Mandrindra fiainana ny Tenin’Andriamanitra
Mofonaina anio: Alatsinainy, faha 20 Febroary 2023
SALAMO 119.9-16
SALAMO 119.9-16
9 [BETA] Inona no hiarovan'ny zatovo ny lalan-kalehany tsy ho voaloto? Ny fitandremana araka ny teninao. 10 Tamin'ny foko rehetra no nitadiavako Anao; Aza avela hivily hiala amin'ny didinao aho. 11 Ato am-poko no iraketako ny teninao, Mba tsy hanotako aminao. 12 Isaorana anie Hianao, Jehovah ô; Ampianaro ahy ny didinao. 13 Ny molotro no nentiko nilaza Ny fitsipika rehetra naloaky ny vavanao. 14 Ny lalan'ny teni-vavolombelonao no ifaliako, Tahaka ny ifaliako amin'ny harena rehetra. 15 Ny didinao no hosaintsainiko, Ary hodinihiko ny lalanao. 16 Ny didinao no hiravoravoako: Tsy hohadinoiko ny teninao.Mandrindra fiainana ny Tenin’Andriamanitra
and « Inona no hiarovan’ny zatovo ny làlan-kalehany tsy ho voaloto? Ny fitandremana araka ny teninao »
1-Aza mihaino fotsiny fa tanteraho
Matetika isika faly mihaino ny teny ihany ka manadino ny manatanteraka izay voambara .Raha jerena ny fifandraisana sy ny fampiasan’ny olona izay eo amin’ny tenany dia ny sofina no miasa be indrindra amin’ny fandraisana ny Tenin’Andriamanitra , saingy maro ny teny no tafajanona fotsiny eo amin’ny sofina fa tsy ahitana fiatraikany amin’ny fiainany . Izany no mahatonga ny Tompo hiteny hoe : » Fa aoka ho mpankato ny teny ianareo , fa aza mpihaino fotsiny ihany ka mamitaka ny tenanareo » (Kak 1.22) . « Fa aina ho an’ny mahazo azy Izy ary fahasalamana ho an’ny nofony rehetra » (Ohab 4.22)
2-Handeha amin’ny fahadiovana ianao
Iza tontolo izao dia mandrombaka antsika mba hilentika ao anaty fotaky ny fahotany . Ny Tenin’Andriamanitra anefa no arofanina ho antsika (and105) ,izay manana ny tenin’Andriamanitra dia tsy hiraparapa anaty aizim-pahotana sy aizim-pahoriana fa hanana ny fahazavan’ aina ary tsy izany ihany fa hahita fahasambarana mihitsy koa aza (Sal 1.1-6) .
Fanontaniana :
Inona no andrasanao tsy handraisanao ny Tenin’ny Tompo ?
Sampana Sekoly Alahady FOIBE FJKM