Mibebaha eo anatrehan’ Andriamanitra
Mofonaina anio: Asabotsy, faha 17 Martsa 2018
Mibebaha eo anatrehan' Andriamanitra
Salamo 25.4-11
4 Ampahafantaro ny lalanao aho, Jehovah ô; ampianaro ny sitrakao aho. 5 Tariho amin'ny fahamarinanao aho, ka ampianaro; fa Hianao no Andriamanitry ny famonjena ahy; Hianao no andrasako mandritra ny andro. 6 Tsarovy ny antranao sy ny indrafonao, Jehovah ô, fa hatrizay hatrizay ireny. 7 Aza ny fahotan'ny fahatanorako, na ny ratsy nataoko, no tsarovanao; fa aoka ho araka ny famindram-ponao no hahatsiarovanao ahy, noho ny fahasoavanao Jehovah ô, 8 Tsara sy mahitsy Jehovah, ka izany no ampianarany ny mpanota ny lalana. 9 Mitarika ny mpandefitra amin'ny marina Izy, ary mampianatra ny mpandefitra ny lalany. 10 Ny lalan'i Jehovah rehetra dia famindram-po sy fahamarinana amin'izay mitandrina ny fanekeny sy ny teni-vavolombelony. 11 Noho ny anaranao, Jehovah ô, dia mamelà ny heloko, fa lehibe izany.Mibebaha eo anatrehan’ Andriamanitra
Salamo 25.4-11
Mivavaka amin’ny finoana ny mino
Salamo abidy fampiasa andavanandro sy amin’ny fanompoampivavhana teo amin’Israely ity Salamo ity . Manao vavaka i Davida eo amin’ny andininy faha 4-7 , ary ny and 8-15 dia fanambarany ny fahalalana sy fatokiana an’ Andriamanitra .
1-Mibebaka ny olona matahotra an’i Jehovah
Mibebaka izay matahotra an’i Jehovah . Mibebaka ny amin’ny fahotana vitany izy (and11) . Mizara roa ny fotoana nanotany ka ibebahany : tamin’ny andron’ny fahatanorany ary amin’izao itenenany izao . Tsy ampy ny mijanona eo amin’ny fiaken-keloka fa mandroso sy miaina amin’ny fiainana vaovao . Mangataka hizotra amin’ny Tenin’ Andriamanitra na ny lalàn’i Jehovah (and4) . Mangataka ny fampianaran’ Andriamanitra ny fahamarinana sy ny fanantenana izy (and5) . Matoky ny Tompo ny mpanompony fa tsy miova i Jehovah .
2- Mahatoky sy marina Andriamanitra
Miorina amin’ny finoana an’ Andriamanitra ny vavaka ataony . Manana fanekem-pinoana matotra ny mpanao salamo izay ilazany an’ Andriamanitra . Tsara sy mahitsy i Jehovah (and8), marina sy mamindra fo (and10). Tsy masiaka amin’izay matahotra azy Izy ary mampianatra ny mpanohitra handeha amin’ny fahamarinana . Io toetran’ Andriamanitra tsy reraka mampianatra sy mandefitra io no fanantenan’ny mpanota sy ny diso làlana ka te- hiverina Aminy . Raisiny izay rehetra manatona azy .
Fanontaniana:
Birao Sekoly Alahady FOIBE FJKM