Miderà an’Andriamanitra
Mofonaina anio: Talata, faha 05 Janoary 2021
APOKALYPSY 19.1-4
APOKALYPSY 19.1-4
1 [Saotra ataon'ny any an-danitra noho ny nitsarana an'i Babylona] Rehefa afaka izany, dia nahare hoatra ny feon'ny vahoaka betsaka tany an-danitra aho nanao hoe: Haleloia! Ny famonjena sy ny voninahitra ary ny hery dia an'Andriamanitsika; 2 Fa marina sy mahitsy ny fitsarana ataony; Fa nitsara ilay vehivavy janga lehibe Izy - Dia ilay nandoto ny tany tamin'ny fijangajangany - Ary namaly ary noho ny ran'ny mpanompony izay nalatsaky ny tànany. 3 Dia niteny fanindroany ireo hoe: Halelola! Ary ny setroky ny tanàna dia miakatra mandrakizay mandrakizay. 4 Ary ny loholona* elatra amby roa-polo sy ny zava-manan'aina efatra dia niankohoka nivavaka tamin'Andriamanitra. Izay mipetraka eo ambonin'ny seza fiandrianana, ka nanao hoe: Amena; Haleloia! [* Gr. presbytera]Miderà an’Andriamanitra
Ny teny hoe: « Haleloia » dia midika hoe : » Miderà an’Andriamanitra« . Nahoana isika no asaina hidera Azy ?
1-Azy ny famonjena sy ny voninahitra ary ny hery
Aseho an’i Jaona Apostoly ireo mpihiran’ny lanitra sy ny feony manakoako , mitaona ny olona hidera an’Andriamanitra . Midera an’ Andriamanitra izy ireo satria nomelohina ilay vehivavy janga , antsoina hoe: Babylona , tanàna mamirapiratra , miroborobo teo amin’ny lafiny ara-toe-karena sy nanana ny tanjaka rehetra nahafahana nifehy izao tontolo izao , nanan-karena tamin’ny fahavoazan’ny hafa (Apo 18.5-6,13) , saingy mpiavonavona sy manao an’ Andriamanitra ho tsy misy . Azo lazaina ho endrik’io Babylona io avokoa izay toerana rehetra ahitana fanompoan-tsampy , fijangajangana , fitaoman-dratsy, fiavonavonana, fireharehana , fiheverana ho mahavita tena , fatokiana ny rentirenty sy ny haren’ny tany . Mila mitandrina ny mpino mba tsy ho voasarik’ireny . Andriamanitra irery no mahavonjy.
2-Marina sy mahitsy ny fitsarana ataony (and 2)
Ety an-tany no mety ahitana fitsarana miangatra , anjakan’ny kolikoly sy ny tsy fahamarinana . Tsy mahagaga raha toa ka enjehina sy fofoina ny Apostoly sy ny Fiangonana noho izy ireo mitory sy manambara an’i Jesoa Kristy fahamarinan’Andriamanitra . Tsy maintsy hotsaraina araka ny asany avy ny olona rehetra . Ny « setroka »(and3) dia famantarana ny fitsarana an’i Babylona . Aoka isika mpino mba tsy hanadino fa tsy maintsy hiseho amin’ny endriny feno sy miharihary ny fandresen’i Kristy , ka hitoetra ho mahatoky mandra-pahatongan’ny andro voatendrin’ny Ray hisehoan’ny fanjakan’ Andriamanitra sy ny fitsarany. Haleloia! Amena.
Fanontaniana :
Nahoana no mirehareha sy miavonavona ny mpanankarena?
Sampana Sekoly Alahady FOIBE FJKM