Ny olona matoky an’Andriamanitra

Ny olona matoky an’Andriamanitra

1-Mankahala ny mpanao ratsy

« Dia izay manonona Anao ho enti-mamitaka, Jehovah ô, Eny, ny fahavalonao izay manonona Anao foana. » (And. 20). Misy ireo olona izay mpanao ratsy, eny, mpamono olona mihitsy aza, kanefa mazoto manao fanompoam-pivavahana amin’Andriamanitra. Manao fanekena, mianiana, milokaloka amin’ Andriamanitra ho fanafenana ny ratsy atao. Mankahala ny olona tahaka izany ny mpanao Salamo satria manonona foana ny anaran’i Jehovah. Tarihin’ny Soratra Masina indray isika mpino eto mba tsy hanao ny fanaon’ny mpanao ratsy, hananatra ny ratsy fanahy, ho marina amin’ny fanekena sy teny ary ny fianianana izay atao eo anatrehan’Andriamanitra. Tsy naman’ny mpanao ratsy fa mitondra an’i Jesoa eo aminy.

2-Madio fo sy saina

« Diniho aho, Andriamanitra ô, ary fantaro ny foko: Izahao toetra aho, ary fantaro ny eritreritro… » (And. 23). Raha nilaza ny faharatsian’ny ratsy fanahy ny mpanao Salamo dia tsy tamin’ny vava fotsiny no nilazany izany fa tena tamin’ny fo tokoa. Izany no nahatonga azy nangataka amin’ Andriamanitra hijery ny fony sy ny eritreriny hanamarina fa tena tsy tia ny ratsy tokoa izy. Noho izany. isika kristiana ihany koa mila marina amin’ny teny aloaky ny vava sy ny fisainana ary ny ao am-po. Andriamanitra mahita ny miafina ao am-po sy ny ao an-tsaina no angataho hanamarina fa madio io saina sy fo io. Angataho ihany koa Izy mba hiditra ao anatinao hanadio ny fonao sy ny sainao ary hanafaka anao amin’ny ratsy fanahy mba hiainanao ny fahamarinana. Jesoa Kristy no mahay manadio ny fo ny saina tsy ho azon’ny ratsy. Koa angataho izy hitahiry antsika amin’ny fahadiovana.

Fanontaniana:

Inona ny fomba iarovanao tena amin’ny faovan-dratsy?

Sampana Sekoly Alahady Foibe