Mampahatsiaro antsika ny maha Izy an’Andriamanitra
Mofonaina anio: Alahady, faha 30 Novambra 2025
Sal 98.1-9 / Hira 39: 1 / Vavaka / Mofonaina / Vavaka/ HF 23: 1
Salamo 75,1 - 7
1 [Ny fahakaikin'ny Mpitsara, sy ny kapoaky ny fahatezerany] Ho an'ny mpiventy hira. Al-tasheth. Salamo nataon'i Asafa. Tonon-kira. Hisaoranay Hianao, Andriamanitra ô; eny, hisaoranay Hianao; fa akaiky ny anaranao; mitory ny fahagagana ataonao ny olona. 2 Fa ho avy tokoa amin'ny fotoana Aho; eny, Izaho no hitsara marina. 3 Mihorohoro ny tany sy ny mponina rehetra eo aminy, nefa Izaho no nanorina ny andriny. 4 Hoy izaho tamin'ny mpirehareha: aza mirehareha*, ary tamin'ny ratsy fanahy: aza manandra-tandroka;[Na: Hoy izaho tamin'ny adala: Aza manao adala] 5 Aza manandratra ny tandrokareo ho avo; ary aza miteny sahisahy amin'ny fahamafian-katoka. 6 Fa tsy avy any atsinanana, na avy any andrefana, na avy any atsimo, ny fisandratana*.[Na: Na avy amin'ny efitra ny tendrombohitra no ihavian'ny fitsarana] 7 Fa Andriamanitra no Mpitsara; mampietry ny anankiray Izy ary manandratra ny anankiray kosa.Sal 98.1-9 / Hira 39: 1 / Vavaka / Mofonaina / Vavaka/ HF 23: 1
Salamo 75.1-7
Ity Salamo natao’i Asafa ity dia mampahatsiaro antsika ny maha Izy an’Andriamanitra; asongadiny eto åry fa:
1. Mpitsara Andriamanitra (and 7a)
« Fa Andriamanitra no Mpitsara… » hoy i Asafa. Io voambolana hoe mpitsara io, dia mampiharihary fa sady afaka mamoaka didy manameloka Andriamanitra no manana zo ihany koa hiaro ny marina. Koa ataovy tsara ny ataonao, hevero ny lalanao. Marina tokoa fa mpamindra fo Andriamanitra, kanefa aza odíana tsy fantatra na hamaivanina fa Mpitsara ihany koa Izy!
2. Marina ny fitsaran’Andriamanitra (and 7b)
« Mampietry… manandratra». Ity andininy ity dia maneho fa Andriamanitra dia tsy mitanila amin’ny fijereny ny ataon’ny olona, ka araka ny ataon’ny isam-batan’olona ihany no hitsarany azy (Nom 14. 18). Ny mpanao ratsy, indrindra fa ireo ialana nenina kanefa minia manentsin-tadiny, ary vao maika aza manamafy hatoka dia handray ny valin’asany mifanaraka amin’izany; ary izay marina eo anatrehan’ Andriamanitra kosa dia hahazo ny valim-pitia manandrify izany, araka ny halehiben’ny fitiavan’Andriamanitra. Manana safidy ianao, aoka ho marina, hanao ny sitrapon’ Andriamanitra !
3. Masi-mandidy Andriamanitra (and 7b, d)
« Mampietry ny anankiray Izy ary manandratra ny anankiray kosa». Ireo matoanteny roa ireo dia manasongadina ny fahefan’Andriamanitra, tsy azon’iza na iza baikoina Izy. Tsy misy ho afa-bela amin’ny fitsaran’Andriamanitra na iza na iza. Fa indrindra indrindra ny ratsy fanahy tsy mibebaka, hitroka ny faikan’ny kapoakan’ny fahatezaran’ Andriamanitra (and 9) !
Fanontaniana:
Ahoana marina по hahazoana milaza fa mpitsara Andriamanitra?
Sampana Sekoly Alahady Foibe