Ny olona maniry ho mpianatr’i Jesoa Kristy

Ny olona maniry ho mpianatr’i Jesoa Kristy

1- Manontany ny toerana misy Azy

Ary hoy izy roa lahy taminy: Raby (izay atao hoe, raha adika, « Mpampianatra ô) aiza Hianao no mitoetra?» (And. 38) Tamin’izany fotoana izany, ny fanontanian’ny mpianar’i Jaona roalahy an’i Jessoa Kristy hoe: « aiza hianao no mitoetra » dia midika ho faniriana te-hiaraka amin’i Jesoa mandritry ny fotoana lavalava kokoa. Naniry te-hiaramonina amin’i Jesoa izy roalahy ireto. Mitodika amintsika koa izany fanontaniana izany. Maniry te-hiaramonina amin’i Jesoa ve ianao. Sa ianao ilay tsy mba manana izany faniriana izany? Fa ny olona izay manana faniriana hitoetra maharitra miaraka amin’i Jesoa Ihany no ilazany ny toerana misy Azy, dia any am-piangonana izany, raha amin’izao andro iainantsika izao. Raha maniry hiaraka amin’i Jesoa ny olona dia mahita ny toerana misy trano Fiangonana.

2- Miara-monina Aminy

«…Koa dia nandeha izy ka nahita izay nitoerany ary nitoetra teo aminy tamin’izany andro izany… » (And. 39)

Rehefa nahita ny toerana nisy an’i Jesoa ireto mpianatra roalahy ireto, indrindra rehefa ndre ny tenin’i Jesoa hoe « avia, fa ho hitanareo » dia nandeha nanaraka Azy sady niara-nitoetra taminy. Tsy nijanona hatreo amin’ny fahitana ny toerana misy an’i Jesoa fotsiny izy ireo fa niara-nitoetra taminy mihitsy. Rehefa maniry ho mpianatr’i Jesoa Kristy ny olona dia miara-mitoetra Aminy. Mahafoy andro, mahafoy fotoana, ary manana faharetana hanarahana sy ihainoana an’i Jesoa Kristy eo amin’ny toerana izay misy Azy. Misy ihany anefa ny olona milaza ny tenany ho mpanaradia an’i Kristy saingy tsy tamana ao am-piangonana, tsy manana faharetana mihaino ny teniny. Mila maharitra miara-mitoetra amin’i Jesoa Kristy isika.

Fanontaniana:

Inona no antony tsy anananao faharetana ao am-piangonana?

Sampana Sekoly Alahady Foibe