Ny maha Izy Azy an’Andriamanitra
Mofonaina anio: Alahady, faha 19 Janoary 2025
Sal 104.1-6 / Hira171, 1-2 / Vavaka / Mofonaina / Vavaka / Hira 98, 1-2
Isaia 66.1-2
1 [Ny toe-panahin'ny tena Isiraely sy ny fandavana ny tsy izy, ary ny fandrosoan'ny Fiangonana sy ny hamoriana ny firenena rehetra hankany Jerosalema, ary ny handringanana ny ratsy fanahy] Izao no lazain'i Jehovah: Ny lanitra no seza fiandrianako, Ary ny tany no fitoeran-tongotro; Trano manao ahoana no hataonareo ho Ahy? Ary fitoerana manao ahoana no ho fitsaharako ? 2 Fa izao zavatra izao no nataon'ny tanako. Ka dia ary izao rehetra izao, hoy Jehovah; Nefa izao no olona hotsinjoviko, Dia izay malahelo sy torotoro fanahy Sady mangovitra noho ny teniko.Ny maha Izy Azy an’Andriamanitra
1- Lehibe Izy
Asehon’ny faminanian’i Isaia amin’ny kisarin-teny mora azo ny halehiben’Andriamanitra izay ilazany fa ny tany iray manontolo no fitoeran-tongony. Ny tany izay tsy ho azon’ny olona an-tsaina mihitsy ny hahafehy izany haben’izany sy ny zavatra rehetra ao aminy. Ambonin’izany, ny lanitra no seza fiandrianany. Ny lanitra izay tsy ho takatry ny sain’olombelona ho visavisaina ihany koa ny habeny. Izany no maneho ny halehiben’ Andriamanitra ka tsy azon’ny olona atao ny mametra na mamaritra an’Andriamanitra ho amin’ny toerana voafaritra na voafetra. Lehibe sy tsy voafaritra tahaka izany koa ny fahasoavany sy izay olona tiany ho vonjena. Ampahany amin’izay maha Izy Azy kely fotsiny ny fahazavan-tsaina ananantsika hahatakatra fa lehibe Izy.
2- Mitsinjo izay matahotra Azy Andriamanitra
Na dia tsy voafaritra aza ny olona tiany ho vonjena dia mazava tsara kosa izay voalaza eto fa mitsinjo ny olona izay malahelo am- panahy sy torotory fanahy Izy. Mitsinjo izay mangovitra noho ny Teniny Andriamanitra, izany hoe mitsinjo izay matahotra Azy. Tsy ny halehiben’ny asa na ny zavatra atao ho an’Andriamanitra no itsinjovan’ Andriamanitra ny olona fa ny fahatahoran’ny olona Azy. Na miasa be tokoa aza kanefa tsy misy fahatahorana an’Andriamanitra amin’izany dia zava-poana izay rehetra atao.
Fanontaniana
Tena matahotra an’Andriamanitra tokoa ve ianao?
Sampana Sekoly Alahady Foibe