Ireo iraka nampanaovin’ny Ray an’i Jesoa
Mofonaina anio: Alarobia, faha 13 Janoary 2021
LIOKA 4.14-22
LIOKA 4.14-22
14 Ary Jesosy niverina tamin'ny herin'ny Fanahy nankany Galilia; dia niely tamin'ny tany rehetra manodidina ny lazany. 15 Ary Izy nampianatra teny amin'ny synagogan'ny olona ka nankalazain'izy rehetra. 16 Dia tonga tao Nazareta, izay nahabe Azy Izy; ary araka ny fanaony dia niditra tao amin'ny synagoga tamin'ny andro Sabata Izy ka nitsangana hamaky teny. 17 Dia natolotra Azy ny bokin'Isaia mpaminany; ary nony namelatra ny boky Izy, dia nahita ny teny voasoratra hoe: 18 Ny Fanahin'i Jehovah no ato amiko, Satria nanosotra Ahy hitory teny soa mahafaly amin'ny malahelo Izy; Naniraka Ahy hitory fandefasana amin'ny mpifatotra Izy, Sy fampahiratana amin'ny jamba, Hanafaka izay nampahorina, 19 Hitory ny taona ankasitrahan'i Jehovah (Isa. 61. 1, 2). 20 Ary rehefa nahorony ny boky ka naveriny tamin'ny mpanao raharaha, dia nipetraka Izy. Ary nandinika Azy ny mason'izay rehetra teo amin'ny synagoga. 21 Ary Jesosy niteny taminy hoe: Androany no efa tanteraka eto anatrehanareo izany soratra izany. 22 Ary izy rehetra nankalaza Azy sady talanjona noho ny tenin'ny fahasoavana naloaky ny vavany, ka hoy izy: Tsy Zanak'i Josefa va Ity?Ireo iraka nampanaovin’ny Ray an’i Jesoa
Rehefa vita ny fizahan-toetra tsy maintsy nolalovan’i Jesoa dia tonga tao Nazareta , tany nahabe azy Izy . Nambarany tamin’ny olona ny antony nanirahan’ny Ray Azy araka izao manaraka izao :
1-Hitory teny soa mahafaly amin’ny malahelo
Ny hoe : « malahelo » dia ireo olona mahantra ara-panahy , mahatsiaro sy mahalala fa mpanota izy, ka mila vonjy ho afaka amin’ny fahotany .
2-Hitory fandefasana ho an’ny mpifatotra
Ny mpifatotra dia ilazana ireo olona voagadran’ny fahotana ka mahatsiaro ho tsy afa-miala amin’izany .
3-Hitory fampahiratana ho an’ny jamba
Ny jamba dia ireo olona tsy mahita sy tsy manana fahalalana ara-panahy
4-Hanafaka izay nampahoriana
Ny olona lazaina ho « nampahoriana » dia ireo izay eo ambany fahefan’ny herin’ilay ratsy ka mahatsiaro mijaly, vokatra izany .
5-Hitory taona ankasitrahan’i Jehovah
Ny taona antsoina eto dia ny « Jobily  » . Ny taon-jobily dia taona masina sy lehibe ary mahafaly . Koa ny olona izay nivaro-tena ho andevo noho ny fahantrany dia novotsorana rehefa tonga io fotoana io , ary izay efa nivarotra ny fananany noho ny fahatereny dia nahazo azy maimaimpoana indray . Nahazo fahasoavana kosa ny nanan-trosa , ny very harena . Taona mahafaly ny taon-jobily . Nahatalanjona ny olona ny teny soa rehetra naloaky ny vavany ka tao ny faly nankalazana Azy , nanaiky fa mendrika ho deraina Izy . Ny zavatra nampalahelo kosa dia ny tsy faneken’izy ireo fa izy no Ilay Mesia nandrandrainy . Ny maha- zanak’i i Josefa mpandrafitra Azy no mbola nanakona ny masom-panahiny ka nahajamba azy.
Fanontaniana :
Inona no andrasanao amin’ireo asa nanirahana an’i Jesoa ?
Sampana Sekoly Alahady FOIBE FJKM