Mibebaha eo anatrehan’ny Tompo
Mofonaina anio: Asabotsy, faha 24 Martsa 2018
Mibebaha eo anatrehan'ny Tompo
2 Tantara 30.1-9
1 [Ny nitandreman'i Hezekia sy ny vahoaka ny Paska] Ary Hezekia naniraka tany amin'ny Isiraely sy ny Joda rehetra ka nanoratra taratasy ho amin'ny Efraima sy ny Manase koa mba hankanesany any an-tranon'i Jehovah any Jerosalema hitandrina ny Paska ho an'i Jehovah, Andriamanitry ny Isiraely. 2 Fa ny mpanjaka sy ny mpanapaka mbamin'ny fiangonana rehetra tany Jerosalema dia niara-nihevitra ny amin'ny hitandremana ny Paska amin'ny volana faharoa. 3 Nefa tsy nahatandrina azy tamin'izany andro izany izy, satria ny mpisorona tsy mbola nanamasina ny tenany loatra, ary ny olona koa tsy mbola vory tany Jerosalema. 4 Ary sitraky ny mpanjaka sy ny fiangonana rehetra izany. 5 Dia nandidy handefa teny eran'ny Isiraely rehetra hatrany Beri-sheba ka hatrany Dana izy mba hankanesan'ny olona hitandrina ny Paska ho an'i Jehovah, Andriamanitry ny Isiraely, any Jerosalema; fa ny be sy ny maro tsy mba nitandrina azy araka ny voasoratra. 6 Dia lasa ny tsimandoa nitondra ny taratasy avy tamin'ny mpanjaka sy ny mpanapaka hitety ny Isiraely sy ny Joda rehetra ka nilaza araka ny didin'ny mpanjaka hoe: Ry zanak'isiraely ô, miverena amin'i Jehovah, Andriamanitr'i Abrahama sy Isaka ary Isiraely, mba hiverenany ho amin'izay sisa aminareo izay tsy azon'ny tànan'ireo mpanjakan'i Asyria. 7 Aza manahaka ny rainareo sy ny rahalahinareo izay nivadika tamin'i Jehovah, Andriamanitry ny razany, ka dia natolony ho figagana araka izao hitanareo izao izy. 8 Koa aza manamafy ny hatokareo toy ny nataon'ny razanareo, fa atolory an'i Jehovah ny tananareo, ka midìra ao amin'ny fitoerany masina, izay nohamasininy ho mandrakizay; ary manompoa an'i Jehovah Andriamanitrareo, mba hiala aminareo ny fahatezerany mirehitra. 9 Fa raha miverina amin'i Jehovah ianareo, dia hahazo famindram-po eo anatrehan'izay nitondra azy ho babo ny rahalahinareo sy ny zanakareo, ka dia ho tafaverina amin'ity tany ity izy; fa miantra sy mamindra fo Jehovah Andriamanitrareo, ary tsy mba hiamboho anareo Izy, raha miverina aminy ianareo.Mibebaha eo anatrehan’ny Tompo
2 Tantara 30.1-9
Miverena amin’i Jehovah ry Israely
1-Tandremo ny Paskan’i Jehovah 
Fotoana fanamasinana ny Tempoly sy ny mpisorona mpanao fanompoana ny Paska (ampitahao Nom 9.6-13) . Manana anjara fanompoana manokana amin’ny fikarakarana an’i Jerosalema sy ny tempoly ny taranak’i Davida mpanjaka . I Jerosalema no renivohitry ny fiangonana sy ny firenena Israely sy ny Joda ka mihevitra ny « hitandremana ny Paska amin’ny volana faharoa ny mpanjaka sy ny fiangonana » (and2)
2-Miverena amin’i Jehovah 
Ny fiakaran’ny vahoaka rehetra manatona an’i Jerosalema no mariky ny fibebahana . Maniraka ny irany ny mpanjaka no mariky ny fibebahana . Maniraka ny irany ny mpanjaka hitety ny tanin’ Israely hiakaran’ny olona any Jerosalema . Mandrava ny fitsitokotokoan’ny foko roambinifolo amin’ Israely no nataon’i Hezekia mpanjaka . Antsoina ny vahoaka sy ny mpisorona hanolotena ho an’ Andriamanitra hiditra amin’ny fitoerana masina sy hanompo an’i Jehovah ao (and8).
3-Miantra sy mamindra fo i Jehovah
Ny fitiavan’i Jehovah lalim-paka ny Israely no handraisany ireo izay miverina sy mibebaka aminy. Ny mpamabo , ny Babyloniana izany dia tsy hahazo mitazona izay te-hiverina any Jerosalema . Fitiavana no miandry sy asetrin’ny Tompo izay mibebaka na miverina aminy . Mialoha mandrakariva izay mety ho fanenenan’ny olona sy ny fibebahan’ny olona ny famelan-keloka .
Fanontaniana:
Birao Sekoly Alahady FOIBE FJKM