Ny mifikitra amin’i Jesoa

Apo 3. 12, 13 / Hira 236: 1 / Vavaka / Mofonaina / Vavaka / Hira 365: 3

Lioka 21.12-19

Ny fampaherezan’i Jesoa ny mpianany eto amin’ity Mofonaina anio ity dia ahazoantsika manatsoaka fa izay mifikitra amin’i Jesoa, na inona na inona mitranga dia.

1. Tsy avelany hangaina (and 14, 15)

«Коa aoreno ao am-ponareo ny tsy hihevitra rahateo izay havalinareo fa Izaho no hanome anareo vava sy saina, izay tsy ho azon’ny fahavalonareo rehetra valiana na resena. » hoy i Jesoa tamin’ny mpianany. Maneho ny fahavononany hiady ho azy ireo izany; sady efa ampanantenainy rahateo fa hampandresy izay mifikitra Aminy Izy. Na inona na inona miseho día aza maika hamaly, ento eo amin’i Jesoa, avelao Izy hiditra an-tsehatra hiady ny adinao (Eks 14.14)

2. Tsy gaga raha ankahalaina (and 17)

«Ary ho halan’ny olona rehetra ianareo noho ny anarako ». Mazava tsara eto fa noho ny amin’i Jesoa (fa tsy sanatria noho ny ratsy ataonao na ny toetra ratsinao) dia mety hatsangan’ny olona ho fahavalo ianao. Kanefa inona indray moa no hahataitra anao amin’izany? Ny olona nampitandremana mialoha hoy ny fiteny dia tahaka ny olona roa. Aza ataonao mahakivy na mampiraviravy tanana izay endrika fanenjehana, na tsy fitiavana mihatra aminao noho ny fijoroanao amin’ny finoana an’i Jesoa (tsindriana tsara hoe: noho ny amin’i Jesoa)

3. Maharitra (and 19)

«Amin’ny faharetanareo no hahatananareo ny ainareo ». Taomin’i Jesoa isika, mba tsy hivadika, na sanatria hiala amin’ny finoana na dia mafy sy mila hihatra aman’aina aza ny ataon’izao tontolo izao, satria izay maharitra hatramin’ny farany no hovonjena hoy ny Soratra Masina. Ny faharetana no hisitrahana ny valisoa omen’ny Tompo. Ny hazofijaliana mialoha ny satroboninahitra. Mahereza!

Fanontaniana

Ahoana no ihoarana ny fanenjehana?

Sampana Sekoly Alahady Foibe