Jesoa Kristy no fanehoan’Andriamanitra ny tenany

Jesoa Kristy no fanehoan’Andriamanitra ny tenany

1-Izy dia mpahary hatramin’ny voalohany (and1-3)

Raha iverenantsika vakiana ny Genesisy toko voalohany , ka ampifandraisina amin’izay hitantsika eto dia hiharihary amintsika fa efa tao amin’Andriamanitra hatramin’ny voalohany ny Teny , izay tsy iza fa JESOA KRISTY. Izy io Teny io , teny tonga nofo . « Izy no nahariana ny zavatra rehetra , ary raha tsy Izy dia tsy nisy nahariana izao zavatra ary izao , na dia iray aza  » (and3) . Araka izay ,dia tsy teny foana na teny mandalo fotsiny ny Tenin’ Andriamanitra fa teny miasa ,teny mamorona . Izaoo tontolo izao no nisy dia satria noharian’Andriamanitra . Teo amin’ny Grika , ny teny hoe: « teny » dia enti-manambara foto-kevitra ara-tsaina izay mandamina sy mampifanaraka ny zava-boahary rehetra . Fa ny « teny » izay ambaran’i Jaona eto kosa dia ilazana an’i JJESOA MPAMONJY hita maso ,sady niseho mihitsy teo amin’ny tantaran’ny olombelona sady niara- nonina taminy .

2-Izy no nisiam-piainana (and 4,5)

Ny fiainana ambaran’i Jaona eto dia izay tombotsoa rehetra raisin’ny mino amin’ny alalan’i Jesoa Kristy . Ny lehibe indrindra amin’izany dia ny fiainana mandrakizay . Izy irery no hany làlana mazava miondra antsika ho amin’ny tena fiainana . « Izy no làlana sy fahamarinana ary fiainana . Tsy misy olona mankany amin’ny Ray afa-tsy amin’ny alalany  » (jao 14.6) . Tsy naharesy na nahasakana na nahatelina Azy ny aizina izay aloky ny fahafatesana sy ny fiainan-tsy hita . Izy no Ilay mazava mamirapiratra ao amin’ny maizina (and5). Na dia mbola anjakan’ny aizim-pahotana aza izao tontolo izao dia efa mamirapiratra kosa ny Mazava ka mahavonjy izay mitady Azy .

Fanontaniana:

Inona no ifandraisan’ireto « mazava » « marina » fiainana » ?

Sampana Sekoly Alahady FOIBE FJKM