Ny fanjakan’Andriamanitra
Mofonaina anio: Zoma, faha 15 Janoary 2021
APOKALYPSY 21.22-27
APOKALYPSY 21.22-27
22 Ary tsy nahita tempoly teo aho; fa ny Tompo Andriamanitra, dia ny Tsitoha, sy ny Zanak'ondry no tempoliny. 23 Ary ny tanĂ na tsy mba mila ny masoandro na ny volana hamirapiratra aminy; fa ny voninahitr'Andriamanitra no nanazava ary, ary ny Zanak'ondry no fanazavana azy*. [* Gr. jirony] 24 Ary ny firenena maro no handeha amin'ny fahazavany; ary ny mpanjakan'ny tany dia mitondra ny voninahiny ho ao anatiny. 25 Ary ny vavahadiny tsy harindrina akory amin'ny andro (fa tsy mba hisy alina ao). 26 Ary ny voninahitra sy ny hajan'ny firenena maro dia ho entina ao anatiny. 27 Ary tsy mba hiditra ao mihitsy izay tsy masina, na izay manao vetaveta, na izay mandainga, fa izay voasoratra ao anatin'ny bokin'ny fiainana izay an'ny Zanak'ondry ihany.Ny fanjakan’Andriamanitra
Araka ny Soratra Masina dia ho levona izao tontolo izao ankehitriny , dia ny lanitra voalohany sy ny tany voalohany . Hanao ahoana kosa ary ny ho toetoetry ny fanjakan’ Andriamanitra ?
1-Momba ny Tempoly sy ny tanĂ na (and22-26)
Ny Tempoly tao Jerosalema no noheverina sy ninoana fa mariky ny fanatrehan’Andriamanitra ny olona . Voalaza eto fa tsy nahita Tempoly i Jaona Apostoly . Nambarany kosa fa ny Tompo Andriamanitra Tsitoha sy ny zanak’ondry no Tempoly ao amin’ilay Jerosalema vaovao (and 22). Tsy ny trano no zava-dehibe ao amin’ny Tempoly , fa ny fanatrehan’ Andriamanitra amin’ny alalan’ny teniny . Amin’izany dia hiseho amin’ny voninahiny mamirapiratra i Jesoa , ka ny famirapiratan’ny voninahiny dia ampy ho fahazavan’ny Tempoly sy ny tanĂ na manontolo , fa tsy ilĂ na masoandro hanazava , na jiro isan-karazany tahaka izay fahita amin’ny fandravahana sy fanazavana ny trano fiangonana ankehitriny . Jesoa dia efa nilaza , fony Izy tety an-tany fa Izy ny fahazavan’izao tontolo izao (Jao 8.12)
2-Iza no ho tafiditra any ?
Mifanohitra tanteraka amin’ny toetry ny olona ankehitriny ny ho toetry ny olona ao amin’ny fanjakan’Andriamanitra … »Fa izay voasoratra ao anatin’ny bokin’ny fiainana izay an’ny zanak’ondry ihany » no hiditra any « (and27) . Tsy iza akory ireo , fa izay olona voavonjin’ny fahasoavana maimaimpoana ka voadion’ny ran’ny zanak’ondry , dia izay rehetra mino fa ho fanomezana azy fiainana mandrakizay no nandatsahan’i Jesoa ny rany teo amin’ny hazo fijaliana . Tsy hiditra any mihitsy ny ota sy ny faharatsiana rehetra fahita ety amin’izao tontolo izao ankehitriny . Ary izany no tokony hiomanantsika ka hibebahantsika isanandro isanandro .
Fanontaniana :
Azonao antoka ve ny hidiranao any amin’ny fanjakan’ny lanitra ?
Sampana Sekoly Alahady FOIBE FJKM