Ny olona mahatsapa ny fahalehibiazan’Andriamanitra
Mofonaina anio: Alakamisy, faha 14 Janoary 2021
JOBA 42.1-6
JOBA 42.1-6
1 [Ny teny farany nataon'i Joba, sy ny nanomezan'Andriamanitra azy fiadanana indray] Ary Joba dia namaly an'i Jehovah ka nanao hoe: 2 Fantatro fa hainao avokoa ny zavatra rehetra, ary tsy azo ferana ny fisainanao. 3 Iza no mahatakona ny fisainanao amin'ny tsi-fahalalana? Koa dia nilaza izay tsy fantatro aho, dia zava-mahagaga loatra amiko, izay tsy takatry ny saiko. 4 Mifona aminao aho, mihainoa, fa hiteny aho; Hanontany Anao aho, ka ampahafantaro. 5 Fandrenesan'ny sofina ihany no nandrenesako Anao; Fa ankehitriny izao kosa dia ny masoko no mahita Anao; 6 Koa dia miaiky sy mibebaka Eto amin'ny vovoka sy ny lavenona aho.Ny olona mahatsapa ny fahalehibiazan’Andriamanitra
Ny zavatra rehetra niseho teo amin’ny fiainan’i Joba no nahatsapany ny fahalehibiazan’ny Tompo ka nahaizany
1-Manetry tena
Niaina tamin’ny fahoriana sy ny fizahan-toetra mahamay i Joba .Tamin’izany rehetra izany anefa dia tsy nanota na nivadika tamin’ Andriamanitra izy , Ilay mahefa ny zavatra rehetra . « Fantatro fa hainao avokoa ny zavatra rehetra ,ary tsy azo ferana ny fisainanao  » (and2). Ny hany nataony dia ny nanetry tena sy niaiky teo anatrehany fa tsinontsinona sy ambany izy , fohy ny fisainany .Toy izany no fomba nanehoan’ Andriamanitra ny maha-izy Azy taminy . Ny tantaram-piainantsika olombelona tamin’ny lasa dia tokony hahatakarantsika ny fisian’ Andriamanitra mitantana izao rehetra izao sady miantoka ny fahavelomantsika .
2-Mibebaka
« Koa dia miaiky sy mibebaka eto amin’ny vovoka sy ny lavenona aho  » (and6). Tsara homarihana fa tsy noho ireo fiampangana nataon’ny namany azy akory no nampibebaka an’i Joba teo anatrehan’Andriamanitra , fa ny fahatsiarovany ny teny tsy voahevitra sy tsy voalanjalanja nataony tamin’ Andriamanitra . Ny « vovoka » sy « lavenona » voalaza eto dia mifandray amin’ny fisaonana sy ny fanetren-tena izay fahita matetika ao amin’ny Testamenta Taloha. Raha teo anatrehan’ireo namany sy ny vadiny dia tsy nanan-keloka izy , ary tsy mitombina avokoa ireo fiampangana momba azy .Tsy nanamarin-tena tamin’izany izy . Ny olo-marina dia tsy maintsy mihevitra mandrakariva ,sao sanatria ka nisy teny na fihetsika tsy mifanaraka amin’ny sitrapon’ Andriamanitra ary mibebaka isanandro .
Fanontaniana :
Inona no lesona azonao azonao ampiharina amin’ny tantaran’i Joba ?
Sampana Sekoly Alahady FOIBE FJKM