Lehibe Andriamanitra
Mofonaina anio: Alahady, faha 07 Novambra 2021
SALAMO 57.1-11
SALAMO 57.1-11
1 [Fangataham-pamindram-po sy fahatokiana an'Andriamanitra, na dia hodidinim-pahavalo aza] Ho an'ny mpiventy hira. Al-tasheth. Miktama nataon'i Davida tamin'ny nandosirany an'i Saoly tao anaty zohy. Mamindrà fo amiko. Andriamanitra ô, mamindrà fo amiko; fa Hianao no ialofan'ny fanahiko; eny, ao amin'ny aloky ny elatrao no ialofako, mandra-pahalasan'ny loza. 2 Hitaraina amin'Andriamanitra Avo Indrindra aho, dia amin'Andriamanitra Izay mahatanteraka ho ahy. 3 Haniraka avy any an-danitra Izy ka hamonjy ahy, raha miteny ratsy izay misafoaka manenjika ahy; eny, Andriamanitra haniraka ny famindram-pony sy ny fahamarinany. 4 Ny fanahiko dia eo afovoan'ny liona; handry eo amin'ny masiaka aho, dia eo amin'ny zanak'olombelona,- lefona sy zana-tsipìka ny nifiny, ary sabatra maranitra ny lelany. 5 Misandrata any ambonin'ny lanitra Hianao, Andriamanitra ô! aoka ho ambonin'ny tany rehetra ny voninahitrao. 6 Efa namela-pandrika harato haningotra ny diako izy, ary nampitanondrika ny fanahiko*; nihady lavaka teo anoloako izy, kanjo ny tenany ihany no latsaka ao anatiny. [Na: nitanondrika ny fanahiko] 7 Tafatoetra ny foko, Andriamanitra ô, eny, tafatoetra ny foko; hihira sy hankalaza aho. 8 Mifohaza, ry voninahitro; mifohaza ry valiha sy lokanga; hifoha maraina koa* aho.[Na: Hampifoha ny maraina aho] 9 Hidera Anao eny amin'ny vahoaka aho, Tompo ô, hankalaza Anao eny amin'ny firenena aho. 10 Fa lehibe mihatra amin'ny lanitra ny famindram-ponao, ary mihatra amin'ny rahona ny fahamarinanao. 11 Misandrata any ambonin'ny lanitra Hianao, Andriamanitra ô; aoka ho ambonin'ny tany rehetra ny voninahitrao.Lehibe Andriamanitra
1-Fialofana azo antoka Izy (and1-4)
Noho ny zava-tsarotra atrehan’i Davida dia miantso an’Andriamanitra izy . Ny safidy mazava ao anatiny no ambarany eto raha misy ny loza mitranga . Misafidy ny hialoka ao amin’Andriamanitra izy ary hita mazava amin’ny teny ambarany fa zava-mandalo ihany io olana atrehany io (mandra-palasan’ny loza) and1 . Hita amin’izao vavaka sy antso vonjy ataony izao fa na dia lehibe aza ny Andriamanitra ivavahany dia midina mandray andraikitra hamonjy azy . Aoka koa isika hatoky an’Andriamanitra izay misahirana ny amintsika , mba hananantsika hery sy fahatoniana manoloana izao zava-tsarotra iainantsika izao : « haniraka avy any an-danitra Izy ka hamonjy ahy » (and 3) , hoy i Davida . Ankehitriny koa dia efa nirahiny ny zanany hamonjy antsika . »Fa Andriamanitra mampiseho ny fitiavany antsika , fa fony mbola mpanota isika dia maty hamonjy antsika Kristy  » (Rom 5.8)
2-Mamadika ny ratsy ho soa Izy (and 5-11)
Miova eto ny resaka ataon’i Davida , satria lasa hiaka fiderana an’Andriamanitra . Ao anatin’izany hiaka ataony izany no ahitantsika ny fandraisana andraikitra ataon’Andriamanitra . Lasa nandrora mitsilany ireto fahavalo ka izay fandrika noheveriny hamelezana an’i Davida ihany no nahavoa azy (and 6) . Moa tsy izany ve no zava-misy eo amin’ny fiainantsika raha tena matoky an’Andriamanitra isika? Izay heverin’ny fahavalo hahavoa antsika no vao mainka mitondra antsika amin’ny fandresena . Nakaton’ny valan’aretina ny fiangonana trano fa nisokatra kosa ny fiangonana isan-tokatrano . Ny famonoany an’i Jesoa no noheveriny ho faharesentsika , kanefa tonga lĂ lana nitondran’Andriamanitra famonjena ho antsika izany .
Fanontaniana :
Efa mahazo antoka ny amin’ny finoanao va ianao ?
Sampana Sekoly Alahady FOIBE FJKM