Ilay Andriamanitra Tompon’ny hery rehetra
Mofonaina anio: Asabotsy, faha 23 Mey 2020
SALAMO 47.1-9
SALAMO 47.1-9
1 [Fihobiana noho ny niakaran'ny Tompo] Ho an'ny mpiventy hira. Nataon'ny Koraita. Salamo. Mitehafa tanana, ry firenena rehetra; mihobia ho an'Andriamanitra. 2 Fa Jehovah no avo indrindra ka tokony hatahorana; Mpanjaka lehibe ambonin'ny tany rehetra Izy. 3 Mandresy firenena maro Izy ho ambanintsika ,ary firenen-tsamy hafa ho ambanin'ny tongotsika. 4 Mifidy ny lovantsika ho antsika Izy, dia ny voninahitr'i Jakoba izay tiany. 5 Efa niakatra tamin'ny fihobiana Andriamanitra, Jehovah niakatra tamin'ny fitsofana ny anjomara. 6 Mankalazà an'Andriamanitra, eny mankalazà; mankalazà ny Mpanjakantsika, eny, mankalazà. 7 Fa Mpanjaka amin'ny tany rehetra Andriamanitra; mahaiza mankalaza tsara ianareo. 8 Andriamanitra manjaka amin'ny firenen-tsamy hafa; Andriamanitra mipetraka eo ambonin'ny seza fiandrianany masina. 9 Ny mpanapaka ny firenen-tsamy hafa miangona ho olon'Andriamanitr'i Abrahama; fa an'Andriamanitra ny ampingan'ny tany; Avo indrindra Izy.Ilay Andriamanitra Tompon’ny hery rehetra
Tarihina hidera an’ Andriamanitra ny olona noho ny asa lehibe efa notanterahiny izay hita sy tsapan’ny olona.
1-Andriamanitra mpandresy
Tompon’ny hery sy ny fahefana rehetra Andriamanitra . Anjaran’ny olona mahatsapa izany, ny manaja , ny manome voninahitra Azy . Ny fahalehibiazan’Andriamanitra dia niseho indrindra tamin’ny fandreseny ireo firenena izay fahavalon’ny vahoaka voafidiny , sy ny fanomezany ny tany Kanana ho lovan’izy ireo . Nasehon’Andriamanitra tao amin’i Jesoa Kristy ihany koa izany maha- mpandresy Azy izany , satria i Jesoa Kristy no nandresy ny herin’i satana ka manome izay mino Azy ny fiainana mandrakizay .Raiso ho fandresena ho anao ny fandresen’i Jesoa Kristy ny fahafatesana .
2-Andriamanitra Mpanjaka
Taomina hankalaza an’Andriamanitra Mpanjaka ny olona rehetra. Ilay Mpanjaka niakatra tamin’ny fihobiana , niakatra amim-boninahitra ho eo amin’ny fanjakany hanapaka izao tontolo izao amin’ny heriny manontolo. Anjaran’ny mino Azy ny mandray Azy amin’ny voninahitra ka hanaiky ny fahefany , hanaiky ho tena olona hitoetra eo ambany fanapahany , hanaraka ny sitrapony .Tsarovy fa manerana izao tontolo izao ny fanjakan’ Andriamanitra . manapaka ny olona amin’ny alalan’ny Fanahy Masina Izy .Raha manaiky hotarihan’ny Fanahy Masina isika ka miaina sy mankato ny teniny izay nomena sy nampianarina antsika dia tena vahoakany tokoa.
Fanontaniana:
Mitondra inona ho amin’ny fiainanao ny fahafantaranao fa Tompon’ny hery sy ny fahefana rehetra Andriamanitra?
Sampana Sekoly Alahady FOIBE FJKM