Fintina famaranana 50T FJKM sy 200T LMS.
KIANJABEN’IMAHAMASINA
ALAHADY 21 OKTOBRA 2018
Nizotra soa aman-tsara sady mendrika ny voninahitr’Andriamanitra ny Fotoam-pivavahana famaranana ny jobily roa sosona, teny amin’ny kianjaben’Imahamasina ny Alahady, 21 oktobra 2018 teo. Feno hipoka ny toerana rehetra toy ny gradin, ny kianja, ny tribune roa, hatramin’ny toerana azo hipetrahana rehetra. Hita teny avokoa ny solontena samihafa avy amin’ny Synodamparitany rehetra hatramin’ireo vahiny avy any ivelany aza. Ny tomponandraikitra teto amin’ny firenena dia nahitana delegasiona mafonja. Ireo Fiangonana rahavavy eo anivon’ny FFKM tsy latsa-danja noho izany. Nanakoako ny hiran’ireo Antoko mpihira marobe nanao hira nitambarana. Faly ny vahoaka Kristiana FJKM rehetra, na ny tonga na ny tsy tonga teny fa nanaraka tamin’ny onjam-peo. Misy ny hafatra nentin’ny Filohan’ny FJKM miisa dimy tao anatin’ny toriteny:
1-Ny teny fikasana: TANO IO,
2- Ny Fanahy Masina: ITOKIO,
3 – Ny modely tsara: MBA IRIO,
4 – Izay tena inoanao: SAFIDIO,
5 – Ho avy ny andro iray KA TADIDIO.
Nitarika ny fotoana: Atoa RAKOTONIRINA Charles, Mpitandrina. Nitoriteny: Atoa IRAKO ANDRIAMAHAZOSOA Ammi, Mpitandrina Filoha FJKM.
Nisy ihany koa ny Asa fampaherezana notarihan’ny Birao Foibe FJKM Fifohazana: ny Filohany RAKOTONDRAMANANA Arijaona, Mpitandrina, ny Tonia ROBSON RADO lalaina Johary, Mpitandrina, ny Filoha mpanampy ANDRIANANTENAINA LAZANDRAINY Martin, ary ny Mpitandrina RABEHATONINA James.
Ho an’ Andriamanitra irery ny Voninahitra