Miasà amin’ny fahatahorana an’Andriamanitra
Mofonaina anio: Zoma, faha 18 Septambra 2020
EKSODOSY 18.17-23
EKSODOSY 18.17-23
17 Ary hoy ny rafozan'i Mosesy taminy; Tsy tsara izao zavatra ataonao izao. 18 Samy ho reraka mihitsy, na ianao na izao olona miaraka aminao izao; fa mavesatra aminao loatra izao zavatra izao, ka tsy ho zakanao irery ny hanao izao. 19 Ary ankehitriny, dia maneke ny teniko, fa hanoro hevitra anao aho, ka Andriamanitra anie homba anao: Aoka ianao ho alalan'ny olona amin'Andriamanitra mba hitondranao ny teniny amin'Andriamanitra; 20 ary hampianatra azy ny didy sy ny lalàna izay mety halehany sy ny asa izay mety hataony. 21 Ary mizaha eo amin'ny olona rehetra izay lehilahy mahay sy matahotra an'Andriamanitra, dia lehilahy marina izay tsy tia kolikoly; ka manendre mpifehy arivo sy mpifehy zato sy mpifehy dimam-polo ary mpifehy folo hifehy azy. 22 Ary aoka ireo no hitsara ny olona mandrakariva, ka ny ady lehibe rehetra no aoka ho entiny aminao, fa ny ady madinidinika rehetra kosa dia aoka hotsarainy ihany; dia ho maivamaivana kokoa aminao izany, ka dia hiara-mitondra aminao ireo. 23 Raha hanao araka izany zavatra izany ianao, ka hilaza izay didy aminao Andriamanitra, dia haharitra ianao, ary izao olona rehetra izao koa dia ho tonga soa aman-tsara any amin'ny taniny.Miasà amin’ny fahatahorana an’Andriamanitra
1-Mahay mihaino ny torohevitry ny hafa
Mandamina raharaha sy adidy maro i Mosesy, toy ny loham-pianakaviana. Mavesatra tokoa izany ka tsy ho vitany samirery. Manoro hevitra azy Jetro mba hanankinany ny asa sasany izay mety handreraka azy sy ny vahoaka .Ny mpanompon’Andriamanitra izay nofidiny hitondra ny Fiangonana dia tokony hahay mihaino ny torohevitry ny hafa, handavorariana ny asa. Amin’ny fahatahorana an’Andriamanitra no anaovana izany, fa tsy hoe : hakanosana na tsy fahaizana, satria mbola hanadinan’Andriamanitra izay asa nampanaoviny. Sady manara-dalàna no feno fahendrena ny torohevitra naroson’i Jetro an’i Mosesy ka nahatonga azy nihaino sy hampihatra izany. Jesoa Kristy koa dia nifidy sy nanendry ny Apostoly mba ho amin’ny asa fitoriana ny Filazantsara , ny Fiangonana no manohy izany.
2-Mahay mizara ny faefana amin’ny hafa
Ny asa niandry an’i Mosesy eto, niainga tamin’ny fizarana, fisafidianana ireo olona tao amin’Israely izay nifanaraka tamin’ny torohevitry ny rafozan-dahiny (Jetro). Tsy inona izany fa ny fanomezam-pahefana olona sasany matahotra an’Andriamanitra mba hampahavokatra tsara kokoa ny asan’Andriamanitra. Olona mahay ,matahotra an’Andriamanitra, olona marina tsy tia kolikoly ka tsy azon’ny fitsiriritana sy ny fitiavam-bola. Mbola manan-kery mandraka ankehitriny anefa izany torohevitr’i Jetro tamin’i Mosesy izany eo amin’ny fitondrana ny vahoakan’Andriamanitra eo amin’ny Fiangonana. Ny fizarana ny fahefana ho an’ny hafa mba hahalavorary tsara ny asan’Andriamanitra, ka atao amin’ny fahatahorana tsy am-pireharehana satria an’ Andriamanitra ny asa. Ny Fiangonana mahay miasa dia mizara ny fahefana amin’ny hafa. Mahaiza mizara asa ary aoka ho fanomezam-boninahitra an’Andriamanitra izay atao.
Fanontaniana :
Mba notanterahanao tamin’ny fahamarinana ve ny andraikitra nomena anao tao amin’ny Fiangonana?
Sampana Sekoly Alahady FOIBE FJKM