Mibebaha eo anatrehan’ny Tompo
Mofonaina anio: Alatsinainy, faha 12 Martsa 2018
Mibebaha eo anatrehan'ny Tompo
Hosea 12.1-7
1 [Fananarana ny Isiraely noho ny helony] Efraima manodidina Ahy amin'ny lainga, ary ny taranak'Isiraely amin'ny fitaka; Ary Joda mbola mikarenjy tsy manatona an'Andriamanitra, dia ny Iray Masina sy Mahatoky. 2 Efraima homan-drivotra sady manenjika ny rivotra avy any atsinanana, mandritra ny andro dia ataony betsaka ny lainga sy ny fandozana; Manao fanekena amin'ny Asyriana izy, ary diloilo no entina ho any Egypta. 3 Manana ady amin'i Joda koa Jehovah ary tsy maintsy mamaly an'i Jakoba araka ny alehany, ka hatsingeriny aminy ny nataony. 4 Fony mbola tany am-bohoka dia nihazona ny ombelahin-tongotry ny rahalahiny izy, ary rehefa lehibe izy, dia nitolona tamin'Andriamanitra; 5 Eny, nitolona tamin'Ilay Anjely izy ka nahery; Nitomany izy sady nifona taminy; Nahita azy tao Betela Izy, ary tao no niresahany tamintsika; 6 Jehovah, Andriamanitry ny maro, Jehovah no hahatsiarovana Azy. 7 Koa miverena amin'Andriamanitrao ianao; Tandremo ny famindram-po sy ny rariny. Ary miandrasa an'Andriamanitrao mandrakariva.Mibebaha eo anatrehan’ny Tompo 
Hosea 12.1-7
Hatramin’ny fotoana nialan’ny olona voalohany tamin’ny fankatoavana ny Tenin’ Andriamanitra dia mitady izay hanarenana azy ny Tompo , Mpamonjy Izy . Koa mivoitra eto ny fanarenan’ny Tompo ny lavo .
1-Miresaka sy miteny ny Tompo (and4-5)
Zava-dehibe miavaka ho antsika kristiana ny manana Andriamanitra afaka miresaka sy miteny amintsika . Ny Baiboly no hanehoany ny famonjeny sy ny Teniny amintsika . Izy no manatona aloha mba hifikirantsika Aminy . Izy Ilay efa tia antsika taloha ary tia antsika hatramin’ny farany . Henoy àry ny ny antson’ny Tompo mitaona antsika fony Izy teto an-tany ka mivavaha mba ho setrin’izany . Ny vavaka no nampianariny hiraisantsika Aminy indray . Resaka hatao Aminy tokoa izany .
2- Mitady ny fomba rehetra Izy (and6-7)
Efa fantany tsara ny momba antsika tsirairay tahaka ny hitanisany ny nataon’i Efraima sy Joda . Tsy misy azontsika hialana eo anatrehany eo anatrehany , mampitandrina antsika hanao ny tsara ary mampiandry antsika ho vavolombelony ny Tompo . Miharihary izany fa ny fombany rehetra no hanangonany antsika ho eo anatrehany . Porofo izany fa tsy mahafoy na mandao antsika ny Tompo . Ataony izay mahafaly sy mahasoa antsika ka aoka isika hihaino sy hankato ny Teniny mba hamirapiratra ny fahasoavany sy ny voninahiny .
Fanontaniana:
Birao Sekoly Alahady FOIBE FJKM