hama ary Jafeta. 11 Ary simba ny tany teo anatrehan'Andriamanitra sady heni-doza; 12 dia hitan'Andriamanitra ny tany, ka, indro, efa simba izy; fa ny nofo rehetra samy efa nanimba ny lalany avy tambonin'ny tany. 13 Dia hoy Andriamanitra tamin'i Noa: Ny faran'ny nofo rehetra efa mby eto anatrehako, satria efa heni-doza ny tany noho ny amin'olona, ka, indro, efa handringana azy mbamin'ny tany Aho. 14 Koa manaova sambo-fiara ho anao amin'ny hazo gofera; ary hasianao efitrefitra ny sambo-fiara, ka hopetahanao dity ao anatiny sy eo ivelany izy. 15 Ary toy izao no hanaovanao azy: hakiho telon-jato ny lavan'ny sambo-fiara, hakiho dimam-polo ny sakany, ary hakiho telo-polo ny hahavony. 16 Ary hasianao fidiran'ny mazava ny sambo-fiara, ary amin'ny hakiho iray no hahavitanao azy hatreo ambony; ary hasianao varavarana ny rindrin'ny sambo-fiara ; hataonao efitra telo mifanongoa izy. 17 Ary, indro, Izaho efa hahatonga ny safo-drano ambonin'ny tany handringana ny nofo rehetra izay manam-nofonaina ambanin'ny lanitra; dia ho faty izay rehetra eo amin'ny tany. 18 Nefa kosa haoriko ny fanekeko aminao; ary hiditra ao anatin'ny sambo-fiara ianao sy ny vadinao aman-janakao mbamin'ny vinantonao vavy miaraka aminao. 19 Ary ny zava-manan'aina rehetra, dia ny nofo rehetra, hitondranao roa avy isan-karazany ho ao anatin'ny sambo-fiara, hovelomina miaraka aminao; ho lahy sy vavy avy ireo. 20 Ny vorona, samy araka ny karazany avy; ary ny biby, samy araka ny karazany avy, ary ny biby rehetra izay mandady na mikisaka amin'ny tany, samy araka ny karazany avy, dia, roa avy samy araka ny karazany avy, dia roa avy isan-karazany no hankeo aminao hovelomina. 21 Ary analao ho anao ny zavatra rehetra izay mety ho fihinana, ka angòny ho eo aminao; dia ho fihinana ho anao sy ho an'ireo koa izany. 22 Dia nataon'i Noa izany; araka izay rehetra nandidian'Andriamanitra azy no nataony.MIOMANA AMIN’NY FIAVIAN’NY TOMPO
Ho avy ny Tompo ka handrigana ny ratsy. Saingy izay tsara toa an’i Noa ho vonjeny satria tsara fifandraisana:
1- Tsara fifandraisana amin’ny olona
Ny faharatsian’ny olona iray dia miseho eo amin’ny fifandraisana aminy. Voalaza fa ratsy avokoa ny tao an-tsain’ny olona mandritra ny andro tamin’izany. Saingy niavaka kosa i Noa fa tsy mba toy izany, fa voasoratra hoe: « marina sady tsy misy tsiny, teo amin’ny olona niara-belona taminy ». Araka izany tsy nanana olona tamin’ny fifandraisana amin’ny mpiara-monina aminy izy na dia ratsy aza ireto farany. Ny didy sy ny fitsipik’ Andriamanitra no narahiny fa tsy izay filan’ny nofo na izay fanaon’ny rehetra. Ny Tompo dia manoro ny tsara mandrakariva. Vokany, tsara ny fitondratenany sy ny atao rehetra ka mahita fitia eo imason’ Andriamanitra sy ny olona.
2- Tsara fifandraisana amin’Andriamanitra
Rehefa nalahelo Andriamanitra ka handringana dia nolazainy tamin’i Noa izany. Notolorany toromarika izy mba tsy hiharan’izany. Notanterahan’i Noa araka izay nolazaina taminy izany. Ny fanambaran’Andriamanitra izay hataony sy ny fanamboaran’i Noa ny sambo-fiara araka izay nandidian’ny Tompo azy dia maneho miharihary fa tsara ny fifandraisana teo amin’ Andriamanitra sy Noa. Voaporofo fa tena niara-nandeha tamin’Andriamanitra tokoa i Noa. Ny fiarahana amin’ny Tompo dia mandritra ny androm-piainana manontolo. Izay mino sy manaiky an’i Jesoa ho Tompo, Ilay nampihavana teo amin’ny hazo fijaliana, no tsara fifandraisana amin’Andriamanitra sy ny olona rehetra.
Fanontaniana:
Manao ahoana ny fifandraisanao amin’Andriamanitra Ray?
Foibe Sampana Sekoly Alahady